Иң актив бала — Югары Атыда

Иң актив бала — Югары Атыда
Әле кайчан гына “Беренче сыйныф укучысының мәдәни көндәлеге” дигән проект старт алган иде. Инде аның беренче өлешенә йомгак та ясалды.
Район үзәкләштерелгән китапханәләр системасы җитәкчесе Лилия Фазылованың: “Безнекеләр республика күләмендә урын ала алырмы?” — дип эче пошып тора иде, күңелле хәбәрләр килеп ирешкәч, куанычын безгә әйтергә ашыкты: Югары Аты мәктәбенең беренче сыйныф укучысы Рамил Мөхәммәтгалиев республика буенча иң яхшылар унлыгына керде!
Рамилнең әнисе Альбина Мөхәммәтгалиева белән сөйләшәбез.
— Мәдәни көндәлек безнең тормышны үзгәртте, яшәүләре күңелле булып китте, — дип сөйләде ул. — Үзем мәктәптә 1нче сыйныфны укытам. Сыйныф белән дә (барысы 5 бала) музейларга, мәдәни урыннарга йөрибез. Менә әле район үзәк китапха-нәсенә фильм карарга машина көтеп торабыз. Ике машинага төяләбез дә чыгып китәбез. Әтиләр йөртә инде. Укытучы буларак кына түгел, гаилә белән дә проектта катнашабыз. Кайларда гына булмадык инде?! Иптәшем Радик исән–сау булып машинада йөреп кенә торсын. Биектау ра-йонында “Иске Казан”, “Салих Сәйдәшев”, Кукмарада “Туган як”, Арча ра-йонының барлык музейларында булдык. Концерт, театрларга йөрибез, китапханәгә кереп утырабыз. Казанга чыгып китәбез. Кремль тирәсендәге музейларны карадык. Бигрәк тә улыбызның “Туган як” музеенда дино-заврларны күреп исе китте. Бауман урамы буйлап сәяхәт иттек. Андагы тарихи урыннарны өйрәндек, музейга кердек. Фотога, видеога төшәбез дә аларны төне буе мәдәни көндәлек сайтына урнаштырабыз, тәэсирләрне, фикерләрне язабыз. Башта сайтта теркәлдек. Сыйныфтагы барлык балаларны да теркәдем. Һәм менә күңелле нәтиҗә: улыбыз Рамил “Иң актив беренче сыйныф укучысы” номинациясендә призлы урынны алды! Әле менә Президент чыршысында булып кайттык. Бик күңелле булды.
Котлыйбыз Рамилне һәм, әлбәттә, Мөхәммәтгалиевлар гаиләсен! Алда тагын да зуррак уңышларга ирешергә язсын!
Румия НАДРШИНА