Изге сәфәрдән кайткач

Изге сәфәрдән кайткач
Арча Укучылар сараенда эшләүче Дамир Таҗиевка быел Хаҗ сәфәре кылу насыйп булган. Дамир абыйның изге гамәлдән соң тышкы кыяфәте генә түгел, тормышка карашы да үзгәреп кайткан сыман тоелды. Һәрхәлдә, сөйләмендә бу сизелә. Иманның чистаруы кешене үзгәртергә сәләтле шул.
“Без Арча районыннан 13 кеше бардык. ТР Диния Нәзарәте юллап алган квота буенча хаҗ кылырга баручыларны 220 шәр кеше сыйдырышлы 8 самолет алып барды, — дип сөйләп китте ул.
— Хәзер изге сәфәр кылучыларга бару–кайту, яшәү өчен уңай шартлар тудырылганлыгын беләбез, ә элек бик күп авырлыклар күргәннәр бит, хәтта әйләнеп кайта алмаучылар да күп булган. Сезнең сәфәр дә уңайлы булдымы?
— Хаҗ кылу үзәге булган Мәккәдәге Әл–Хәрәм мәчетеннән өч чакрым ераклыкта урнашкан кунакханәдә яшәдек без. Әлхәмделиллаһ, хаҗ гамәлләрен тулысынча үтәп кайттык, Аллаһы кабулдан кылса иде. Һәр чорның үз авырлыгы, әлбәттә. Элек, хаҗга дөяләр өстендә барган чорда кеше ул кадәр күп булмаган. Хәзер кешенең күплеге алҗыта, бар җиргә чират торасы. Безнең өчен эсселек бик яман булды — анда без яшәгән көннәрдә һава торышы 45 градус иде, төннәрен 30 градус. Мәккә һәм Мәдинә шәһәрләрендә 22 көн булдык. Шуның 4 көне — хаҗ көннәре. Беренче көнендә иртән кояш чыкканнан алып ахшам намазы кылу. Гарәфә үзәнендә көне буе дога кылдык. Доганы үзең өчен генә түгел, гаиләң, туганнарың, якыннарың, дусларың, күршеләр, хезмәт-тәшләрең өчен дә кыласың. Мин Арча халкы, Татарстан һәм Җир шарының барлык мөэмин–мөселманнары өчен, араларында бармый калучыларның һәммәсенә дә хаҗ кылу мөмкинлеге туса иде дип тә сорадым. Бу Гарәфәдә тору дип атала.
Ахшам намазы җиткәч автобуслар белән Мөздәлифә үзәненә күчерделәр. 8 млн. кеше шушы үзәндә төн уздырдык. Кем кайда урын таба ала, шунда урнаша, ташлар өстенә намазлыгын яки җәймә җәеп, ачык һавада йоклый. Монда байлар да, ярлылар да юк, бар кеше дә бертигез.
Иртәнге намаз укылуга җәяүләп Мина үзәнлегенә күчтек һәм шуннан соң барлык юлны җәяүләп үттек. Чөнки машина юлларын тутырып халык агымы бара. Мина үзәнлегендә бихисап күп палаткалар куелган: бу шәһәрчекнең очы да, кырые да күренми. Бер палаткага 88 кеше урнаша. Салкын һава өрдерү җиһазлары белән җиһазландырылган палаткаларда өч көн яшәп, һәр көнне Джамарадка таш атарга бардык, Әл–Хәрәм мәчетендә тәваф (Кәгъбәне җиде тапкыр әйләнү) һәм сәги (Сафа һәм Марва таулары арасын җиде мәртәбә йөгереп узу) кылдык.
— Кайчак хаҗ сәфәре кылучылардан могҗизаларга тарулары турында ишетергә туры килә...
— Чыннан да, могҗизалар була икән. Кәгъбәдәге кара таш турысында икенде намазын укырга туры килде. Сәҗдәгә берничә секунд соңарып киттем. Алдымда кара ташлар урнашкан (сигез кисәктән тора), көмеш койма белән әйләндереп алган, күп кешеләрнең күрергә, орынырга хыялы булган могҗиза ачылды. Хаҗиларның 90 проценты аны күрә алмыйча кайтып китә. Икенчесе, Мәдинә шәһә-рендәге Ән–Нәби мәчетендә пәйгамбәребез Мөхәммәт с.г.в. кабере турысында ук ахшам намазын уку булды. Шул урында укыйм әле, дип алдан планлаштырсаң һич мөмкин түгел бу, чөнки иң күп кеше, иң зур тыгызлык шушы ике урында.
— Тәэсирләр?
— Тәэсирләр бихисап. 1 млн. кеше сыйдырышлы әл–Хәрәм мәчетенең матурлыгына исең китәрлек. Мәчеткә 98 капкадан керергә мөмкин, һәр капканың исеме бар. Бөтен җир шары шуның эчендәге Кәгъбәгә юнәлеп намаз укый, кыйбла шушы була инде. Мәккәдәге бар гамәл дә гыйбадәт. Биш вакыт намазны барлык мөселманнар өчен изге булган мәчетләрдә укыдык. Мәккәдән Мәдинәгә кадәр 500 чакрым араны автобусларда бардык. Тәрәзәдән чүлләр, тауларны манзара кылдык. Шушы араны пәйгамбәребез дошманнар эзәрлекләвендә качып бара.
Хаҗ гамәлләре тормыш мәшәкатьләре белән каткан бәгырьне йомшарта, калебне чистарта, кыямәт көнен күргәндәй буласың. Чөнки өстеңдәге ике кисәк ак материал (бу хаҗда ир–атларның махсус киеме) кәфенлеккә ишарә, тирә–юньдәге кешеләр тыгызланып сине кысканнар, ләкин син алар белән сөйләшә алмыйсың, чөнки төрле милләттән. Һәр кеше дога кыла, Аллаһыдан ялвара, синдә кешенең эше юк. Шул яклары белән кыямәт көнен хәтерләтә сыман.
Әңгәмә ахырында мин барлык газета укучыларга Аллаһы Тәгаләдән пакь, хак, нык иман, хәләл ризык, Аллаһыга карата ихтирам тулы йөрәкле булу, Аллаһыны даими рәвештә искә алучы тел, беркайчан бозылмас тәүбә сорыйм. Аллаһы барчабызның әхлагын яхшыртсын, начар гамәлләрне ерагайтсын иде.
— Аллаһы Тәгалә үзегезнең дә хаҗыгызны кабул кылсын иде, әңгәмәгез өчен рәхмәт.
Розалия ЗИННӘТОВА