Яңа Кишет мәктәбенә — мобиль сыйныф

Яңа Кишет мәктәбенә — мобиль сыйныф
“Түләүләр киләме соң инде?” Шушы сорау белән, бик күп мәктәп укучысы әти–әниләрен ел дәверендә борчыгандыр, мөгаен. Аеруча бәйгенең соңгы, декабрь аенда.
Республикабыз укучылары арасында барган “IT–чемпион” бәйгесенә нокта куелды. Узган ел бәйгедә мәктәп укучылары гына катнаша алса, быел мәктәп коллективы белән белем йорты өчен ярышу мөмкинлеге дә тудырылды.
“IT–чемпион” турында тулырак мәгълүмат алу өчен район мәгариф идарәсенең мәгълүмати технология-ләр буенча методисты Илшат Фәйзуллинга мөрәҗәгать иттек.
— “IT–чемпион” бәйгесендә районыбыз мәктәпләренең барлык укучылары да катнашты дип әйтсәк тә ялгыш булмас. Безнең район республика буенча иң актив катнашучылар санына керде. Күп кенә укучылар шактый баллар җыйды. Аларны аерым әйтеп китәсем килә. Ел дәверендә район буенча иң күп балл җыючыларның берсе — беренче этапта җинүгә карамастан мәктәп өчен тырышып бәйгедә катнашуын дәвам иткән Фирүзә Минҗанова (Яңа Кишет мәктәбе) 3405 балл, Илдан һәм Ильяр Фәйзуллиннар — 3711, 3618, Арслан һәм Эльвира Гыйниатуллиннар — 2385, 2381 (Арчаның 1нче мәктәбе), Зилә Вафина (Утар Аты) — 2169, Ралинә Җамалиева (Яңа Кишет) — 2147, Дмитрий Кондратенко (Арчаның 2нче мәктәбе) — 2120, Азат Мостафин 1379 балл һәм башкалар. Мин иң активларын гына әйтеп үттем. Район буенча өч иң күп балл җыйган укучы ноутбуклар белән бүләкләнде. Тантана 24 декабрьдә Казанда IT–паркта узды. Ә башкалар җыелган балларын истәлекле бүләкләргә алыштырды.
— Белгәнебезчә, узган ел белән чагыштырганда быелгы бәйгедә үзгәрешләр дә бар иде. Ул нидән гыйбарәт?
— Быел бәйге ике генә этаптан торды. Димәк, һәр районнан да алты укучы гына җиңүче була алды дигән сүз (узган ел 9 иде). Ләкин быелгы бәйгедә мәктәп коллективлары да катнашты һәм һәр районның җиңүчесе интерактив җиһаз белән бүләкләнде. Безнең районда бу бүләккә Яңа Кишет мәктәбе ия булды (Фирүзә Минҗанова турында язганда мин шуны истә тоттым да инде. Афәрин! Аның уңышларын күреп бөтен мәктәп, авыл халкы тартылды. Һәм җиңделәр!). Тик иң зур сөенеч әле бу гына түгел. Шушы ук мәктәп республика буенча беренче өчлеккә керде һәм мобиль класс-ка лаек булды! Ә монысы инде мәктәп өчен генә түгел, районыбыз өчен дә зур җиңү! Бу җиңүдә мәктәп директоры Фарсил Минҗановның хезмәте бик зур. Аның укучылары, авыл халкы алдындагы дәрәҗәсе шушы җиңүләргә алып килде.
— Быел мәктәбебездә ныклап төзекләндерү эшләре башланачак һәм бу җиһаз барлык укучылардан, укытучылардан мәктәбебезгә зур бүләк булачак. Без аны үзебезгә максат итеп куйдык һәм теләгебезгә ирешә дә алдык, — ди директор.
P.S. “Дәүләт хезмәтләре”нә килгәндә, миңа күп кешеләрнең фикерен ишетергә туры килде. Кемдер түләүләрне, барлык рәсми мөрәҗәгатьләрне турыдан–туры үзең барып башкару кулайрак дисә (күбесендә комиссия өчен дә түләргә туры килә, дип зарлана алар), икенчеләрен бу бер дә куркытмый — без комиссиягә киткән акчаны юлга гына да тотып бетерәбез, машинада барсаң да, автобуста да бушка түгел бит. Тиз, уңайлы, чират торасы юк, тәүлек буе түләп була, диләр. Һәр кешенең үз фикере һәм сайлау мөмкинлеге.
Гөлназ ГЫЙНИАТУЛЛИНА