Җиңүләр алда әле

Җиңүләр алда әле
31 гыйнварда “Арча” спорт комплексында татарча көрәш буенча район җитәкчесе призына бәйге үтте. Ярышларны Илшат Нуриев үзе ачып җибәрде һәм көрәшчеләргә уңышлар теләде.
— Татар көрәше — ул спорт кына түгел, ә милли көйләребез, әдәбиятыбыз, гореф–гадәтләребез кебек үк халкыбызның гасырлардан килгән мирасы. Без аны саклау һәм үстерү өчен барын да эшләячәкбез. Арча көрәшчеләренең элеккеге данын кайтару өчен бергәләп тырышыйк! — диде ул.
Районда спортны үстерүгә зур өлеш керткән Марсель Хәлилов һәм Шәйдулла Сәлаховка район җитәкчесе рәхмәт белдерде һәм истәлекле бүләкләр — исемле кул сәгатьләре тапшырды.
Бәйгене ачу тантанасында шулай ук Татарстан Республикасы татар-башкорт милли спорт көрәше федерация-сенең башкарма директоры, СССРның спорт мастеры Равил Хәйруллин да катнашты. Ул да соңгы елларда Арча көрәшчеләренең республика күләмендәге бәйгеләрдә бераз сынатуларын һәм хәлне кичекмәстән төзәтү өчен чаралар күрергә кирәклеген ассызыклады.
— Тиздән республикада Муса Җәлил призына бәйге үтәчәк. Районның яңа җитәкчесе сезгә карата бик игътибарлы. Сез дә, үз чиратыгызда, якташларыгыз — легендар көрәшчеләр Әхәт Закиров, Рәдис Сәйфуллин исеменә тап төшермәссез дип ышанам. Марсель Хәлилов, Шәйдулла Сәлахов кебек танылган спортчылар үз вакытында моның өчен барын да эшләде. Хәзер эстафета сезнең куллларда, — дип белдерде ул.
Равил Хәйруллин татарча көрәшне үстерүгә керткән өлешләре өчен Марсель Хәлилов һәм Шәйдулла Сәлаховка Федерациянең Рәхмәт хатларын, истәлек бүләкләрен тапшырды.
Бәйгенең баш хөкемдары Ринат Алиев турнирны үткәрү тәртибе белән таныштырганнан соң командалар парады узды. Ярышта 10 команда составында 70тән артык көрәшче катнашты.
Алар 10 үлчәү авырлыгында көч сынашты. Егетләр барысы да бик әзерлекле. Арасында Илшат Идиятов, Илүс Әскәров, Зөлфәт Хәйруллин, Фаил Рәхимов кебек инде шактый бәйгеләрдә җиңеп, тәҗрибә туплаганнары да, яшьләр арасында Татарстан һәм Россия чемпионатларын откан Руслан Абдуллин һәм Фаяз Зарипов кебек өметле яңа буын батырлар да бар иде.
Ике келәмдә дә көрәш кызганнан–кыза барып, 4 сәгатьтән артык дәвам итте. Тамашачылар матур алымнарга сокланып алкышлады, җанаткан спортчысының җиңелүен күреп тирән көрсенде яки үзе чыгып көрәшердәй булып көч бирергә омтылды. Инде чәчләренә чал кергән агайларның шулай ихластан бирелеп көрәш карауларын күрү, дөрестән дә, бу спорт төренең татар җанына бик тирән уелуын раслый. Җанатарлар арасында заманында үзе дә мәйдан тоткан тагын бер атаклы якташыбыз — Татарстан Дәүләт Советы депутаты, Россиянең татар–башкорт көрәше буенча спорт мастеры Вагыйз Минһаҗев та бар иде.
— Районны җитәкләгәндә көрәш-челәргә аерым игътибар бирә идек. Бүләкләр дә саллы, тормышта туган проблемаларын да чишәргә ярдәм итәргә тырыштык. Шуңа күрә ул елларда арчалылар призлы урыннардан төшмәде. Әле дә карап торам, сәләтле егетләр күп. Аларны тагын да үстерергә, язмышлары белән кызыксынып торырга кирәк, — дип киңәш бирде ул.
Бу турыда Наласада 30 елдан артык көрәш түгәрәген җитәкләүче тренер Таһир Лотфуллин фикере белән дә кызыксындык.
— Дөрестән дә, көрәшне яраткан яшьләр күп. Алар мәктәптә укыган елларында түгәрәккә бик теләп йөриләр. Шуннан соң эш эзләп күбесе авылдан чыгып китә дә тренировкаларны ташлый. Ә арасында бик сәләтле егетләр дә бар. Мәсәлән, узган ел миңа йөргән Фаяз Зарипов яшьләр арасында Россия чемпионы булды. Менә шундыйларга үзебезнең районда калып эшләргә мөмкинлек бирергә иде. Илшат Габделфәртовичның көрәшчеләр белән, гомумән, спорт белән кызыксынуы бездә өмет тудыра. Хәзер “Арча” спорт комплексында да көрәшчеләргә атнага өч тапкыр шөгыльләнү мөмкинлеге булдырылды. Бүгенге бәйгедәге кебек призларның да күзгә күренеп артуы яшьләрне дә кызыктырмый калмас. Шуңа күрә җиңүләр булыр дип ышанам.
Бәйге тәмам. Җиңүчеләргә бүләкләрне район җитәкчесе Илшат Нуриев, абруйлы кунаклар кулыннан алу икеләтә мәртәбәле булгандыр, мөгаен. Быел аның күләме дә шактый иде. Шәхси беренчелектә һәр үлчәү авырлыгында җиңүчеләргә — 5 мең, икенче урындагыларга — 4 мең, өченчеләргә 3 мең сум бирелде. Бәйгенең приз фонды 120 мең сум тәшкил итте.
Исрафил НАСЫЙБУЛЛИН
Әйдәгез, батырлар белән танышыйк:
60 кг кадәр: 1нче урында Салават Әхмәтгалиев (“Сервис–Агро”), 2нче — Илнар Сөнгатуллин (социаль яклау бүлеге), 3нче — Радик Хәйруллин (Арча педагогика көллияте). 65 кг кадәр: 1нче — Денис Абдуллин (“Сервис–Агро”), 2нче — Илшат Фазылҗанов (АПК), 3нче — Рәис Галиев (“Сервис–Агро”). 70 кг кадәр: 1нче — Зөлфәт Хәйруллин (Яңа Кенәр), 2нче — Айназ Мөхәммәтов (АПК), 3нче — Азат Сираҗиев (“Сервис–Агро”). 75 кг кадәр: 1нче — Илһам Касыймов (Яңа Кенәр), 2нче — Зөлфәт Сираҗиев (“Сервис–Агро”), 3нче — Марат Әхмәдиев (“Ак барс” агрокомплексы”). 80 кг кадәр: 1нче — Фаяз Зарипов (“Сервис–Агро”), 2нче — Әнис Гарипов (Өчиле), 3нче — Рәҗип Нәбиуллин (“Ак барс” агрокомплексы”). 85 кг кадәр: 1нче — Динар Шакиров (“Сервис–Агро”), 2нче — Рәнис Шәмсетдинов (“Сервис–Агро”), 3нче — Илнур Әһлиуллин (“Сервис– Агро”). 90 кг кадәр: 1нче –— Илшат Идиятов (“Сервис–Агро”), 2нче — Булат Шәйхисламов (АПК), 3нче — Рөстәм Мәхәммәдиев (“Ак барс” агрокомплексы”). 100 кг кадәр: 1нче — Раиф Мөхәммәтҗанов (“Сервис–Агро”), 2нче — Илдус Нәбиуллин (“Ак барс” агрокомплексы”), 3нче — Илүс Әскәров (Үрнәк). 130 кг кадәр: 1нче — Руслан Абдуллин (“Ак барс” агрокомплексы”), 2нче — Васыйл Шиһапов (“Ак барс” агрокомплексы”), 3нче — Илмир Галиуллин (“Сервис–Агро”). 130 кг югары: 1нче — Фаил Рәхимов (Югары Мәтәскә), 2нче — Нәзих Сафин (Күлтәс), 3нче — Илфат Вәлиев (“Сервис–Агро”).
Командалар арасында бәйгегә иң күп көрәшче алып килгән “Сервис–Агро” ширкәте егетләре җиңеп чыкты. Икенче урында “Ак барс” агрокомплексы”, өченчедә — Арча педагогика көллияте командасы.