Яңа елны яңа фатирда

Яңа елны яңа фатирда
Җиңү урамындагы 62нче йортта яшәүче алты гаилә быел яңа елны яңа фатирда каршы алачак
Соңгы елларда торак төзелеше буенча төрле программалар тормышка ашырыла башлады. Шуларның берсе тузган хәлдәге күпфатирлы торакларга кагыла. Татарстан Республикасы Президенты Рөстәм Миңнеханов инициативасы белән кертелгән әлеге программаның максаты–бик күп еллар элек төзелеп, хәзер тузган хәлгә килгән һәм якын–ти-рәдәгеләр тормышына куркыныч тудыручы йортларда яшәүчеләрне барлык уңайлыклары булган фатирларга күчерү. Мондый йортларда аз керемле гаиләләр, пенсионерлар яшәүне исәпкә алып, аларны да фатирлы итү максатыннан, Президентыбыз киңәше һәм тәкъдиме белән ташламалы кредит бирү, пенсионерлар өчен түләүне берникадәр вакытка кичектереп тору, варислары түләү мөмкинлеге дә каралган.
Ә безнең Арча районы бу программаны тормышка ашыруда да үз юлын тапты. Баштан ук шуны да искәртеп китәргә кирәк, бу әле республикада бары тик безнең районда гына кулланыла. Аның асылы–тузган күпфатирлы йортларда яшәүчеләр теләге буенча иске йортны сүтеп, бакча, гаражы өчен урын калдырып, шул нигезгә бер катлы йорт салу. Һәм бу вариант уңышлы да чыккан. Узган җомгада Җиңү урамындагы шундый йортны ачу тантанасы булды.
Тантанада район башкарма комитеты җитәкчесе Илшат Нуриев катнашты.
—Яңа елдан балалар гына түгел, хәтта без, өлкәннәр дә, могҗизалар көтәбез. Кайчак Кыш бабайга да ышанасы килә. Бу яңа ел әлеге йортка күчүче алты гаилә өчен могҗизага тиң. Алар өчен чын мәгънәсендә бәхет елмайды. Иске барак урынында нинди матур йорт калкып чыкты. Киләчәктә башкаларга да мондый мөмкинлекне кулдан ычкындырмаска кирәк. Сезгә Яңа елда яңа фатирда гаилә тынычлыгы, бәхетле, имин тормыш телим, — диде ул һәм хуҗаларга ачкыч белән Яңа ел бүләге тапшырды.
Илсур Мөхәммәтрәхимов, Венера Минзина, Раил Ганиев, Гөлшат Гарифҗанова, Наилә Галиәскәрова, Айрат Кәлимуллин гаилә-ләре 2015 елны яңа фатирда каршы алачак. Ә фатирлар бик уңайлы, якты, иркен, матур да килеп чыккан. Һәрберсендә шәхси газ казаны, газ плитәсе, ванна бүлмәсе.
—Йортларны, халык теләген исәпкә алып, тиз һәм сыйфатлы итеп эшләделәр. Бик тиз тоттылар. Җәйдә генә башлаганнар иде бит. Иң ошаганы шул булды: йорт-ны без теләгәнчә салдылар. Бакча, гараж өчен урын калдырылды. Үзебез гомер иткән нигездә үз күршеләребез белән яшәячәкбез, — ди Наилә Галиәскәрова.
—Наилә үзе башлап йөрде. Без барыбыз бертавыштан күтәреп алдык. Хәзер сөенеп туя алмыйбыз, — дип сүзгә кушылды Венера Минзина һәм төзүчеләргә рәх-мәтен белдерде.
Бу йорны төзүче “Энергосервис” ширкәте җитәкчесе Рамил Әхмәтгалиев та үз теләкләрен әйтте.
—Прораб Фәрит Закиров белән мастер Ислам Минһаҗев җитәкчелегендәге төзүчеләр тырышлыгы. Фатир хуҗаларының рәхмәте — алар хезмәтенә бәя, — диде ул.
Фатирларга узабыз. Хуҗаларының йөзләрендә шатлыклы елмаю балкый. Сөенечләрен уртаклашырга туганнары да килгән.
Менә Альбина белән Рәмис Әскәровлар фатиры. Альбинаның әтисе Илсур Мөхәммәтрәхимов белән Рәмиснең әнисе Лилия Әскәрова, туганнары да биредә.
—Балаларның өйләнешкәннәренә әле бер ел гына. Фатирлы да булдылар. Әни буларак, шулар өчен шатланып туя алмыйм. Исән–сау булганда түләп тә бетерерләр, Алла боерса. Тигезлектә яшәргә, яңа фатирга бәбәйләр алып кайтырга насыйп булсын, — диде Лилия.
Гөлсинә ЗӘКИЕВА