Матур гаилә — ил күрке

Матур гаилә — ил күрке
Арча ЗАГСы алтын һәм зөбәрҗәт туйларын билгеләп үтүче парларны чакырып, бәйрәм үткәрүне матур традициягә әверелдерде. Бу юлы да Арча Мәдәният йортына 50 ел бергә яшәгән Тәгъзимә һәм Үзбәк Хәкимовлар, Равия һәм Рифат Галимуллиннар, Фаягөл һәм Мөхәммәт Нуриевлар, 55 ел бергә гомер иткән Розалия һәм Данил Гыйльмуллиннар чакырылган иде.
Ярты гасыр. Уйлап карасаң, бик зур гомер. Тормыш булгач, төрле чаклары булгандыр. Әмма алар гаилә учагы утын сүндермичә, бер–берсен аңларга тырышып, авыр чакларда яр-дәмләшеп, шатлыкларны уртаклашып яшәгән.
Арчадан Үзбәк абый белән Тәгъзимә апа күршеләр булган, соңрак араларында мәхәббәт уты кабынган. Кавышу, дөнья мәшәкатьләре, балалар — шулай гомер үткәнен сизми дә калганнар.
— Без — сугыш чоры балалары. Авыр тормышта үстек. Аллага шөкер, бик матур һәм тату яшәдек һәм яшибез. Дөнья тыныч булсын, без кичергән авырлыкларны балаларга күрергә язмасын, — диде Тәгъзимә апа.
Хәзер аларның терәкләре — өч балалары, алты оныклары, бер оныкчыклары үсеп килә. Җыелышып үзләрен котларга да килгәннәр. Читтәге кызлары котлау сүзләре юллаган. Кияүләре үзләренә җыр да бүләк итте. Олыгайган көндә балалар игелеген күреп, аларның уңышларына сөенеп яшәүгә ни җитә.
Арчадан Розалия һәм Данил Гыйльмуллиннар исә 55 ел бергә. Колачы егете белән Башкортстан кызын язмыш үзе кавыштыра. Комсомол юлламасы белән Сахалинга эшкә китеп барган Данил абыйның шунда абыйсының баласын карарга барган Розалия апа белән очрашуын башкача ничек аңлатасың. Тормышлары күрке булып ике кызлары үсеп буйга җиткән. Ата–анага шулай язган инде, балаларны үстерә, аларга канат куя, аннан читкә очыра. Хәзер әнә бу парның да Риммалары — Казанда, Лилияләре —Канадада. Төп йортта өлкәннәр икесе генә, бер–берсенә терәк тә, ярдәмче дә. Гомерләре озын, сәламәтлекләре нык булсын.
Равия һәм Рифат Галимуллиннар икесе дә Кыснадан, алар да бергә уйнап үскән күршеләр, хәзер авылның хөрмәтле өлкән-нәре. Рифат абый — тракторда, ә хатыны фермада эшли. Гомер буе туган җиргә тугры булып кала алар. Биш кыз тәрбияләп үстерәләр. Хәзер һәрберсенең үз гаиләсе, икешәр баласы бар.
Субаш Атыдан Фаягөл һәм Мөхәммәт Нуриевлар да авыл җиренә береккән. Мөхәммәт абый 45 ел фермада, Фаягөл апа да башта фермада эшли, килен булып төшкәч, 26 ел икмәк пешерә.
— Элек гаилә кору, тормыш алып бару өчен бүгенгедәй шартлар да булмаган. Шуңа карамастан, балалар да үстергәннәр, гаилә учагын да саклаганнар. Яшьләргә нинди зур үрнәк бу, — диде Арча шәһәре башкарма комитеты җитәкчесе Рафил Исмәгыйлев.
Бу чара өлкәннәр өчен чын бәйрәм булды. “Без язылышканда мондый нәрсә күрмәдек. Бүген яңадан өйләнешкән кебек булдык”, — диделәр шаяртып, тантаналы шартларда Арча ЗАГСының Дан китабына кул куйганнан соң. Балалары, җитәкчеләр котлавы, чәчәк бәйләмнәре, бүләкләр, Расих Галимҗанов башкаруындагы җыр — бар да бу көнне алар өчен иде.