Чыршың бик кыйммәткә төшәр

Чыршың бик кыйммәткә төшәр
Яңа елны һәрберебез көтеп ала. Бәйрәмнәрне безнең халык күңелле итеп үткәрергә ярата. Өстәвенә Яңа елны каршы алган төнгә озын каникуллар ялганып китә. Бәйрәмнәрнең ямен җибәрәсең килмәсә, бу көннәрдә аеруча сак булырга кирәк. Өлкәннәр әйтүенчә, бер рәхәтнең бер михнәте дә килеп чыгарга мөмкин. Нәрсә турында сүз бара, диярсез?
Бу сорауга ачыклык кертү өчен Арча эчке эшләр бүлегенең җәмәгатьчелек тәртибен саклау буенча җитәкче урынбасары, полиция подполковнигы Ирек Габидуллинга мөрәҗәгать иттек.
— Өй түрендә бизәлгән чыршы тормаса, Яңа ел булмый инде ул. Тик аларны каян юнәтергә?
— Бары тик сатып алырга. Үзең кисеп алып кайту бик кыйммәткә төшүе бар. 20 декабрьдән 31 декабрьгә кадәр республикада “Чыршы” операциясе бара. Законсыз чыршыларны кисүчеләр полиция хезмәткәрләре тарафыннан тоткарлана.
— Аларга карата нинди чара күрелә?
— Закон таләпләрен бозып, чыршылы булырга теләүчеләр административ һәм җинаять җаваплылыгына тартыла. Штрафлары бик зур. Гражданнарга 3-4 мең, вазифаи затларга 20-40 мең, юридик затларга 200-300 мең сум.
— Хәзер бәйрәмнәрдә фейерверклар куллану модага кереп китте. Яңа елда бигрәк тә. Ул рөхсәт ителәме?
— Фейерверклар куллану нәтиҗәсендә нинди очраклар булганы һәрберебезнең күз алдында. Шуңа алдан чарасы күрелә. Гадәттән тыш хәлләрне кисәтү һәм юкка чыгару, янгын куркынычсызлыгын тәэмин итү буенча район комиссиясенең “Татарстан Республикасының Арча муниципаль районы территориясендә янгынга каршы аеруча режим урнаштыру турында”гы карары нигезендә янгын куркынычсызлыгын тәэмин итү максатында пиротехника (фейерверклар, петардалар һәм башкалар) куллану тыела. Фейерверкларны Арча стадионында, Төбәк-Чокырча плотинасы янында, Арча–Казан–Кәче юл чатында, Арча–Күпербаш юлының ачык урынында (торак пункттан 300 метр ераклыкта), Урта Бирәзә су башнясыннан 150 метр читтә, ачык урында, авыл җирлекләрендә махсус билгеләнгән урыннарда, авыл читендә генә җибәрергә рөхсәт ителә.
— Ә закон бозучыларга карата чаралар карал- ганмы?
— Әлбәттә. 10 декабрьдән 14 гыйнварга кадәр полиция хезмәткәрләре бу эшне контрольдә тотачак. Закон бозучылар административ җаваплылыкка тартыла. Гражданнарга 2-4 мең, вазифаи затларга 15-20 мең, юридик затларга 200-400 мең сум күләмендә штраф салына.
Тагын шуны да өстәп әйтәсем килә, Яңа ел бәйрәмнәре вакытында фатирлар басу активлашып китә. Еш кына караклар хуҗаларның өйдә булмавыннан бик оста файдалана. Күчемсез милкегезнең куркынычсызлыгын тәэмин итү максатыннан, аның сагы турында алдан кайгыртырга киңәш итәбез.
Бәйрәмнәрегез тыныч үтсен. Ә анысы бары тик үзегездән генә тора.
Гөлсинә ЗӘКИЕВА