Пенсия фонды бинасы өч катлы булачак

Пенсия фонды бинасы өч катлы булачак
Арча һәм Әтнә районнары буенча Пенсия фонды идарәсендә бинаны үзгәртеп кору буенча җәмәгать тыңлаулары үткәрелде. Анда Татарстан Республикасы буенча Пенсия фонды бүлекчәсенең ныклап төзекләндерү бүлеге җитәкчесе Наилә Перова катнашты.
Пенсия фонды идарәсе җитәкчесе Рузия Илсуровна районда халыкка хезмәт күрсәтүче әлеге административ бинаның әһәмияте турында сөйләде.
Идарәдә 55 хезмәткәр барысы 53 мең 600 кешегә хезмәт күрсәтә. Административ бина 2003 елда төзелде. Әмма аның зурлыгы бүгенге көн таләпләренә җавап бирми.
Үзгәртеп коруны үткәрү буенча проект документлары эшләнгән. Казаннан кайткан бүлек җитәкчесе Наилә Перова үзгәртеп кору проекты турында сөйләде.
— Арча һәм Әтнә районнары буенча Пенсия фонды идарәсенең административ бинасы Россия Федерациясе милке булып тора, — дип сөйләде ул. — Дәүләт милке белән идарә итү буенча Федераль агентлыктан бинаны үзгәртеп коруга рөхсәт алынды.
Якын киләчәктә ике катлы бина өч катлы булачак. Халыкны кабул итү бүлмәләре киңәйтеләчәк, бина “Уңайлы мохит” дәүләт программасы таләпләренә туры китереп җиһазланачак, кли-ентлар белән очрашулар үткәрү залы булачак һ.б. Бүлмәләр, холл, зал, коридорлар заманча, матур итеп эшләнәчәк. Пенсия фондына килгән кешегә уңайлы, рәхәт булсын өчен уйланылган проект бу.
Җәмәгать тыңлауларында катнашучылар Арчадагы Пенсия фонды административ бинасын үзгәртеп кору мәсьәләсендә үз фикерләрен әйттеләр.
— Өлкәннәр өчен районда “Өченче буын университеты” эшли, — дип сөйләде “Пенсионерлар берлеге” җирле бүлекчәсе рәисе Сания Камалетдинова. — Әмма җыела башлагач, дәресләрне кайда үткәрик икән, дип уйлана башлыйбыз. Менә бу бинада халык белән очраша торган аерым зал булса, без бик рәхәтләнеп шунда “Өченче буын университеты” дәресләрен үткәрер идек.
Район ветераннар советы рәисе Альберт Җамалиев өлкәннәр өчен Пенсия фонды бинасында очрашу өчен уңайлыклар булса, әйбәт булыр иде дигән фикерне әйтте.
Район башкарма комитетының инфраструктура үсеше бүлеге җитәкчесе Рөстәм Хәбибуллин:
— Пенсия фонды идарәсенең административ бинасы Арча шәһәренең үзәгендә урнашкан, — дип сөйләде. — Ул шәһәрне матурлап торучы һәм халыкка уңайлы объект булырга тиеш. Бинаны үзгәртеп кору проекты бик әһәмиятле һәм аны тормышка ашырырга кирәк.
Бинаны үзгәртеп кору буенча әйтелгән фикерләрнең барысы да уңай иде.
Сорау туа: бина кайчан үзгәртеп корылачак? Татарстан Республикасы Пенсия фонды бүлекчәсенең ныклап төзекләндерү бүлеге җитәкчесе Наилә Перова: “Үзгәртеп кору өчен әлегә акча бирелмәде”, — диде.
Административ бинаның Россия Федерациясе милке булуы һәм Дәүләт милке белән идарә итү буенча Федераль агентлыкның бинаны үзгәртеп коруга рөхсәт бирүе эшне озакка сузмаслар, дигән өмет уята.
Румия НАДРШИНА