Бакча түләүләре артты

Бакча түләүләре артты
Район мәгариф идарәсе мәгълүматларына караганда, 2015 елның 1 гыйнварыннан балалар бакчаларына түләүләр 12 процентка артты.
Моңарчы әти–әниләр Арча бакчаларына 2210 сум түләде. 1 гыйнвардан ул 2482 сум булды. Бакчага түләүләр 272 сумга артты.
Авыл бакчаларына түләү 1993 сум иде, ел башыннан ул 2239 сумга менде. Түләү 246 сумга артты.
Арчаның шәрык өлешендәге заманча “Бәләкәч” бакчасына түләүләр 2849 сумнан 3198 сумга күтәрелде. Түләү 349 сумга артты.
Арча станциясендәге яңа “Шатлык” бакчасына түләүләр Арчаның башка бакчаларындагы кебек 2210 сум иде, 1 гыйнвардан ул 2482 сум тәшкил итә.
Гомумән алганда, 2015 елның 1 гыйнварыннан әти–әниләр һәр балага ай саен Арча бакчаларына — 2482 сум, авыл бакчаларына — 2239 сум, заманча “Бәләкәч” бакчасына 3198 сум түлиячәк. Авыл бакчалары 9 сәгатьлек эшләүчеләр категориясенә керсә, Күпербаш белән Божа бакчалары 10,5 сәгать эшләүчеләр рәтендә санала, шунлыктан аларда түләү 2257 сум.
Бакча түләүләренә субсидияләр турында район социаль яклау бүлеге каршындагы социаль түләүләр үзәге мөдире Лилия Җәләлиева болай дип аңлата:
— Бакча түләүләренә 2007 елдан компенсация һәм 2014 елдан яңа төр субсидия бирелә. Компенсация Татарстанда уртача бакча түләвеннән чыгып исәпләнә: беренче балага 20 процент, икенчегә — 50, өченче балага 70 процент. 2015 елның 1 гыйнварыннан уртача бакча түләве Арчада 155 сумга, ә авылларда 138 сумга артты. Ул хәзер Арча шәһәрендә 1401 сум, ә авылларда 1214 сум. Узган ел 1246 сум һәм 1076 сум иде. Бу компенсацияне алу өчен баланың бакчага йөрүе, әгәр дә гаиләдә башка балалар бар икән, аларның я бакчага йөрүе, я мәктәптә укуы, я мәктәпне тәмамлаган булса, кайда да булса укуын (23 яшькә кадәр) дәвам итүе шарт булып тора. Уку йортыннан белешмә сорала. Мәсәлән, гаиләдә өч бала бар икән, кечкенәсе бакчага йөрсә, калган икесе мәктәптә укыса, ул вакытта бакчага йөргән балага, өченче бала буларак, 70 процент компенсация каралган. Тагын бер мисал. Ике балалы гаиләдә олысы бакчага йөрсә, кечкенәсе өйдә утырса, ул вакытта бакчада тәрбияләнгәненә беренче балага каралган 20 процент кына компенсация бирелә. Өченче мисал. Олысы институтта укый, ди. Ә кечкенәсе бакчага йөри. Төпчегенә икенче балага каралган 50 процент компенсация исәпләнә. Баласы бакчага йөргән һәр әти–әни күпме компенсация алачакларын исәпләп чыгара ала. Бу компенсация баласы бакчага йөргән барлык гаиләләргә дә бирелә.
Узган ел гамәлгә кергән субсидия гаилә кеременә карап исәпләнә. Монысында быел үзгәрешләр юк. Әгәр дә әти яки әни беркайда да эшләми икән, ул гаиләгә субсидия каралмаган. Гаиләнең һәр кешесенә кимендә 20 мең сум керем булса, шулай ук аларга субсидия бирелми.
Субсидияләрне чигергәч, бакчага түләүләрнең күп-мегә артуы баласы бакчага йөргән әти–әниләр өчен кызыклы сорау. Мин моны үзебезнең гаилә мисалында аңлатырга тырышып карыйм. Социаль түләүләр үзәге мөдире Лилия Җәләлиева бакчага йөрүче ике балага күпме түлия-чәкне якынча исәпләп күрсәтте. Узган ел без ай саен ике балага 4420 сум түләп бардык. Икесенә бергә ай саен 1900 сум 17 тиен субсидия кереп барды. Быел барысы 4964 сум түләргә туры киләчәк. Якынча 5 мең сум. Безнең гаилә кереме һәр кешегә 15 мең сумга кадәр. Быел, Алла бирсә, һәр айны ике балага 2159 сум 34 тиен субсидия алачакбыз. Узган елга караганда субсидия 259 сумга арткан. Арча бакчаларына арткан түләү (272 сум) белән чагыштырып карасак, безнең гаилә ике балага узган елга караганда 12–13 сумга күбрәк түлиячәк.
Румия НАДРШИНА