Бетергәнне торгызу кыен булачак

Бетергәнне торгызу кыен булачак
Арча муниципаль районы җитәкчелеге гражданнар җыеннарында хисап тота.
Югары Бирәзә, Күкчә Бирәзә, Өчиле, Чиканас авылларында яшәүчеләр җыенында район башкарма комитеты җитәкчесе Илшат Нуриев катнашты.
Быелгы җыелыш халыкның күп килүе белән аерылып торды. “Арча” ширкәтенең “Агросинтез” бүлекчәсеннән дә вәкилләр шактый күренә. Беренче булып хисапны да бүлекчәнең яңа җитәкчесе Рашат Сәгъдуллин ясады. Әле күптән түгел генә эшли башласа да, терлекчеләрнең, механизаторларның исемнәрен аерым әйтеп, хезмәтләрен күрсәтеп сөйләве ошады. Әйе, бик кадерле хәзер эшче көчләр, алар биредә 38 генә, инде пенсия яшенә якынлашканнары да бар. “Дүрт сыер савучыбыз бар, алар — алтын фондыбыз”, — диде.
Бүлекчәдә 587 мөгезле эре терлек калган, сыерлар — 150. Узган ел бер сыердан 2752 килограмм сөт савылган. Яшь терлекләрдән уртача 284 грамм үсеш алынган.
— Бер терлек елга 113 килограмм гына үскән, — диде Р.Сәгъдуллин. — Болай эшләсәк, бозауны тана итү өчен биш ел вакыт кирәк булачак.
Язгы чәчүгә техниканың яртысы әзер түгел. Ике тракторны бер итәләр, берсен юк итәләр. Узган ел бер гектардан 13,3 центнер уңыш алынган, туфрак көздән эшкәртелмәгән диярлек.
“Арча” ширкәте җитәкчесе Рифкать Камалетдинов шундый шартларда да тырышып эшләүчеләрне бүләкләргә җай тапкан.
Туннельдән бераз яктылык та күренә. Хәзер ай саен хезмәт хакы бирәләр. Җитәкчелек алышынгач, уртача савым 4 килограммга арткан.
Авыл җирлеге башлыгы урынбасары Радик Шәяхмәтов үзенең чыгышында кызыклы да, гыйбрәтле дә саннар китерде. 273 хуҗалыкта 963 кеше яши. 215 кеше читкә барып эшли, 38 кеше бүлекчәдә, 78 эшкә яраклы кеше беркайда да эшләми. Шәхси хуҗалыкларда 561 мөгезле эре терлек асрыйлар. Ике гаилә фермасы бар, 15 хуҗалык умарта тота, 12 кеше үзләренең пай җирләрен алып эшли. 22 хуҗалыкта өч һәм аннан күбрәк сыер тоталар.
Узган ел 13 бала туган, 11 кеше үлгән.
Дәүләт авылда яшәүчеләр турында зур кайгыртучанлык күрсәтә, республика программаларының нәтиҗәсе күз алдында. 21 ветеран фатирлар алган, 23 күп балалы гаиләгә җир участогы бирелгән. Өчиледә яңа фельдшер–акушерлык пункты урнаштырылды. Быел Өчиле төп гомуми белем мәктәбе ныклап төзекләндерелә.
Район башкарма комитеты җитәкчесе Илшат Нуриев җыелышка кадәр социаль объектларда, Өчиле мәктә-бендә, фермер хуҗалыкларында булган иде. Үзенең чыгышында ул аларның эшчәнлекләренә бәя биреп үтте.
— “Агросинтез” бүлекчәсе өчен 587 генә терлек бик аз. Рәшит Фазлыев белән Ренат Минһаҗевка рәхмәт, алар Өчиле фермасында күпмедер эш оештырырга тырышалар, — диде ул.
“Агросинтез” бүлекчәсенә кергән авыллардагы фермаларда әле кайчан гына 1500 мөгезле эре терлек, шуның кадәр дуңгыз һәм шул санда сарык асрала иде. Өчиле авылы дуңгыз караучысы Мәсхүдә Камалиева ике Дан ордены белән бүләкләнде.
Илшат Габделфәртович дәүләт программаларын тормышка ашыруда активрак катнашырга чакырды, сорауларга җавап бирде.
Ильяс ФӘТТАХОВ