Яңа балалар бакчасында

Яңа балалар бакчасында
Арча станциясендәге 9нчы балалар бакчасы мөдире Надия Мифтахетдинова бүлмәдәге тәрәзә пәрдәсен ачып: “700дән артык күп балалы гаиләгә бирелгән җирләр монда”, — дип буш басуга күрсәтте. Зур шәһәрчек калкып чыгачак биредә!
Югыйсә, юл кагыйдәләре буенча үткәрелгән чараны карарга дип кенә килгән идек. Ә күпме мәгълүмат алдык, бакчадагы зәвык белән эшләнгән һәр нәрсәгә сокландык, уңайлыкларны күреп тел шарт-латтык. Бакча ул диварлары белән дә тәрбияләргә тиеш. Килеп керүгә сөекле шагыйребез Г. Тукайның сүрәтенә, андагы шигырь юлларына күз төшә. И туган тел, и матур тел, әткәм, әнкәмнең теле... Бөек шагыйребез хөрмәтенә куелган зур вазадагы чәчәкләр тирә–юньгә ямь биреп тора. Диварларга ясалган Г. Тукайның әкият геройлары күзне иркәләп кенә калмый, Шүрәлеләре белән серле дөньяга алып керә. Психолог, логопед бүлмәләре, музыка, спорт заллары, әкият театры, фольклор, вокаль ансамбльләр, музыка кораллары оркестры, татар, рус, инглиз телләре дәресләре, хореография, рәсем сәнгате түгәрәкләре — болар бар да кызыклы.
— Улыбыз Рүзәлне кечкенәләр төркеменә йөртәбез, — дип сөйли Айваннан Гөлнар Шәмсетдинова. — Балалар бәхетенә төзелгән бакча бу. Тәпиләп барсаң да ерак түгел. Әллә каян балкып күренеп тора. Капкасыннан керүгә матурлык дөньясына эләгәсең. Саф һавада уйнау өчен барлык мөмкинлекләр дә эшләнгән. Карын көрәп торалар. Үзебезнең төр-кемгә аерым ишектән ке-рәбез. Киенү–чишенү урын-нары иркен. Киемнәр шкафының астыннан җылылык торбалары үтә, аяк киемнәре кибеп тора. Идәннәр җылытылган. Телевизор бар. Тәрбиячеләребез баланың ничек көн үткәргәнен әйтеп тора. Улыбыз шигырь дә ятлап өлгерде инде. Ашавы яхшырды. Бала өчен бакча кирәк шул. Ияләнерме, иртәрәк түгелме икән, дип, башта икеләнгән идек, ярый әле бакчага илткәнбез дип сөенәбез хәзер.
— Безнең олы улыбыз Мурат зурлар төркеменә йөри, — дип сөйли Арча станциясендә яшәүче Гүзәл Зәйнуллина. — Бик ярата. Кайчан бакчага барабыз, дип кенә тора. Спорт залын сөйләп бетерә алмый. Анда велосипедлар, кечкенә тренажерлар бар, ди. Тәрбиячеләребез Рәилә Хәйдәровна белән Альбина Шамилевна баланың тәртибе, үсеше турында мәгълүматны җиткереп торалар. Улыбыз, әни, өстәлгә эс-кәтерләргә кадәр җәеп ашаталар безне, шундый матур, ди. Куанып бетә алмыйбыз.
Башка бакча тәрбияче-ләре фикерләре белән дә кызыксындым.
— Бакча менә дигән, җитәкчесе искиткеч, тәрбиячеләргә дә шушы югарылыкта эшләргә язсын, — дип тели 10нчы балалар бакчасының тәҗрибәле тәрбиячесе Фәния Гыйз-зәтуллина.
2нче балалар бакчасы тәрбиячесе Гүзәл Медникова:
— Сүз дә юк, заманча бакча. Кызыгып, сокланып карап йөрдек, — дип сөйли. — Заман баласы өчен нәкъ менә шундый иркен, зәвыклы, техник яктан җиһазландырылган бакча кирәк. Төркемнәрдә балалар саны күп булмавы да уңай. Һәр төркемнең үз исеме, үз стиле булуы отышлы. Балалар да бик ошады миңа, ачыклар, чит апалардан куркып калмадылар. Коллективның әле яңа, ияләнү вакыты. Киң белемле, абруйлы җитәкчеләре белән бәхетле алар. Ә Надия Равилевнага шундый зур коллективны — олы машинаны эшләтеп җибәрүдә уңышлар телик.
...Зурлар төркеме тәрбиячесе Чулпан Гарипова балалар белән юл кагыйдәләре буенча оештырган чараны кызыксынып карадык. Бакчада балага белемне уеннар аша сеңдерәләр. Тәрбияче максатына иреште. ЮХИДИ бүлекчәсе өлкән инспекторы Альберт Сабиров балаларга бүләкләр дә биргәч, и-и, сөенде инде сабыйлар.
— Юл кагыйдәләре буенча чараларны ай саен үткәреп торыгыз, безне дә чакырыгыз, сезгә дә бүләкләр алып килербез, — диде ул тәрбиячеләргә.
Румия НАДРШИНА