Исереккә 50 мең сум штраф

Исереккә 50 мең сум штраф
Декабрь салкын кыш ае дисәк тә, соңгы атналарда көннәр бик матур һәм җылы тора. Безнең өчен шулай ул. Ә менә руль артына утырып юлга чыгучылар өчен бик рәхәт түгел шул. Бер җылытып, бер суытып юлларда бозлавык хасил булды, шуның белән беррәттән юл һәлакәтләре саны да күпкә артты.
Узган атна урталарында Кенәр якларына чыгарга туры килде. Өч урында машина юл кырыена төшкән иде. ЮХИДИнең Арча бүлекчәсе хезмәткәрләре әйтүенчә, моның сәбәбе бер бозлавыкта гына түгел, ә һава шартларының юлда йөрүчеләр өчен уңай булмавын белә торып тизлекне арттыруда да.
Декабрьдә дә һәр айдагыча ЮХИДИ һәм Арча эчке эшләр бүлеге хезмәткәр-ләре тарафыннан даими рейдлар үткәрелгән. Барлыгы 430 юл хәрәкәте кагыйдәләрен бозу очраклары теркәлгән. Шуның 33е тизлекне арттырган өчен. Куркынычсызлык каешы такмыйча йөрүчеләр саны да 90 булган. 11 кеше махсус креслосыз балаларын юлга алып чыккан. Ярый, үзең турында уйлама да, ди. Тик баланы ни өчен куркыныч астына куярга? Исән-имин йөрергә язсын инде һәрберебезгә дә, тик шулай да юлда безне ни көткәнен кем белә.
Җәяүлеләргә юл бирмәү очраклары сирәгәйсә дә, бар әле. Ай башыннан шундый 6 очрак теркәлгән. Җәяүлеләр үзләре дә юл аркылы чыгу кагыйдәлә- рен көннән–көн ешрак бозалар. Арча үзәгендә, мәсәлән, атлаган саен җәяүлеләргә юл аркылы чыгу өчен махсус урын билгеләнгән. Аңа карамастан, каян туры килә, шуннан чыгалар, хәтта кайберләре светофорны да санга сукмый, кызыл утка юл аркыла. Бер-бер хәл килеп чыкса, машина белән идарә итүчеләр гаепле була. Юл хәрәкәте кагыйдәләрен саклыйк инде үзебез дә. Һәлакәтләр саны кимемәү, кеше гомере өзелү үзебезне дә борчый. 20 көн эчендә генә дә 52 юл-транспорт һәлакәте булган. Шуларның берсендә бер хатын-кыз-ана һәлак булды, калганнарында, Аллага шөкер, кешегә зыян килмәде.
Исерек килеш руль артына утыручылар саны да һаман кимеми. Бу юлы 7 кеше тоткарланган. Берсе бер тапкыр эләгеп, правасын алдырырга өлгергән булган инде. Әле октябрьдә генә яңадан машинасына утырган. Шул арада тагын исерек килеш юлга чыккан. Хәзер инде аңа 50 мең сум штраф түләргә һәм 3 елга машина йөртү таныклыгыннан мәхрүм калырга туры киләчәк. Ә берсе бөтенләй правасыз килеш, өстәвенә исерек хәлдә юлга чыгарга батырчылык иткән. Тик ерак кына китә алмаган, ЮХИДИ хезмәткәрләре кулына эләккән.
Зинһар, юлда сак булыгыз, үзегез генә түгел, башкалар турында да уйлагыз. Сезнең саксызлык, ваемсызлык нәтиҗәсендә бер гаепсез кеше зыян күрергә мөмкин.
Гөлсинә ЗӘКИЕВА