Бәйрәмнәр бәйрәмчә үтсен

Бәйрәмнәр бәйрәмчә үтсен
Узган ел 31 декабрьдә мәш килеп Яңа елга әзерләнәбез. Кичке сәгать 4ләр тирәсендә форточкадан төтен исе керә башлады. Атылып урамга чыктык. Арчада Түбән урамында берәүләрнең утын мунчасы яна. Безнең Зур урамыннан ерак түгел ул. Янгын сүндерүчеләр янгынга җәелергә ирек бирмәде. Зыян күрүчеләргә дә, күршеләренә дә бәйрәм бетте...
Бәйрәм көннәрендә аерата сак булырга кирәк шул. Бу турыда район җитәкчелеге, янгынчылар, полиция, җирле үзидарәләр алдан кисәтә.
— Яңа 2015 елны хәвеф–хәтәрсез генә каршыларбыз, дип ышанасы килә, — ди янгын күзәтчелеге инспекторы Илшат Мәхмүтов. — Чыршыларны янучан материаллардан ясалган уенчыклар, шәмнәр белән бизәргә ярамый. Электр яктырткычларын катгый рәвештә янгын куркынычсызлыгы кагыйдә-ләре буенча гына кулланырга һәм тоташтырырга кирәк. Хәзер кибетләрдә һәм базарларда шартлаткыч әйберләр күп сатыла. Товар сертификацияле булырга тиеш. Салютны махсус билгеләнгән урыннарда гына атарга ярый.
— Иске елның соңгы көнендә мунча янудан башка “яңа ел сәбәбе” белән чыккан бәхетсезлек очраклары булмады, — ди дәүләт янгын күзәтчелеге бүлеге җитәкчесе Рөстәм Сафин. — Ә, гомумән алганда, Россия-дә “яңа ел сәбәбе” белән чыккан янгыннар арта бара.
— Янгыннар гадәттә шәмнәр, төзек булмаган электр гирляндалары, пиротехник әйберләр белән саксыз эш итү нәтиҗәсендә килеп чыга, — ди инспектор Илшат Мәхмүтов. — Ясалма һәм сыйфатсыз электр гирляндаларын куллану һәм аларны ялгыз өйдә яндырып калдыру куркыныч. Хлопушкалар, петардалар, мини-ракеталар, фонтаннар, рим шәмнәре, бенгаль утлар һ.б. аерата янгын куркынычы тудыра. Чөнки аларны эшләткәндә тирә–якка очкыннар чәчри, ялкын барлыкка килә. Хәтта үлем белән тәмамланган бәхетсезлек очраклары бар. Бигрәк тә балалар һәм яшүсмерләр арасында. Һәр товар әйбәтләп төрелгән, ничек кулланырга кирәклеге рус телендә язылган булырга тиеш. Янгын килеп чыккан очракта “01”, “112” телефоннары буенча шалтыратырга кирәк.
— Соңгы вакытта районда янгыннар ешайды, — ди Рөстәм Сафин. — Күп очракта алар ут чыбыклары дөрес ялганмаганнан, исерек килеш тәмәке тартудан, мунчаны караучысыз яндырып калдырудан, төзек булмаган мичләрдән чыга. Быел янгыннарда 5 кеше үлде. Шуларның икесе өлкән кеше. Ялгыз карт–карчыкларның хәлләрен белеп торырга кирәк.
Район хастаханәсе педиатры Алсу Кузнецова белән сөйләшәбез.
— Балаларга шартлаткыч, утлы уенчыкларны бөтен-ләй сатып алмаска кирәк, — дип кисәтә табибә. — Яңа ел бәйрәмнәре башлану белән, теләсә нинди ризык ашап, хастаханәгә аллер-гиядән һәм эче авыртып килгән балалар ешая. Әти–әниләр игътибарлы булсыннар иде.
“Ашыгыч ярдәм” бүлекчәсенең өлкән фельдшеры Мәдинә Сәлахова:
— Бәйрәмнәрдә спиртлы эчемлекләр, ашау белән артык мавыкмаска кирәк, — дип киңәш итә. — Андый вакытта махмырдан, күп ашаудан авыртып шалтыратучылар күбәя. Бозлавыклар, тау-ларда шуулар да имгәнүләр китерергә мөмкин. Хәзер вирус котырган чак. Аз гына тән температурасы күтәрелсә дә, тизрәк “Ашыгыч ярдәм”гә шалтыраталар. Безнең бәйрәмнәр вакытында болай да эш күп була, температура төшерүнең төрле чарасы бар, төшерә алмаган очракта гына безгә мөрәҗәгать итәргә кирәк.
... Узган ел 31 декабрьдә мунчасы янган яшь гаиләнең хәлен белдем.
— Хәзер мунчага әнигә йөрибез, — ди хуҗабикә. — Башкаларга мондый Яңа ел “бүләге” булмасын иде инде, мунчаны карап кына яксыннар, мичен төзек тотсыннар.
Хөрмәтле газета укучылар, бәйрәмнәр хәвеф–хәтәрсез, бәйрәмчә үтсен! Яңа ел белән сезне!
Румия НАДРШИНА