Алар бәйрәмгә ямь өстәде

Алар бәйрәмгә ямь өстәде
Быел шәһәребез Яңа ел кичләрендә аеруча матур. Кем белән генә сөйләшсәң дә, шул фикерне әйтә. “Яңа ел бизәкләре” конкурсы комиссиясе әгъзалары да шул фикердә. Күп предприятиеләр, учреждениеләр, оешмалар, уку йортлары, мәктәпкәчә учреждениеләр коллективлары бәйрәмгә ямь өстәү өчен көчләрен кызганмаганнар.
Арча “МСОсы” ширкәте матур, сыйфатлы, зәвыклы итеп төзи, аларның маркасы югары. Быел менә Яңа ел бизәкләре белән дә шаккатырдылар. Капка төпләрендә күңел җылысы биреп эшләгән боз шәһәрчеге, төрле утлар белән балкып чыршы утыра, хозурлык дөньясы. Территорияне иң яхшы Яңа ел би-зәве буенча беренче урынны алу — лаеклы бәя!
“Водоканал–Сервис” ширкәте һәр елны ниндидер бер үзенчәлек белән шаккатыра. Быел капкадан керүгә бүре башы тотып утыручы кәҗә белән сарыкка тап буласың. Кем әйтмешли, җаннары гына юк инде менә! Чыршылары станциядән үк күренеп үзенә тартып тора. Аларга — икенче урын!
“Арча АТПсы” җитәкчесе Рүзәл Гәрәев пөхтәлекне, гүзәллекне аеруча ярата. Җәй көннәре бөтен территорияләре чәчәк эчендә. Элегрәк Яңа ел бизәүләрендә дә үрнәк иде алар. Быел менә зәңгәр чыршыларын зәңгәр утлар белән бизәп нинди гүзәллек тудырганнар! Алдагы елларда өченче урын белән генә калмаслар әле, кешеләре ул түгел.
Бюджет оешмалары арасында беренче урын район Мәдәният йортына, икенче урын “Арча” балалар–яш-үсмерләр спорт мәктәбенә, өченче урын социаль яклау бүлегенә бирелде.
Авыл җирлекләре арасында Шушмабаш авыл җирлеге җиңүче дип танылды.
Мәгариф учреждениеләре арасында беренче урында Арчаның беренче урта мәктәбе, икенче урында 5нче гимназия, өченче урында Шушмабаш урта мәктәбе.
Арчаның 9 номерлы “Шатлык” балалар бакчасы мәктәпкәчә мәгариф учреждениеләре арасында махсус призга лаек булды. Бу яңа коллектив яңа елны үз территориясендә әкият дөньясы тудырып каршылады, сыннар — чын сәнгать әсәре, һәркайсының исеменә кадәр бар.
“Жилкомбытсервис” ширкәте Арча шәһәрендәге үзәк чыршыны матур итеп бизәгәне өчен шулай ук бүләккә лаек булды. Әлеге коллектив быел шәһәр урамнарын үзенчәлекле итеп бизәде.
Комиссия Арчаның 2, 7нче, Носы, Пөшәңгәр мәктәпләре, 2,8,10нчы балалар бакчалары, педагогика көллияте, балалар сәнгать мәктәбе, үзәк китапханә, тернәкләндерү үзәге, РЭС, “Арча нефть продуктлары” акцио-нерлык җәмгыяте, “Энергосервис” “Тайд–Фойл”, “Круг” (станциядәге кибете), шәхси эшмәкәр Минхәировның “24 часа” кибетенең Яңа ел бизәлешен уңай бәяләде.
Ильяс СӘХӘПОВ