Балачак хыялы чынга ашты

Балачак хыялы чынга ашты
Яңа елны каршыларга берничә көн кала Арча кызлары Эльвира Гиниатуллина һәм Диана Кадыйрова “Орленок” лагереннан кайтып төште.
Кызларның күңелендәге хис–кичерешләр чик-чамасыз. Кайтуларына айдан артык вакыт узса да, тәэсире һаман элеккечә. Лагерьда узган бер ай вакыт аларның тормышына икенче сулыш өргән сыман. Алар шундагы яшәеш турында көн дә сөйләшеп, күргән-белгәннәрен иптәшләре белән уртаклашып, яңалыкларны үз мәктәпләрендә, район күләмендә төрле чаралар оештырганда да тәкъдим итәргә ниятлиләр. Эльвира белән Диана Арчаның 1нче мәктәбендә 10 сыйныфта укый. Икесе дә тырыш, актив, җәмәгать эшләрендә, район күләмендәге чараларда әйдәп баручылар, дисәң дә ялгыш булмас. Диана үзен биюче буларак, “21 гасыр яшьләре” клубы аша танытса, Эльвира конферансье буларак “Йолдызлык” фестиваленә кадәр барып җитте. Кызлар икесе дә Арча Укучылар сараенда шөгыльләнүчеләр. Аңарчы Россиядәге берничә балалар лагерьларында ял иткән булсалар да, бусы күңелләрендә озак сакланырлык искиткеч гүзәл мизгелләре белән истә калачак, дип ышана алар.
“Орленок” лагере әле пионер чорында ук дәрәҗәле лагерьларның берсе иде. Ул чакта да булдыклы, сәләтле уку алдынгыларына гына анда ял итү бәхете елмайды. Орленок. Бөркеткәй. Синең һәр сукмагың, һәр баскычың истәлекләр белән тулы. Баскычларыңнан узып, ишегеңнән атлап үткән мәктәп баласы туган мәктәбенә дөньяга бөтенләй яңача, җитди карашлы булып әйләнеп кайта. Анда алган тәҗрибә шәхес булып тәрбияләнү өчен этәргеч тә.
Биредә балаларны сәләтләре буенча сайлап урнаштыралар. Безнең кызлар “Омтылыш” дип аталучы корпуста ял иткән. Килеп урнашуга, лагерь тормышына кереп китә монда балалар. Арчалылар ял иткән корпустагылар 21 көн эчендә төркемнәре белән бергәләп уйлап Россиянең орнаментын ясарга тиеш була. Лагерь тормышы турында сөй-ләгәндә күзләре очкынланып китә аларның. Берсен–берсе бүлдерә–бүлдерә: “Безнең һәр иртә әләм күтәрүдән башланды, — диләр (элеккеге пионер лагерьларындагыча, дип уйлап куям). — Лагерьда патриотик тәрбиягә зур игътибар бирелә. Кемнәр генә җыелмаган, кайлардан, нинди милләт баласы килмәгән! Анда узган төрле чаралар ярдәмендә без Россиядә яшәүче төрле милләт халкының гореф–гадәтләре, милли ризыклары, җыр–биюләре белән таныштык”.
Патриотик тәрбия дигәч, әлбәттә, татарлар турында сорашасы килә башлый. “364 бала арасында татарча иркен сөйләшүчеләр 4 кенә кеше идек, — ди Диана. – Өйдәгеләр белән ана телендә аралаша башласак, нинди чит телдә сөйләшәсез, дип аптырыйлар иде. Татарстан турында беләләр икән, шуңа горурланып кайттык. Без барган Татарстан делегациясе башка регионнар арасында иң зурысы иде”.
Эльвира сүзләренчә, лагерь тормышын анда киләчәкнең нигезе, дип тә атыйлар икән. “Орленок”та башланган дуслык – гомерлек, диләр. Әгәр мөмкинлегегез булса, әлеге лагерьга барыгыз, дип мөрәҗәгать итәр идем яшьтәшләремә. Яхшы укысаң, үзеңнең сәләтеңне күрсәтә белсәң, мөмкинлек тумый калмас”, — ди ул.
Кышкы Арчадан җәйге гүзәллектә гомергә онытылмаслык хис–кичерешләр төяп, Морзе әлифбасы буенча укырга өйрәнү тәҗрибәсен туплап кайту, диңгез ярыннан сихри гүзәллекне күзәтү, җылы якларда гына үсә торган үсемлекләрне күреп, тотып карау бәхетенә ирешү, тормышның әле үзләре өчен ачылмаган якларын да күрү кызларның яшүсмер еллары тормышындагы иң гүзәл истәлек булып сакланыр.
Розалия ЗИННӘТОВА