Яңа елга — миллион!

Яңа елга — миллион!
Районда Яңа елга иң зур бүләк алучылар, мөгаен, йорт салу өчен дәүләттән субсидия алучылар булгандыр. “2014–2017 елларга һәм 2020 елга кадәрге чорга авыл биләмәләренең тотрыклы үсеше” федераль максатчан программасы буенча Арча районында 34 гаилә Яңа ел алдыннан шундый зур бүләккә ия булды. Аларга декабрь ахырында барысы 33 миллион сум акча бирелде.
— Узган ел 18 гаиләгә генә күчкән иде. Быел, күргәнегезчә, субсидия алучылар шактый артты. 2015 ел башына әлеге программа буенча исәптә торучылар саны — 122. Аларның 80е гражданнар, 42се яшь гаилә һәм белгечләр категориясендә. Программа буенча субсидия авылда яшәүче һәм эшләүче торак шартларын яхшыртуга мохтаҗ яшь гаиләләргә һәм белгечләргә бирелә. Бу турыда төгәлрәк район сайтыннан укып белергә яки безгә 3–16–44 телефонына шалтыратырга мөмкин, —ди район башкарма комитеты белгече Сания Гатауллина.
Субсидия бирелгәндә өстенлек икесе дә авыл хуҗалыгында эшләүче күп балалы һәм йортларын берникадәр төзергә өлгергән гаиләләргә бирелә.
Дөрестән дә, Яңа елга субсидия алган авылдашларым (Наласа) инде йортларын төзеп бетереп киләләр.
— Без исемлеккә 2009 елда ук язылдык, өметне өзгән идек инде,—ди “Игенче” ширкәтендә хисапчы булып эшләүче Рәмзия Сираҗиева, шатлыгын яшермичә. Арчадан килеп йортны фотога төшереп киткәч тә, безнең күңелне күреп кенә йөриләрдер, дип уйладык. Бурычка батып булса да йортны түбә астына кертеп бетергән идек инде.
—Әти–әниләргә, туганнарга рәхмәт, алар бик терәде, — дип сүзгә кушылды гаилә башлыгы Илнур. Яңа ел алдыннан һич көтелмәгән зур бүләк булды бу! Җитәкчеләргә авыл яшьләрен онытмаулары өчен барыбыз исеменнән дә зур рәхмәт әйтәсем килә. Безнең кебек гади кешегә дә бәхет елмаер икән! Миллионнан артык акча күчерделәр. Әле җәй көне туган өченче кызыбызга тагын бирергә тиешләр. Бурычларыбызны, кредитларны түләдек. Осталар чакыртып өйнең эчен ясата башладык. Июльгә кадәр эшне бетереп өйне рәсмиләштерергә кирәк, шуңа тырышабыз.
Без дә субсидия алучыларга төзегән йортларының игелеген күреп, балаларын тигезлектә үстереп, гаилә учакларының кадерен белеп бәхетле яшәүләрен телибез. Исемлектә торучыларның башкаларына да өметләрен өзмичә, туган җиргә тугрылык саклап яшәргә һәм, әлбәттә, шундый ук бәхеткә ирешүләр насыйп булсын.
Исрафил
НАСЫЙБУЛЛИН