Безнең ветераннар хоккей командасы Арча Аренада җиңү яулады

Безнең ветераннар хоккей командасы Арча Аренада җиңү яулады
25 гыйнварда Арчадагы Боз сараенда Фәнил Гарәфиев истәлегенә хоккей турниры узды. Анда Арча, Әтнә, Балтач, Саба, Кукмара, Мамадышның ветераннар командалары катнашты.
Турнирны Арча районы җитәкчесе, үзе дә оста хоккейчы Илшат Нуриев ачып җибәрде. Ул уенчыларга уңышлар теләде. Ачу тантанасында шулай ук Фәнилнең тормыш иптәше, турнирның төп иганәчесе Лилия ханым да чыгыш ясады. Ул ярышта катнашкан барлык уенчыларга Фәнилнең истәлеген хөрмәт итеп килүләре өчен рәхмәтен җиткерде. 1 уенда ук боз хуҗалары, Әтнәдән килгән кунакларны 11:0 исәбе белән отып, үзләренең җитди максат куюларын күрсәттеләр. Мавыктыргыч уеннар кичкә кадәр дәвам итте. Хоккейчыларга көч бирергә җанатарлар да бик күп килгән иде.
Финалда турнирның иң көчле командалары — Арча һәм Балтач ветераннары очрашты. Уен башында ук арчалылар беренче алканы кертсәләр дә, икенче периодның 14нче минутына кадәр балтачлылар исәпне тигезли ала иде әле. Безнең капкачы Олег Мөхәммәтҗановның һәм уенчыларның осталыгы нәтиҗәсендә генә алка бу уенда безнекеләргә бер тапкыр да кермәде. Ә менә арчалылар икенче алканы кертүгә иреште. Шулай итеп, алар Арча Аренада рәсми турнирда беренче зур җиңүгә ирештеләр. Гомуми нәтиҗәләр түбәндәгечә: 1нче урында — Арча, 2нче —Балтач, 3 нче — Кукмара, 4нче — Мамадыш, 5нче — Саба, 6нчы — Әтнә командалары.
Турнирның иң нәтиҗәле уенчысы дип Мамадыштан Михаил Домалазов, иң яхшы һөҗүмче дип Балтачтан Фәнил Габдрахманов, иң яхшы сакчы дип Кукмарадан Ягъфәр Зыятдинов, иң яхшы капкачы дип Арчадан Олег Мөхәммәтҗанов танылды.
Командаларга һәм иң яхшы уенчыларга кубокларны һәм медальләрне ра-йон башкарма комитеты җи-тәкчесенең беренче урынбасары Илшат Галимуллин тапшырды. Уен турында тулырак мәгълүматны һәм фотоларны arskmedia.com сайтынан карый аласыз.
Исрафил НАСЫЙБУЛЛИН