Ярый әле сез бар

Ярый әле сез бар
Бүгенге тормышыбызны без электрдан башка күз алдына да китерә алмыйбыз. Арча РЭСы территориясендә юкка гына “Энергетика — халык хуҗалыгының кан тамыры ул”, дип язып куймаганнар.
29 гыйнварда безне яктылыкта яшәтүче, тормышыбызны тулы канлы итүче коллективның җыелышы булды. Җитәкче Нияз Нурмөхәммәтов 2014 елда башкарылган эшләр, 2015 елга бурычлар турында сөйләде.
Арча РЭСы бүгенге көндә 1493 километр линиягә хезмәт күрсәтә. Барысы 56 кеше, уртача хезмәт хакы — 17–18 мең чамасы. Узган ел 81 млн. 540 мең сумлык технологик тоташтыру эшләре башкарылган. Күп балалы гаиләләргә бирелгән участокларга аерым линия сузылды. “Бу шәһәрдәге линияләргә нагрузканы арттырмый торган итеп эшләнде”, — диде Н.Нурмөхәммәтов.
Предприятиенең үзендә дә сакчыллык режимына күчү буенча шактый эш башкарылган.
Коллектив районда, республикада үтә торган чараларда актив катнаша. Идел буе электр челтәре буенча чаңгы ярышында дүртенче урынны алганнар. Мастер Фәрит Габдрахманов, контролер Рәдис Әүхәдиев Идел буе электр челтәре командасы составында да чыгыш ясыйлар.
Яңа ел алдыннан балалар сәнгать мәктәбендә хезмәткәрләрнең балалары өчен матур бәйрәм ясадылар. Өлкәннәр көнендә ветераннарны чакырып кунак итәләр.
Электр ул әле рәхәтлек кенә түгел, аның янәшәсендә хәтәрлек тә бар. Җәйге каникулларда мәктәпләргә барып укучылар алдында үтемле чаралар уздыралар. Узган ел Урта Пошалым мәктәбендә табышмаклар, рәсемнәр конкурслары бик кызыклы үтте, балалар бик игътибар белән видеороликлар карадылар, әңгәмәдә актив катнаштылар. Һәркайсы истәлекле бүләкләр дә алды.
Узган ел территорияләрне төзекләндерү буенча Арча РЭСы Идел буе чел-тәрендә беренче урынны яулады.
— Минем әлеге вазыйфага алынуыма дүрт айдан артып китте, шушы вакыт эчендә сезнең коллектив эшеннән бер генә зарланучы да булмады, — диде үзенең чыгышында район башкарма комитеты җитәкчесе Илшат Нуриев. — Хезмәтегез, башкарган эшләрегез өчен зур рәхмәт сезгә!
— Мин сезнең хезмәтегезнең авырлыгын яхшы беләм, — дип дәвам итте ул. — Минем әти гомере буе “Ватан” хуҗалыгында баш энергетик булып эш-ләде. Аны төн уртасында да, буранда да, яңгырда да чакырып алып чыгып китәләр иде.
Илшат Габделфәртович район ирешкән уңышлар, алда торган бурычлар белән дә таныштырып үтте. Республика Президенты Рөстәм Миңнехановка зур рәхмәт, районыбызга һәрвакыт булыша.
Быел Арчаның үзәк урамнарын әйбәтләп асфальтлау мөмкин булачак. Арчада су проблемасын хәл итү өчен өстәмә акча бирелде. Арчада биологик чистарту корылмаларының икенче чиратын үзгәртеп кору тәмамланачак.
Район җитәкчесе коллективка киләчәктә дә шулай актив булып калуларын, уңышлар теләде, эшне тагын да яхшырту буенча тәкъдимнәрен әйтте.
Ильяс ФӘТТАХОВ