Бер генә тапкыр юатачаклар

Бер генә тапкыр юатачаклар^
Яңа ел бәйрәмнәре кемнәр өчендер озакка сузылса да, бу терлекчеләргә кагылмый. Без район авыл хуҗалыгы һәм азык–төлек идарәсе җитәкчесе Айдар Габбасов белән 1 гыйнварда иртән шактый фермаларда булдык.
Күпербаш, Югары Мәтәскә, Мөндеш, Иске Кырлай, Яңа Кырлай фермаларының һәркайсында терлекләргә азык кертелгән, сыерлар савылган, тирес чыгарылган. Иске Кырлай белән Яңа Кырлайда, билгеле, сыерлар һәрвакыт чиста була.
— Бәйрәм көннәрендә терлекчеләргә икеләтә түлибез, — ди “Кырлай” ширкәте җитәкчесе Илшат Шакирҗанов.
Җитәкчеләрне терлекчеләр арасында күрүе күңелле. “Арча” ширкәтенең яңа директоры Рифкать Камалетдинов, һәр фермада булып, терлекчеләрне бәйрәм белән котлап, бүләкләр тапшырып чыкты. Кәҗәсе түгел, мәзәге кыйммәт, диләр бит. Шулай дәвам итсен, дип теләргә генә кала.
10 гыйнварда үткән киңәшмәдә район башкарма комитеты җитәкчесе Илшат Нуриев терлекчелек өлкәсендә күрше районнардан калышмаслык итеп эшләргә дигән бурыч куйды. Күршеләр яңа комплекслар төзи, баш санын арттыра, безгә дә калышырга ярамый.
Район авыл хуҗалыгы һәм азык–төлек идарәсе җитәк-чесе Айдар Габбасов терлекчелектә 2014 ел йомгакларына анализ ясады.
2015 елның 1 гыйнварына район хуҗалыкларында мөгезле эре терлекләр саны 515 башка артты, “Ватан” ширкәте — 135, “Северный” ширкәте 110 башка арттырды.
Узган ел 2143 тонна сөт күбрәк җитештерелде. “Ак барс” агрокомплексы” ширкәтендә — 636, “Игенче”дә 282 тонна артты. “Аю” ширкәте генә киметте, башкаларда арту ягында булды.
Бер сыердан сөт савып алуны “Арча” ширкәте — 1367, “Татарстан” ширкәте 1080 килограммга арттырды.
Сөрүлек җирләренең 100 гектарына исәпләгәндә “Ак барс” агрокомплексы”нда 887 килограмм (район буенча 416 килограмм) сөт савылды. “Курса МТСы”нда — 614, “Ватан”да 570 килограмм. “Арча” ширкәтендә — 223, “Игенче”дә — 299, “Нива”да 363 килограмм гына.
Район буенча 209 бозау күбрәк алынды. “Арча” ширкәте 288 башка артык алды. “Ак барс” агрокомплек- сы”нда — 240, “Татарстан”да 102 башка ким.
Хуҗалыкларда узган ел 429 терлек күбрәк үлгән. “Арча”да — 257, “Вамин–Мәрҗани” ширкәтендә 115 терлек якты дөньядан вакытсыз китеп барган.
Хуҗалыкларда 672 ат бар. 2013 елга карата 12 башка күбрәк. “Ак барс” агрокомплексы”нда 10 башка арткан, 112гә җиткән. Иң күп ат “Вамин–Мәрҗани”дә — 182, “Нива” ширкәтендә — 2, “Игенче”дә — 5.
Терлекчелек өлкәсендә эшләүчеләр өчен кызыксындыру чаралары да билгеләнде.
Ай саен йомгак ясалып, җиңүче хуҗалык, ферма коллективлары күчмә кубоклар белән бүләкләнәчәк. Иң яхшы нәтиҗәләргә ирешкән өч сыер савучы, өч терлек симертүче бүләкләр алачак. Иң соңгы урынга калганнарга юату призлары биреләчәк. Дөрес, соңгысы бер генә тапкыр тапшырыла, чөнки алга китәргә омтылмаучыны күпме юатып була?
Ильяс ФӘТТАХОВ