Чын Кыш бабай килде Кырлайга

Чын Кыш бабай килде Кырлайга
Дүшәмбе көнне Яңа Кырлайда Кыш бабай йорты яңадан үзенең ишекләрен ачты.
Хәзер ул кунакларны каршы алырга әзер. Аларны биредә берсеннән–берсе кызыклы уеннар, әкият геройлары, тау шуу, ә иң мөһиме — Кыш бабай һәм Кар кызы белән очрашу көтә. Мин дә анда булдым, уеннарда катнаша торгач, үземнең балалыктан күптәннән чыкканымны онытып та җибәрә язганмын. Шулай булмый, кайчан әле әкият геройлары мине чанада тартып йөртерләр, Шүрәле, Убырлы карчык белән биер, Кар бабайлар белән тау шуар, Кыш бабайның йокы бүлмәсендә булыр идем?!
Әй, матур да икән Кыш бабайның йорт эче. Иң ошаганы — теләкләр әйтү я хат итеп салу өчен куелган кисмәкләр булды. Ул теләкләр үтәлә икән бит. Кыш бабай шулай диде. Үзем дә сизмәстән мин дә барып берсенә, иң зурысына, башымны тыктым, теләкләремне әйттем. Юк инде, балалар кебек курчак, я булмаса яшьләр кебек текә машина сорамадым, балаларым, үзебез исән–сау булсак иде, дип теләдем.
Аннан тылсымлы ак йортка барып, Арча Укучылар сараеның өстәмә белем бирү педагогы Алсу Мортазина белән җепләрдән, кәгазьдән чыршы да ясарга тырышып карадым.
— Балалар гына түгел, өлкәннәр дә биредә булырга ярата. Төрле әйберләр ясыйлар, барып чыкмаса, балаларча борчылалар. Алар белән кызыграк та әле, — ди Алсу.
Яңа Кырлайдагы Кыш бабай йортына Арчадан гына түгел, республиканың башка районнарыннан, алай гынамы, Мәскәүдән, Самарадан, Чиләбе өлкәсеннән, Киров ягыннан килгәннәр. Хәтта узган ел Америкадан да бер гаилә булып киткән. Балалары кыш, кар күреп, сөенеп туя алмаган, рәхәтләнеп уйнаган.
Шушы көннәрдә дәүләт телерадиокомпаниясе инвалид балаларны алып килергә тиеш икән. Алар өчен бу искиткеч күркәм бәйрәм булачак. Ә башкалар өчен? Анысы сезнең үзегездән тора инде. Чын Кыш бабай һәм Кар кызы сезне үз йортында көтә.
Гөлсинә ЗӘКИЕВА