Кышның яме кар белән

Кышның яме кар белән^
Сүзне кардан башлыйк әле. Яумый торды да, менә хәзер, кем әйтмешли, ишелеп төште. Шәһәр үзәгендәге кибетләр яннары боткага әверелде, асты боз әле, җитмәсә. Ике көн күз салып йөрим, көрәк тотып чыккан кеше күренми. Үзләренә табыш китерүчеләрне урамга чыгып елмаеп каршы алырга тиешләр кебек, югыйсә.
— Без кибет хуҗаларының һәркайсына бу турыда хатлар тараттык, — ди шәһәр башкарма комитеты җитәк-чесе Рафил Исмәгыйлев. — Төзекләндерү кагыйдә-ләре нигезендә алар түбәләрне кардан, боздан чистартырга, үз турыларындагы карны көрәп торырга тиеш. Җәй көне чисталык тәэмин итмәгән өчен берничә эшмәкәргә административ комиссия штраф салган иде. Хәзер дә шулай эшләми булмас, ахрысы.
Иртән торгач, беренче эш итеп ишегалдын, капка төбен көрәп чыгасың инде. Саф һавада үзе бер рәхәтлек бит. Зур урамда бер–ике әби иртәләрен капка төпләрен генә түгел, ул елларда бердәнбер булган тротуарның да карын көрәп торырлар иде. Кемдер кушканга түгел, савабы булсын дип.
Хәзер Арчада тротуарларны да трактор чистарта.
— Шәһәр, Айван, Төбәк–Чокырча, Күпербаш, Зур Бирәзә авыллары урамнарын кардан чистартуда 10 техника эшли, — ди “Жилкомбытсервис” ширкәте җитәкчесе Альберт Хәкимов. — Иртән 5тә чыгып китәләр, кичә 4тә кузгалдылар. Һава торышына карап инде, тоташ бураннар булганда тәүлек буе да эшләргә туры килә.
Ә кар бик кирәк үзе. Көчле салкыннарга кадәр уҗымнар ак юрганга төренде. Карлы кышны мул уңышка юрыйлар.
Бер елны Яңа елга кадәр кар яумады. Мәктәпләрдә сыннарны мамыктан ясап интектеләр. Быел да баштарак эшләр шуңа таба бара кебек иде. Безнең авылдашыбыз “Бу Ходайның рәхмәте киңдер, бер күлмәккә ике җиңдер”, — дип әйтергә ярата иде. Яуды кар, сыннар ясаганда бала–чага туңмаслык итеп җепшек көннәрен дә бирде. Бу көннәрдә мәктәпләр, балалар бакчалары яныннан үтүе күңелле. Кәҗәсе дә, сарыгы да, башкасы да урын алган анда.
Предприятие, оешмалар да бәйрәмгә әзерләнә. Район Мәдәният йорты, үзәк китапханә беренчеләрдән булып Яңа ел утларын кабызды. “Арча АТПсы” акционерлык җәмгыятенең зәңгәр чыршылары кичләрен тагын да зәңгәррәк булып балкый. “Арча МСОсы” ширкәте үзе бер манзара тудырган. Газ куллану хезмәте коллективы быел да боз шәһәрчеге төзегән. “Башка еллардагыдан калышмаска исәп”, — ди җитәкчесе Илшат Сабиров.
— Яңа Боз сарае кичләрен нинди гүзәл, — ди бер танышым.
Шәһәрнең Галактионов урамындагы паркында куелган чыршы да бик матур. Элеккеге юл идарәсе каршында кичләрен чыршылар балкып утыра. ЗУЭСныкы да башкалардан калышмый.
Билгеле, иң матур чыршы шәһәрнең үзәк стадионында булачак.
Ильяс ФӘТТАХОВ