Берәү дә читтә калмасын

Берәү дә читтә калмасын
Сугыш ветераннарын торак белән тәэмин итү буенча федераль программа нигезендә районда яшәүче сугыш ветераннарына һәм аларның тол калган хатыннарына Арчадан өр-яңа фатирлар бирелде.
— Барлыгы 706 кеше яңа торактан ачкычлар алды. Тагын 4 кеше чиратта тора, — ди халыкны социаль яклау бүлеге юрисконсульты Гүзәл Фазылҗанова.
Шул ук вакытта сугыш ветераны хатыны булып та рәсми рәвештә язылышмыйча яшәгәнлектән яки башка сәбәпләр белән фатир бирелмәгән, әмма торакларын төзекләндерүдә мохтаҗлык кичергәннәр дә бар әле. Район башкарма комитеты җитәкчесе Илшат Нуриев аларның берсен дә читтә калдырмыйча, Бөек Җиңүнең 70 еллыгы уңаеннан бәйрәм бүләге ясап, һәрберсенә тиешенчә ярдәм күрсәтүне оештырды.
Районда шушы исемлеккә 9 кеше кергән. Алар яшәгән торакларны төзекләндерү шәһәрдәге төрле оешмаларга бүлеп бирелгән. “АрскПласт” ширкәтенә Арчада яшәүче сугыш ветераны Салих Гарифуллин фатирының эчен төзекләндерү, балконын ясау, тәрәзәләрен алыштыру, “Жилкомбытсервис” ширкәтенә Арча станциясендә улы белән генә яшәүче сугыш ветеранының тол калган хатыны Фатыйма Гыйльфанованың өенә су кертү, канализация үткәрү, кайнар су белән тәэмин итү, бәдрәф эшләү йөкләнгән.
— Йорт эчендәге эшләрне озакка сузмый башлыйбыз. Ә менә урам яктагыларына кар беткәч тотынырга планлаштырабыз, — ди “Жилкомбытсервис” ширкәте җитәкчесе Альберт Хәкимов.
Ташкичү авыл җирлегендә дә шундый ике кеше бар икән. Рәсми рәвештә язылышмаганлыктан фатир бирелмәгән сугыш ветеранының тол калган хатыны Ашытбашта яшәүче Пиконай Спиридонованың тәрәзә рамнарын, электр чыбыкларын, түбәсен алыштырырга кирәк.
— Бу эшне безгә башкарасы, — ди “Арча МСО”сы ширкәте җитәкчесе Зиннур Гарифуллин. — Барып кайттык. Ул кышкы чорда Казанда кызында яши, авылга җәйгә генә кайта икән. Кайтсалар, безнең белән элемтәгә керүләрен сорап, күршеләренә әйтеп калдырдык. Мөмкинлек туу белән бу эшләрне башкарып чыгачакбыз.
Шушы ук авыл җирлегеннән Иске Ашытта улы белән генә яшәүче шулай ук сугыш ветеранының тол калган хатыны Мәдинә Шәрәфиевага да ярдәм күрсәтеләчәк. Яңа Кенәр торак–коммуналь хуҗалыгы санитар челтәр белән канализация үткәреп, кайнар су белән тәэмин итәчәк.
Наласадан сугыш ветеранының тол калган хатыны Рәхилә Кәлимуллинаның йортын төзекләндерүгә “Арча АТП”сы ширкәте алынган.
— Янына барып, очрашып, сөйләшеп кайттык. Аның теләге буенча декабрь ахырында ук газ плитәсе алып барып урнаштырдык. Бик сөенде, рәхмәтләр укып калды. Хәзер планда янкорма һәм веранданы ныклап төзекләндерү, йортын тышлау, түбәсен алыштыру, кайнар һәм салкын су кертү, санитар челтәр белән канализация үткәрү, — ди җитәкчесе Рүзәл Гәрәев.
Иске Кырлай авыл җирлегеннән гаиләләре, балалары булмаган, бер ялгызы яшәгән 80 яшьтән өлкәнрәк тыл ветераннары да читтә калмаган.
— Хәрби комиссар белән бергәләп өйләрендә булдык, — ди авыл җирлеге башлыгы Фәргать Сираҗетдинов. — Түбән Мәтәскәдән Галия Дәүләтбаеваның коймасын төзекләндерергә, Җәүһәрия Камалиева йортына су кертергә, канализация үткәрергә, өйдә бәдрәф эшләргә кирәк, ә Иске Иябаштан Мөслимә Ягафарова кое казып би-рүне сорый.
Бу эшләрне “Икстрой”, “Энергосервис”, “Водоканал-Сервис” ширкәтләре башкарачак.
Ә менә “Арча КСМ”ы ширкәте Яңа Кырлайдан сугыш ветеранының тол калган хатыны Һаҗәр Гатиятуллинага ярдәм күрсәтәчәк. Һаҗәр апа янына ширкәт җитәкчесе Рафаэль Муллагалиев һәм Яңа Кырлай авыл җирлеге башлыгы Газинур Сәфәров белән бергә бардык. Тыл ветеранына 88 яшь. Күзләре күрми, колаклары ишетми, үзе урын өстендә ята икән. Безнең янга үзе дә пенсия яшендәге кызы Асия апа чыкты. Бик тырышлар булырга охшый. Икесе дә олы яшьтә булуларына карамастан, әле дә сыер асрыйлар, умарта да тотканнар. Ни өчен килүебезне белгәч, Асия апа:
— Безнең өй 1959 елны төзелгән. Яшәмәслек түгел әле. Аллага шөкер, су, газ кергән. Менә фундамент кына начарланды. Идән астындагы бәрәңге өши, — диде.
Рафаэль Муллагалиев, йортны һәрьяктан карап чыгып, нәрсәләр эшләргә кирәклеген дә билгеләде.
— Февральдә эшне башларга планлаштырабыз, —диде ул. — Монда түбәне төзекләндерергә, түшәмнәрне карарга, веранда төзергә, койма корырга кирәк. Фундаментка соңрак тотынырга туры киләчәк. Җиңү бәйрәменә кадәр барысын да төгәллибез.
Чыннан да, әлеге эшләрнең кайберләренә хәзер үк тотынып булса, кайберләрен язга чыккач кына башкарырга мөмкин. Ничек кенә булмасын, һәр оешманың да мондый изге хезмәткә җаваплы караячагына ышанабыз. Без дә, үз чиратыбызда, бу мәсьәләгә кире әйләнеп кайтып, эш барышын газета битендә яктыртачакбыз әле.
Гөлсинә ЗӘКИЕВА