Үзебезнеке арзанга төшә

Үзебезнеке арзанга төшә
Бик кызык кешеләр без. Булган әйберне юк итәбез дә, күпмедер вакыт үткәч, эх, ялгышканбыз дип, башны кашыйбыз. Моңа мисаллар адым саен. Берзаман суканы уйлап табучыны кешелек тарихында булган сугышлар китергән зыяннан зуррак зыян салучы дип игълан иттеләр. Сукалар күп хуҗалыкларда металл ватыклары итеп озатылды. Бүген үкенәләр инде, чөнки сукаланмаган басуларны чүп басты.
Ата–бабаларыбыз мирасы белән сак булырга кирәк. Чит ил техникасы әйбәт, җитештерүчәнлеге югары, трактор, комбайн кабинасына тузан да, тавыш та керми. Тик менә дөньялар ниндигә әйләнде, чит илнеке дә туза, запас частьлар кирәк. Ә алар бик кыйммәт, бирми башларга да мөмкиннәр.
Бәхеткә, бүген районда шундый авыр вакытларда таяныч булырлык предприятиеләр бар. Терлекчелеккә хезмәт күрсәтүче Мөндеш “сельхозтехникасы”н саклап калган Төхвәтуллиннарга бөтен республика рәхмәт укый.
Арчада 1930 елда “МТМ” (машина–трактор мастерское) дигән оешма төзелә. “МТС”ларда булган техниканы ремонтлау өчен. Быел юбилее да әле аның. 85 ел эчендә төрле исемнәр йөртә, әмма җисеме үзгәрми. Бүген ул “Арча төбәге үзәге” сәүдә йорты” ширкәте дип атала.
— Урал, Идел буе округларына кергән 24 өлкәдә барлык дизель двигательләренә гарантия чорында хезмәт күрсәтәбез, — ди директор Даниял Фәсәхиев. — Бездә бөтен төр дизель двигательләре ремонтлана, теләгән кеше әзер двигательне алыштырып китә ала. Тапшыру тартмалары да ремонтлыйбыз.
Югары сыйфат, югары технология, махсус станоклар, стендлар чит ил техникасы детальләрен торгызырга мөмкинлек бирә. Казан, Мәскәү, Чиләбе, Барнаул галимнәре, белгечләре белән тыгыз элемтәдә эшлиләр.
Янәшәдә генә тагын бер үзенчәлекле предприятие — “Ремтех” ширкәте урнашкан.
— Чит ил техникасы булган хуҗалыклар да безгә бик теләп килә, — ди җитәкче Әнәс Әхмәтгәрәев. — Подшипникларны, башка частьларны торгызабыз. Безнең районның “Вамин–Мәрҗани”, “Игенче”, “Татарстан”, “Курса МТСы”, “Ак барс” агрокомплексы”, “Кырлай” ширкәтләре белән элемтәләр тыгыз.
15 гыйнварда район авыл хуҗалыгы һәм азык–төлек идарәсе җитәкчесе Айдар Габбасов хуҗалыклар җитәкчеләре, баш инженерлар белән шушы предприятиеләрдә булдылар, соңыннан язгы чәчүгә әзерлек турында сөйләш-теләр.
— Без узган көз үк нинди запас частьлар кирәклеген ачыкларга киңәш иткән идек, — диде Айдар Габбасов. — Аларны иске бәяләр белән алып була иде. Әмма моңа игътибар итмәүчеләр дә булды, хәзерге бәяләрне үзегез беләсез. Бүген булган предприятие-ләрдә бәяләр әле дә 10 тапкырга кадәр арзан.
“Кырлай” ширкәте бәяләр үзгәргәнче 3 “МТЗ” тракторы, “КамАЗ”лар алып калган.
Быел һава шартлары техника ремонты өчен уңай тора, ачык һавада да эшләргә мөмкин. “Арча” ширкәтендә 35 чәчкечнең 12се, “Вамин–Мәрҗани” ширкәтендә 67 чәчкечнең 15е ремонтланган.
14 гыйнварда Кукмарада үткәрелгән киңәшмәдә безнең район вәкилләре дә катнашты. Анда авыл хуҗалыгы мәсьәләре буенча зур сөйләшү булды. Төп фикер шул — берәү дә читтән килеп эшләмәячәк, акча — терлекчелектә. Чәчүгә әзерлекнең нинди булуы да шуңа бәйле.
Ильяс ФӘТТАХОВ