“Төньяк балкышы” яңадан балкыды

“Төньяк балкышы” яңадан балкыды
Ашытбаш мәктәбендә шашка буенча район мәгариф идарәсе һәм Яңа Кенәр укучылар иҗат йорты беренчелегенә “Төньяк балкышы” исеме астында район турниры узды.
Ярышта Кәче, Арчаның 2нче, Яңа Кырлай, Шушмабаш, Ашытбаш һ.б. мәктәпләрнең спорт сөючеләре катнашты. Уеннар яшь буенча дүрт категория-гә бүлеп уздырылды.
Җиңүче булып 1–2 сыйныфлар арасында Инзиф Каюмов (Ашытбаш), Линара Каюмова (Кәче), 3–4 сыйныф арасында Илназ Сабиров һәм Адилә Насыйрова (Кәче мәктәбе), 4–7 сыйныфлар арасында Алмаз Мифтахов (Кәче), Айзирәк Хәлимова (Ашытбаш), 8–11 сыйныфлар арасында Айнур Зиннуров (Арчаның 2нче мәктәбе), Нәркизә Кавиева (Ашытбаш) танылды.
Гомуми нәтиҗәләр буенча 1 урынны Ашытбаш мәктәбе командасы яулады. 2 урында — Кәче, 3 урында Яңа Кырлай мәктәбе командалары.
— Шулай да Арчадан Чәчкә Зәйнуллина, Яңа Кырлайдан Солтан Шиһапов, Ашытбаштан Дәниф Хәкимҗанов көчле уен күрсәттеләр, — ди, җиңүчеләрне котлап, бүләкләр тапшыручы, хөкемдар Сөләйман Галиуллин. Шушмабаш мәктәбе командасы “Җиңүгә омтылыш” номинациясендә махсус приз белән бүләкләнде.
Ашытбаш мәктәбенә килгәндә, бу алар өчен дүртенче җиңү булды. Моңа кадәр алар грек–рим көрәше, шахмат, милли көрәш турнирларында җиңеп чыкты һәм төрле фәннәрдән 30 призлы урын яулады. Башлангыч сыйныф укучылары арасында җиңүче Инзиф Каюмов Ашытбаш балалар бакчасында тәрбияләнә.
Ашытбаш мәктәбе — балалар бакчасыннан башлап чыгарылыш сыйныфларга кадәр төрле спорт уеннары — көрәш, шашка–шахмат һ.б. төр уеннарны мәктәп уку программасы белән бәйләп күнегүләр уздыручы бер-дәнбер мәктәп. Уздырылган һәр чараны югары сыйфатлы итеп башкаруы, һөнәри яктан югары дәрәҗәле укытучылар коллективы булуы белән дә аерылып тора.
Розалия ЗИННӘТОВА