Газга айныкын айга түлә

Газга айныкын айга түлә
Декабрьдә район газ оешмасыннан килгән түләү квитанцияләре кайберәүләрне гаҗәпкә калдырган. Ни өчен түләүләрне күп итеп язганнар? Югыйсә, аларның “райгаз”га түлисе әҗәтләре юк!
Газета укучыларның сорауларына җавап алу максатыннан “Сабагаз” идарәсе Арча районы газ куллану хезмәтенең газ сату бүлеге җитәкчесе Рафис Хөснетдинов белән сөйләштек.
— Рафис Нуриәхмәтович, ни өчен квитанция-ләргә түләүне күп язганнар, безнең әҗәт юк, дип хафаланучыларга ни диярсез?
— Без түләү кәгазьләрендә абонентның күпме түлиячәге турында декабрьдә якынча сумнарны күрсәттек. Моңа борчылырга кирәкми. Берәүдән дә артыгын түләттермибез. Аның тәртибе менә болай. Бездән республиканың “Газпром” җәмгыяте һәр айны беренче көненнән соңгы көненә кадәр файдаланган газ өчен түләүләрне таләп итә. Чөнки исәп–хисаплар айлап бара.
— Ә безнең абонентлар ничек түли?
— Гадәттә бездә халык пенсия һәм хезмәт хакы алгач, газга ай уртасында түли башлый. Без моңа каршы түгел. Кемгә кайчан җайлы, шул вакытта исәп–хисапны өзсен. Әмма абонент, мәсәлән, 20сендә түләүләрне башкара икән, айның соңгы көненә кадәр газны күпме сарыф итәчәген алдан исәпләп чыгарсын да, бер айга килеп чыккан сумманы түләсен. Ә моның өчен һәрбер абонентка җиткерелгән квитанция нигезендә түләргә тәкъдим ителә. Артык түләнгән сумма киләсе айда чигерелә, түләнеп бетмәсә, өстәмә языла.
— Ялгыз пенсионерлар үзләренең бер айга күпме түләргә тиешлеген исәпләп чыгара алмаска мөмкин бит.
— Андый вакытта, 3–17–04 телефонына шалтыратып, безнең хезмәткәрләрдән ярдәм сорарга мөмкин.
— Безнең халык газга вакытында түлиме?
— Бу безнең районда проблемалы мәсьәлә. 2014 елның 1 декабрендә районда сарыф ителгән газ өчен түләнмәгән акчалар 11 млн. сум тәшкил итә. Дөрес, бу проблема бер безнең районда гына түгел.
— Күрше–тирә районнарда ничек?
— Әтнәдә һәм Балтачта файдаланган газ өчен бөтенләй бирәчәкләр юк.
— Димәк, безнең районда вакытында һәм файдаланган газ өчен түләү тәртибенә өйрәнмәгән абонентлар күп?
— Әйе. Кабатлап әйтәм, барлык абонентлардан да без файдаланган газ өчен вакытында түләүне сорыйбыз һәм бу юнәлештә максатчан эш алып барабыз.
— Максатчан эш турында төгәлрәк әйтеп үтсәгез иде.
— Түләмәгән һәм түләүләр аз чыккан абонентларның өйләрендә булабыз, исәпләгечләрнең төзеклеген, эшләү тәртибен тикшерәбез һәм билгеле бер нормативлар нигезендә тиешлесен түләттерәбез. Таләп катгый. Һәр абонент газ хезмәткәрләрен өйләренә кертергә тиеш. Өйләренә кертмәүчеләр дә бар. Хәтта берәү мылтык тотып чыккан. Республиканың “Газпром” җәмгыяте карары нигезендә өйләренә кертмәгән абонентларның хәтта газларын өзәргә хакыбыз бар.
— 2015 елның 1 гыйнварыннан газга бәяләр артамы?
— Юк, газга бәяләр артмый.
Румия НАДРШИНА