Сокланырлык гомер үткән

Сокланырлык гомер үткән
Озын гомер биргән очракта һәр туар таңны үз аягыңда каршы алырга язсын, диләр өлкәннәр. Чыннан да, сәламәтлегең булганда, балаларың, оныкларың, оныкчыкларың кадерләп, кайгыртып торганда нигә яшәмәскә? Ходай биргән гомернең кадерен белеп, һәр туган көнгә сөенергә кирәк.
— Аллага шөкер, тормышым бик яхшы. Балаларым бик тәртипле булды. Хөкүмәтебез кайгыртып тора. Район үзәгеннән фатир бирделәр. Хәзер анда гаиләсе белән оныгым яши. 62 ел гомер иткән хатыным Мотыйга гына моннан 5 ел элек вафат булды, аны гына бик юксынам. Хәзер улым Рәфгать, киленем Ясминә тәрбиясендә яшим. Ун оныгым, шуның кадәр диярлек оныкчыгым бар. Бик бай кеше мин, — ди Хәсәншәехта яшәүче сугыш һәм хезмәт ветераны Рәис Сәгыйтьҗанов.
Үзен олылап, 90 яшьлек юбилее белән котларга район башкарма комитеты җитәкчесе Илшат Нуриев, халыкны социаль яклау бүлеге җитәкчесе Илдус Әһлиев, “Ватан” хуҗалыгы җитәкчесе Мансур Әхмәтов белән Апаз авыл җирлеге башлыгы Ринат Садыйков килгәнгә бик сөенде ул. “Начар исәптә йөрсәм, хезмәтем белән танылмаган булсам, мине болай олыламаслар иде”, — дип өстәде сугыш һәм хезмәт ветераны, үзенең гомере буе механизатор булып эшләве, мактаулы исемлектә йөрүе турында искә төшереп.
Район җитәкчесе ветеранны олы юбилее белән котлады, чәчәк бәйләме, истәлек бүләге һәм Россия Федерациясе Президентының Котлау хатын тапшырды.
Ишле гаиләдә төпчек бала булып үсә Рәис Сәгыйтьҗанов. Бик яшь булса да, сугыш аны да читләтеп үтми. Башта Канаш ягында окоп казырга китә, аннан ФЗӨдә укып, Казанда төзелеш трестында эшли. Бераздан Хәсәншәехына кайта һәм 1943 елны үз теләге белән фронтка китә. Канашта әзерлек үткәннән соң, Мәскәүгә, Мәскәүдән Тула, Смоленск тарафында барган сугышларда катнашырга җибәрәләр егетне. Соңгысында 43нче танк десанты составында була ул. Смоленскины азат иткән чакта каты яралана. Бик озак госпитальләрдә ята һәм өенә кайтарыла.
Таякка таянып йөрсә дә, тик утырмый Рәис абый. Үрнәктә механизаторлыкка укый. Аннан 33 ел дәвамында механизатор булып эшли. Гаилә кора. Биш балалары туа. Хәзер барысының да үз тормышлары.
— Кайнатам да, кайнанам да бик акыллы кешеләр булды. Бер авыр сүзгә килмәдек. Яхшы киңәшләрен бирделәр. — ди Ясминә. — Үзара да бик матур яшәделәр. Соклана идем мин аларга. Кайнатам һәрчак безнең өчен үрнәк һәм маяк булды.