Дума мөстәкыйльлеккә өйрәтә

Дума мөстәкыйльлеккә өйрәтә
Арча Укучылар сарае каршында эшләп килүче өлкән сыйныф укучылары Думасының дүртенче утырышы булды. Аны җитәкчесе Миләүшә Шакирова алып барды.
— Дума моңа кадәр район күләмендәге мәсьәләләр белән шөгыльләнде. Ә бу юлы халыкара проблемалар турында сүз алып барылды. Өченче дөнья илләрендә ачлыктан тилмерүчеләргә ничек ярдәм күрсәтергә? Эбола чиренә каршы ничек көрәшергә? Балалар күзлегеннән чыгып фикер йөрттеләр. Алар шушы проблемалар буенча резолюция төзегәннәр һәм утырышта шуны якладылар, — ди Миләүшә Шакирова.
Дума ай саен җыела. Ул комитетларга бүленгән. Мәгариф һәм мәдәният, массакүләм чаралар, экология һәм башка комитетлар эшли. Һәр комитет үзен кызыксындырган мәсьәлә буенча проект төзергә һәм май аенда булачак нәтиҗә чыгару утырышында шуны якларга тиеш.
— Проектларны балалар мәктәптә дә төзи. Әмма алары ниндидер бер фәнгә генә кагыла, — ди М.Шакирова. — Ә биредә алар төрле өлкәләргә кагылышлы мәсьәләләргә тукталалар, тагын да тирәнрәк белем алалар. Аеруча уңышлы саналган проектларны бәйгеләргә дә җибәрәбез. Халыкара форумда грант та оттык.
Безнекеләрнең эш тәҗрибәсе белән уртаклашырга Биектау районы вәкилләре дә килгән иде.
— Бездә бу эш әлегә башланып кына килә. Шуңа бик кызыксынып утырдык. Балаларга карыйбыз, сөйләшүләре үк икенче, үзләрен тота беләләр, халык алдында чыгышлар ясарга өйрәнәләр,— ди “Тулпар” сыйныфтан тыш эшләр үзәге җитәкчесе Миләүшә Сәгъдиева.
— Авыл мәктәпләреннән булсалар да, балалар оялып тормыйлар, үз фикерләрен җиткерә беләләр, аралашалар. Мөстәкыйльлек тәрбияләнә, — ди Шәпше мәктәбенең тәрбия эшләре буенча директор урынбасары Гөлчәчәк Гыйниятуллина.
Гөлсинә ЗИННӘТОВА