Көрәштә күз өстендәге каш кебек булырга

Көрәштә күз өстендәге каш кебек булырга
Үткән җомгада Яңа Кенәр мәктәбендә 2000–2001 елларда туган һәм аннан яшьрәкләр арасында татарча көрәш буенча район җитәкчесе призына ярышлар булды.
Аны ачу тантанасында район башкарма комитеты җитәкчесе Илшат Нуриев, республиканың татар–башкорт көрәше федерациясенең башкарма директоры Равил Хәйруллин, якташыбыз халыкара категорияле хөкемдар Рәфкать Җәләев, атаклы көрәшчеләр катнашты.
Ярышлар бик матур башланып китте. Көрәшчеләр, кунаклар, физкультура укытучылары, тренерлар парадка тезелеп басты. Россия, Татарстан гимны яңгырады. Район башкарма комитеты җитәкчесе Илшат Нуриев чыгыш ясаганда Яңа Кенәр мәктәбенең 10 сыйныф укучысы Фәнил Әхмәтҗановны: “Кая әле мине үзләренә көрәшкә чакырган егет”, — дип, үз янына дәшеп алды. Фәнил декабрьдә район җитәкчесе белән очрашуга баргач: “Сезнең призга Яңа Кенәрдә татарча көрәш ярышлары оештырып булмасмы икән”, — дип сораган. Фәнил үзе дә көрәшә, әйбәт укый.
— Татарча көрәш буенча республикада 18нче урында торабыз, — дип сөйләде Илшат Нуриев. — Элек балтачлылар, Арчаны куып җитәр өчен тырыша–тырмаша көрәшәбез, ди торганнар иде. Мәктәпләрдә дә бу төр спортны җанландырырга кирәк. Якын киләчәктә татарча көрәш буенча күз өстендәге каш шикелле булачаксыз.
— Татарча көрәш Россиянең спорт рейтингына керде. Көрәшчеләр хәзер Россиянең спорт мастеры исемен алалар. Бу төр спортның абруе артты. Арча районында колхоз рәисе булып эшләгән елларда республикада һәрвакыт беренче өчлектә идек без, — дип сөйләде һәм уңышлар теләде республиканың татар–башкорт көрәше федерациясе җитәкчесе, СССРның спорт мастеры Равил Хәйруллин.
Бәйгенең баш хөкемдары районның татарча көрәш федерациясе рәисе Ринат Алиев булды. Яшүсмерләр (барысы 158), дәү абыйларының ярышка үзләре килеп, хәер–фатыйха бирүләренә куанып, үсенеп көрәштеләр. Келәмдә аларны Рөстәм Габделбәров һәм Илшат Идиятов көрәштерде. 7нче мәктәптә физкультура укытучысы Булат Гәрәев һәм көрәшчеләр әзерләүче тренер Фәнис Зарипов хөкем итте.
Апаз мәктәбенең физкультура укытучысы Халит Миннебаев фикерләре белән кызыксынам.
— Бүген бәйгегә 4 малайны алып килдек, — дип сөйләде ул. — Бездә көрәшчеләрне тренер Муса Шакиров әзерләде, ул хәзер армиядә. Уңышларыбыз да бар. Быелгы уку елында республикада 2000 елгылар арасында Илфат Мостафин һәм үз яшьтәшләре арасында Раил Корбанов республикада 2нче урынны алды.
Әлеге ярышта беренче урынны алган Шушмабаш мәктәбе командасы тренеры Зөлфәт Хәйруллин белән сөйләшәбез.
— Яңа Кенәр мәктә-бендә физкультурадан укытам һәм Шушмабашка барып балалар белән көрәш секциясе үткәрәм, — дип сөйләде ул. — “Северный” хуҗалыгы җитәкчесе Рөстәм Хәйруллин оештырды ул секцияне. Узган елның ноябрь ахырында балалар белән шөгыльләнә башладык. Максатым — республика, Россия чемпионнары әзерләү.
55 килограммга кадәрле авырлыктагы көрәшчеләр арасында 1нче урынны алган Шушмабаш мәктәбенең 8 сыйныф укучысы Камил Кәримовны уңышлары белән котлыйбыз.
— Безнең тренерлар алышынып торды, — дип сөйли ул. — Ә болай 5–6 ел көрәшкә йөрим. Зөлфәт абый килгәч, көрәш белән күбрәк шөгыльләнә башладык. Мин көрәшне яратам. Сабантуйларда, республика, Россия күләмендәге ярышларда батыр каласы килә. Батыр калуның даны һәм, билгеле, бүләкләре дә кызыктыра.
Йөрәге түзмәгән, ярышларны карарга өч тапкыр республика буенча чемпион булган Яңа Кенәр көрәшчесе Алмаз Хәйретдинов та килгән.
— 1998 елда спорт мастерлыгы нормативларын үтәдем, — дип сөйли. — Тренер Илгиз Салихов иде. Балалар арасында көрәшчеләрне әзерләргә һәм аларны мәктәптән соң да югалтмаска һәм кызыксындыру чаралары кирәк.
Көрәш тәмам. Батырларга бүләкләрне район җитәкчесе Илшат Нуриев һәм республика көрәш федерациясе җитәкчесе Равил Хәйруллин тапшырды.
Румия НАДРШИНА
Бәйге батырлары
32 кг.га кадәрле үлчәмдә. 1. Рүзәл Сәлимов (Кәче мәктәбе) 2. Илмир Гыйззәтуллин (Курса–Почмак) 3. Аяз Салихов (Яңа Кенәр). 36 кг.га кадәрле авырлыкта. 1. Надил Әхмәтсафин (Курса–Почмак) 2. Дамир Сафиуллин (Арчаның 7нче мәктәбе) 3.Зөлфәт Рамазанов (Курса–Почмак). 40 кг.га кадәрле. 1. Дилүс Әхмәдиев (Сеҗе) 2. Әлфис Маннанов (Түбән Мәтәскә) 3. Радик Лотфуллин (Яңа Кенәр). 43 кг.га кадәрле. 1. Рәмис Низамов (Шушмабаш) 2. Рәдис Сафин (Ашытбаш) 3. Салават Мостафин (Яңа Кенәр). 46 кг.га кадәрле. 1. Илфат Мостафин (Апаз) 2.Илнур Рамазанов (Курса–Почмак). 3.Марсель Мәгъсүмов (Ашытбаш) 50 кг.га кадәрле. 1.Рәмзил Әхмәтҗанов (Сеҗе) 2. Искәндәр Рәхимҗанов (2нче мәктәп) 3. Рәмзил Корбанов (Апаз). 55 кг.га кадәрле. 1.Камил Кәримов (Шушмабаш) 2. Инсаф Габделбәров (1нче мәктәп). 3. Илфат Әхмәтҗанов (Апаз) 60 кг.га кадәрле 1. Раил Котдусов (Апаз) 2. Азат Хәмзин (Яңа Кенәр) 3. Айнур Сөнгатуллин (Шушмабаш). 65 кг.га кадәрле. 1.Айнур Бәдретдинов (Түбән Мәтәскә) 2. Динис Гыйбадуллин (Сикертән) 3. Әлфис Мөхәммәтрәхимов (Сеҗе). 65 кг.нан югары. 1. Дамир Хөснетдинов (Наласа) 2. Айнур Хәйруллин (Шушмабаш) 3. Фаил Гайнетдинов (Утар Аты).
Командалар арасында Шушмабаш мәктәбе беренче урынны алды. Тренеры Зөлфәт Хәйруллин. Икенче урында – Яңа Кенәр мәктәбе. Тренеры Илгиз Салихов. Өченче – Сеҗе мәктәбе командасы. Тренеры – Марат Әхмәдиев.