Хыяллар тормышка аша

Хыяллар тормышка аша
2014 елны ничек кенә дип бәяләсәләр дә, районыбыз өчен бик уңышлы, күңелле вакыйгалар белән тәмамлана ул. 30 декабрьдә шатлыкларыбыз белән уртаклашырга Татарстан Республикасы Президенты Рөстәм Миңнеханов та килде. Аны район башкарма комитеты җитәкчесе Илшат Нуриев каршы алды һәм озатып йөрде.
Билгеле булганча, республикада төрле өлкәләргә кагылышлы бик күп программалар эшли, аларның үтәлешен республика җитәкчесе ныклы контрольдә тота. Әле менә Арчага килгәч тә ул, беренче эш итеп, тузган торакны бетерү программасы буенча Җиңү урамында төзелгән 6 фатирлы йортны карады, Альбина һәм Рәмис Әскәровларның яңа фатирларында чәй эчеп, хәлләрен белешеп чыкты.
Иң зур тантана алда иде әле. 2011 елның июль аенда “Бердәм Россия” партиясенең региональ бүлеге Россия Федерациясе Дәүләт Думасына депутатлар сайлар алдыннан праймерз (алдан партиянең үз эчендә сайлау) үткәрде. Шул вакытта безнең районга республика Президенты Рөстәм Миңнеханов килде. Бирелгән наказлар арасында Арчада Боз сарае төзүне сораганы да бар иде. “Булдырырга тырышырбыз”, — диде Президент. Аның әйткән сүзендә тора торган кеше икәнлеген арчалылар яхшы белә.
Менә бүген районыбыз тарихына алтын хәрефләр белән язылачак көн килеп җитте. “Арча Арена” боз сарае беренче кунакларны кабул итә. Алар районның спорт ветераннары, бүгенге көндә районыбыз данын югары тотучы спортчылар, киләчәгебез — укучылар, балалар. Мәһабәт бина бәйрәмчә бизәлгән. Кунакларны ике яклап төзелгән хоккейчыларыбыз, “Бердәм Россия” партиясенең яшь гвардиячеләре (Арчаның 1нче урта мәктәбе), чемпионнарыбыз каршылый.
— Бүген безнең өчен тарихи, гаять истәлекле, дулкынландыргыч көн, — дип башлады тантанадагы чыгышын район башкарма комитеты җитәкчесе Илшат Нуриев. — Без бу көнне түземсезлек белән көттек, әлеге бинаны төзетүдәге ярдәмегез, ра-йонга һәрвакыт булышып торуыгыз өчен зур рәхмәт Сезгә, Рөстәм Нургалиевич!
— Республикада бу 39нчы Боз сарае, — диде Татарстан Республикасы Президенты Рөстәм Миңнеханов. — Кырыгынчысы Казанда булачак. Сезнең районга бик кирәк иде инде ул. Анда өлкәннәр дә, яшьләр дә, балалар да яратып йөрер дип ышанам.
Президент Арча шәһәренең елдан–ел матурлана баруын билгеләп үтте.
— Вертолет белән очканда бу үзгәрешләр бигрәк тә яхшы күренә, — диде ул. — Мин Арчада җиде ел эшләдем, элек ничек булганын, бүгенгесен яхшы беләм.
Президент Боз сараена инвентарь алу өчен 200 мең сумлык сертификат бүләк итте.
Әлеге искиткеч бинаны дөньяга тудыручы “Фортэкс” ширкәте генераль директоры Рәүф Галләмов Боз сараеның чын хуҗалары — балаларга символик ачкыч тапшырды.
Якташыбыз, Арчаның В.Ежков исемендәге 1нче урта мәктәбен тәмамлаган, хәзерге вакытта Татарстан Республикасы Дәүләт Советы депутаты Рафис Борһанов ерактагы мәктәп елларын искә алды. 1974 елда әлеге мәктәпнең хоккей командасы “Алтын алка” призына үткәрелгән ярышларда беренче урынны яулаган булган. Рафис Тимерханович шул вакытта төшкән фоторәсемне дә зурайтып алып кайткан. “Кырык ел элек киләчәктә Арчада шундый Боз сарае булыр дисәләр, моңа берәү дә ышанмас иде”, — диде ул.
Тантанада Россия Дәүләт Думасы депутаты Илдар Гыйльметдинов, Татарстан Республикасының урман хуҗалыгы министры Алмас Назиров, Татарстан Республикасының яшьләр эшләре һәм спорт буенча министры Владимир Леонов катнашты.
Тантаналы өлешеннән соң спортчылар “эшкә” дә кереште. Боз сарае тарихында беренче хоккей уйнау бәхете Утар Аты мәктәбе һәм Арчаның 5нче гимназиясе егетләренә эләкте. Бу бик табигый хәл, чөнки әлеге командалар хоккейчылары күп еллардан бирле спортның бу төрен районда әйдәп баручылар арасында. Ә бозга беренче алканы республиканың легендар хоккейчысы Геннадий Маслов ташлады.
Мондый ярышлар киләчәктә күп булыр әле. Фигуралы шуу белән шөгыльләнергә теләүчеләргә яшел юл ачыла. Безнең якташыбыз Илдар Сибгатуллинның кызы Резеда Илдаровна Казан шәһәрендә фигуралы шуу буенча тренер, ул Арча кызлары һәм егетләрен дә өйрәтергә ризалык биргән.
Тантана барышында ветеран спортчыларыбыз белән дә фикерләшеп алдык.
— Район өчен бик зур вакыйга бу, — диде педагогика көллиятендә озак еллар спорт кафедрасын җитәкләүче, спортны үстерү өчен янып йөрүче Бари Бакиров. — Соңгы вакытта яшьләребезнең сәламәтлеге бик әлләни булмау борчый. Спорт кешене гомере буе озата барырга тиеш.
— Без кеше бакчаларына боз катырып шунда уйнап үстек, — ди “Арча” спорт комп-лексы директоры Ренат Гәрәев. — Кайда буш урын бар — шунда хоккей мәйданчыгы ясадык. Яңа елдан соң урамга чыгарылып ташланган чыршылар кәшәкәгә әверелә иде. Бүгенге яшьләргә теләк бер — кадерен белегез, хәрәкәттә бәрәкәт икәнен онытмагыз!
Аннан, мондый спорт корылмалары үзе бер тәрбия чарасы да, биредә урамдагы кебек тәртипсезлекләр була алмый инде.
Ильяс ФӘТТАХОВ