Бүләккә — ноутбук

Бүләккә — ноутбук
Россия Федерациясе Эчке эшләр министрлыгының юл хәрәкәте куркынычсызлыгын тәэмин итү буенча Баш идарәсе “Юл хәрәкәте куркынычсызлыгын күтәрү дирекциясе” федераль казна учреждениесе белән берлектә юл хәрәкәте куркынычсызлыгын пропагандалау буенча “Куркынычсызлык салават күпере” исемле Бөтенроссия иҗат бәйгесе игълан иткән иде.
Бәйге шарты буенча катнашучылар электрон рәвештә тәкъдир ителгән материалларын җибәрергә тиеш.
Арчаның бишенче гимназиясе укучысы Зөһрә Зарипова сценариесе буенча төзелгән “Балаларыгызны яратыгыз” дигән видеоролик (оператор-монтажлаучы абыйсы Хәлил Зарипов, җитәкчесе әнисе, “Нур” балалар телестудиясе җитәкчесе Зөлфирә Зарипова), “Куркынычсыз юлларга әйтәбез—әйе!” дигән номинациядә катнашып, беренче урынны яулады.
ЮХИДИ идарәсенең Арча бүлекчәсе җитәкчесе Илдар Нотфуллин Зөһрә белән мәктәптә очрашты һәм барлык балалар каршында аңа бүләкләр–ноутбук һәм наушниклар тапшырды. Әлеге тантанада гимназия директоры Фатыйх Хәкимуллин да катнашты һәм җиңүчене котлады.
— Видеороликны электрон почта аша җибәрдем. Җиңү турында уйламадым да. Нәтиҗәсе турында ишеткәч, бик сөендем, — диде соңыннан Зөһрә Зарипова.
— Зөһрә укуда да сынатмый, җәмәгать эшләрендә дә бик актив. Аннан, төрле бәйгеләрдә катнашып, җиңүләр дә яулый. Бу аның беренче җиңүе генә түгел, — диде гимназиянең тәрбия эшләре буенча директор урынбасары Илфира Вәлиева. — Аның уңышлары гимназия өчен дә дәрәҗә.
Гөлсинә ЗӘКИЕВА