Арча даруханәләрендә

Арча даруханәләрендә
Даруларга бәя арта, диләр. Прокуратура да аларны тикшерә. Бигрәк тә өлкәннәр һәм яшь балалы гаиләләргә кыен булырга мөмкин. Үземнән беләм, балага салкын тисә дә даруханәдән алган дарулар 1 мең сумнан артып китәр иде. Сатучыларына: “Аз хезмәт хакына эшләүчеләр даруга нишли икән?” — дияр идем.
Аллага шөкер, соңгы вакытта дару алган юк. Шунлыктан аларның бәяләрен дә белмим. Даруларга бәя артамы, юкмы икәнлекне ачыклау өчен Арчадагы даруханәләрдә булдым. Ра-йонның 29нчы дәүләт даруханәсе мөдире Лилия Хәкимова:
— Даруга бәяләр аз–азлап гел артып тора, — дип сөйләде. — 2015 елның гыйнварында бәяләр кинәт кенә югарыга сикерде, дип әйтә алмыйм.
Кыйммәт даруларга акча түккәнче, бу даруханәнең үзендә эшләнгәннәрен сатып алырга мөмкин. Алар кыйммәт түгел. Бу дару препаратларын сорап килүчеләр күбәйгән.
Арчадагы “Имплозия” даруханәсе мөдире Филезә Закирова хөкүмәт тарафыннан көйләнгән дарулар исемлеген күрсәтте. Ул кеше күз алдында тора. Дару бәясен шул исемлектән чагыштырып карап була. Сүз уңаеннан шуны да әйтим, Россия Федерациясе хөкүмәтенең кеше тормышы өчен әһәмиятле дарулар исемлеге күрсәтмәсе (2011 елның 7 декабреннән) бар. Бу документ тормыш өчен әһәмиятле даруларга бәяләрне көйләү өчен эшләнгән.
Дару бәяләре язылган китаптагы бәяләрне “Имплозия”дәге дару бәяләре белән чагыштырып карыйбыз. “Кагоцел” төймәләре бу даруханәдә 237 сум 70 тиен тора, китапта аның бәясенең чиге — 259 сум 50 тиен. “Панангин” даруханәдә 151 сум 70 тиен, китапта бу бәянең чиге — 158 сум 61 тиен. Исемлекне тагын да дәвам итәргә мөмкин. Без чагыштырып караган даруларның берсе дә шушы исемлектәге бәяләр тарифыннан артып китмәгән.
“Имплозия”гә дару алырга кергән Альмира ханым белән сөйләшәбез.
— 3 мең сумлык дару алдым, — диде ул.
— Дарулар кыйммәтлән-гәнме? — дип сорыйм.
— Мин даруларның бәя-ләрен белмим. Артканмы алар, кимегәнме — әйтә алмыйм.
Шәхсән үзем “36,6” даруханәсенә кергәлим. Бердән, ул безнең юл уңаенда, икенчедән, дару сатучы провизор Наилә Вәлиева ачык йөз белән каршы алып, сораган нәрсәне табиблар кебек аңлатып бирә.
— Аз–азлап бәяләр артып кайта, — диде ул. — Акчаңа карап яшәргә кала инде...
Кан басымын үлчи торган тонометрлар 100–400 сумга артып кайткан, кайбер дарулар 40–60 сумга кыйммәтләнгән.
Даруханәләрнең берсеннән “Эссенциале–форте” даруын 1797 сумга алган ир–ат белән сөйләшеп киттек. Үзен Фәргать дип таныштырды.
— Даруның бәясе артканмы? — дип сорыйм.
— Бу даруны 1200 сумга ала идем, — диде ул.
— 500 сумнан да артыграк кыйммәтләнгән түгелме соң? — дип сорыйм даруханә сатучысыннан.
— Ул вакытта бу даруга 200 сум ташлама салынган иде, —диде провизор.
— Фәргать, мондый кыйм-мәтле даруны алырга сезнең мөмкинлек бармы?
— Бер ярым штатта эшләсәм дә, хезмәт хакым 8 мең сум гына, — диде ул. — Менә шуннан чамалагыз инде, минем кыйммәтле даруга мөмкинлек бармы, юкмы?! Ә дәваланырга кирәк.
Румия НАДРШИНА