Сәламәтлек көнендә

Сәламәтлек көнендә
Арчада яшәүче 6 яшьлек Степан Артемьев әти–әнисен (Лена белән Алексей) чаңгы шуарга алып килгән. Арча стадионында 1 км араны чаңгыларда шуып үткәч, рәхәтләнеп кайнар чәй, коймак белән сыйланды ул. И–и, күңелле дә булды соң аңа! Әти–әнисе аңа карап сөенеп бетә алмады.
Якшәмбе көнне Арча стадионында Сәламәтлек көне уздырылды. Теләгән һәркем чаңгы шуып, кайнар чәй, коймак белән тамак ялгап алды. Район башкарма комитеты җитәкчесе Илшат Нуриев чаңгы шуарга килүчеләрне Сәламәтлек көне белән котлады, һәркемгә исәнлек–саулык теләде, сәламәтлекне хәрәкәт, спорт белән ныгытырга, районда спортны үстерергә кирәклеген, бу юнәлештә эш алып барылуын әйтте һәм чаңгы сөючеләрне зур бүләк белән куандырды. Чаңгычыларга юл салучы үзйөрешле кыйммәтле техниканы “Арча” спорт мәктәбе җитәкчесе Ринат Гәрәевка тапшырды.
Бераздан инде бар да чаңгы трассасында иде. 1нче мәктәп укытучысы Кадрия Закирова үзенең 5 “А” сыйныфы белән килгән. Барысы 24 бала. Эмиль Ягъфәров: “Чаңгы шуарга яратам”, — ди. Әмир Рәхимҗанов футбол белән мавыга икән. Рәис Зарипов футбол, көрәш белән шөгыльләнә. Малайлар бер–берсен бүлдерә–бүлдерә спортның кайсыдыр бер төрен яратулары турында сөйләделәр. Җәен урамнан кайтып кермәүләрен, кышын компьютер белән күбрәк мавыгулары турында да әйттеләр.
Ветеран укытучы Ленар Заһидуллин: “Тормыш иптәшем Рәдинә белән килдек”, — ди. Оныгы Илназ да монда. Ленар Усманович шәкертләре белән дә таныштырды:
— Болар бар да Арча педагогика көллиятендә белем алган егетләр. Рәнис Нәбиуллин 2нче мәктәптә физкультура укытучысы. Яңа Кенәрдән Рәмис Хәйруллин биатлон буенча команда зачетында республика чемпионы.
5нче гимназиядән физкультура укытучысы Ильяс Абдрахманов, укытучылар Альмира Хәкимуллина, Гөлназ Камалиева башка көннәрне дә чаңгы шуулары турында сөйләделәр.
Кәче мәктәбеннән физкультура укытучысы Хәйдәр Зәйнуллин:
— Быелгы уку елында күбрәк шахмат һәм хоккей белән шөгыльләнүне максат итеп куйдык. Командалар арасында шахмат буенча районда 3нче урын бездә. Киләсе уку елында чаңгы спортын күтәрергә исәп.
Атаклы әлифбачылар Сәләй ага белән Рәмзия апаның улы Камил әфәнде: “Мондагы саф һавадан, матурлыктан күңел күтәренкелеге алабыз”, — ди.
82 яшьлек элеккеге авиация хәрбие Гыйниятулла Гатауллин, февральдә 66 яшь туласы ветеран укытучы Руфина Гәрәева, 60 яшькә җиткән шәфкать туташы Мөнирә Нигъ-мәтуллина дару ясаучы, дару сатучы бизнесменнарны баетып ятканчы, спорт белән шөгыльләнергә кирәк, диләр.
Сеҗе һәм Сикертән мәктәпләре физкультура укытучылары Фәрит Нәгыймов, Назыйм Нәбиуллин балаларны спортка тарту өчен янып–көеп йөриләр. Назыйм: “Безнең Мөрәле авылында эшмәкәр Алмаз Мин-һаҗев авылга зур итеп шугалак ясап куйды, спорт киемнәре тектерде. Хәзер төнгә кадәр хоккей уйныйбыз, шундый күңелле”, — дип тәэсирләнеп сөйләде.
Мондый массакүләм спорт чараларында Арча педагогика көллияте студентлары белән мәш килеп катнаша торган Бари Бакиров, нишләптер, күренмәде. Хәлен белеп шалтыраткач, киләсе чаңгычылар көненә әзер-ләнәбез, диде. Республика буенча уңышка ирешүче биатлончылар Яшел Үзән шәһәрендә ярышларда булган. Тренерлары Рәис Камалов республика буенча Арча командасы 2нче урынны алды, дип хәбәр итте. Ә Лилия Рәхмәтуллина Ижевскида Россия чемпионатында.
... “Райгаз”да эшләүче чаңгычы Илнар Дияров хатыны Гөлназ, балалары Илназ, Алия, Альмир белән бергәләп ялны күңелле үткәрде. Чаңгы шуучы яшь гаи-ләләр бер алар гына түгел иде.
Румия НАДРШИНА