2015 елны малай белән башладык!

2015 елны малай белән башладык!
Гыйнвар башында үзәк хастаханәнең бала тудыру бүлегендә булдым.
Акушер Айгөл Закирова:
— Бүген бәбиләргә бик бай булмасак та, сертификатлар буенча гыйнвар уңышлы булырга охшаган, — дип каршы алды.
Яшь белгеч Айгөл, Казан медицина көллиятен тәмамлап, 2011 елда Арча бала тудыру бүлегендә эшли башлаган.
— Арча кызы мин, — ди. — Арчаны яратам. Безнең белән укыган кызларның кайберләре Казанда калды. Зөлфия, Алсу Арчага кайтты. Хезмәтем ошый. Яшь әниләргә авыр вакытта ярдәм итәсе килә.
— Тупаслык күрсәтмисезме соң? — дип сорыйм.
— Ю-у-ук, үзләре кычкыралар әле, — ди Айгөл елмаеп.
Төрле палаталарда нибары ике яшь әни ята. Аның берсе 28 декабрьдә үк бәбиләгән. Бәйрәм төнен бала тудыру бүлегендә үткәрергә туры килгән. Матбугат кешесе белән сөйләшергә теләмәгәч, янына кермәдек. Ә менә 1 гыйнварда сәгать 8 тулып 15 минутта бәби тапкан Тәнзилә Төхвәтуллинаның хәлен белергә насыйп булды.
Елмаеп каршы алды ул безне. Улы Аяз янәшәсендә иде.
— Исемне кем тапты? — дип сорыйм.
— Әтисе инде, — дип елмая яшь әни.
Наласа кызы Тәнзилә Кәче егете Айдарга кияүгә чыккан. Үрнәк агросәнәгать көллиятендә пешекче–кондитерлыкка укыган. Иптәше Казанда юлчы булып эшли.
— Аяз минем әтинең (Редафис) туган көнендә туды, — ди Тәнзилә. — Әти мәрхүм инде.
— Әтиегезгә ничә яшь тулган булыр иде?
— 55 яшь.
Тәнзилә Яңа елга кадәр бәби табармын, дип уйлаган. Әмма Аяз ашыкмаган, Яңа елның беренче көнен көткән.
— Күңел сизгән кебек үз әниемне дә (Тәгыйлә) Яңа ел каршыларга чакырган идем, — дип сөйли ул. — Башта табын әзерләдек. Табын артында юньләп утыра да алмадым. Төнлә авырта башладым. 12 тулып киткәч, хастаханәгә әзерләнә башладык. 1 тулганда монда кердем. Авыртуы кыен булса да, баланы авырдан тапмадым.
Янәшәсендә тәҗрибәле акушер Резедә Садыйкова булган. Сменасы тәмамланып, өенә кайтып киткән, соңыннан үзе белән сөйләштек. Казанда эшләп кайткан. 2004 елдан монда.
— Бала табу җиңел булмый инде ул, — диде ул. — Бик җаваплы эш. Яшь әниләр бәбиләгәндә һәрвакыт янәшәдә югары белемле акушер–гинеколог була. Бу юлы Галия Намусовна иде.
Ә акушер Нурия Рәхмәтуллина Яңа ел төнендә эшләгән. Тәнзиләне ул кабул иткән.
— 31 ел акушер булып эшлим, — дип сөйли ул. — 4 елга бер тапкыр Яңа ел төнендә эшләргә туры килә. Авырсынмыйм. Эш дип кабул итәм. Гаиләм дә шуңа ияләнде. Быелгы Яңа ел төне тыныч үтте. Тәнзиләне 1 тулганда кабул иттек. Бәбигә акыллы итеп авыртты.
— Акылсыз итеп авырту ничек була?
— Төрлесе бар. Әмма бәбигә авыртуны гаепләп булмый. Авырту бит ул.
— Акушер буларак, нинди теләкләрегез бар?
— Әниләр кызларын, матур киендереп кенә түгел, бала табарга, әни булырга тиешлекләрен әйтеп, моның табигый хәл булуын аңлатып, миһербанлы итеп тәрбияләсеннәр иде. Яшьләр белән бик авыр.
...Яңа елны малай белән башлап җибәрдек. Гадәттә малайларны яраталар. Сарык (кәҗә) елы уңышлы булыр, Алла боерса!
Румия НАДРШИНА