Зәринәдә Әлфия апа моңы бар

Зәринәдә Әлфия апа моңы бар
Ә беләсезме, Арчада шундый матур җырлый торган бер кыз бар. Ул — Зәринә Никитина.
Республиканың “Дулкыннар” бәйгесендә Татарстанның атказанган артисты, педагог Мингол Галиев күреп алып, аны үзенә дәресләргә чакырган. Әнисе Гөлфия ханым, шәфкать туташы, афәрин, ялгыз өч бала тәрбияләсә дә, ничек итсә итә, баласының сәләтен үстерергә тырыша. Машина беләнме, поездмы — атна саен Казанга чыгып китәләр.
— Арчада кайда яшисез? — дип сорыйм.
— Фатирга кереп торабыз, — дип шаккатырмасынмы Гөлфия ханым. — Ипотекага йортны төзи башладылар инде...
Менә нинди гаиләләр бар! Арчада сәнгать мәктәбе вокал–баян укытучысы Алсу Кашапова:
— Зәринә кебек татар моңлы балалар бик аз, — ди.
13 яшьлек Зәринәнең уңышлары да бар инде. 2014 елда “Бәхетле балачак” бәйгесендә “Вокал” номинациясендә 2нче урын алган. Бөтендөнья татар конгрессы Башкарма комитеты дипломы белән бүләкләнгән.
“Җырлы–моңлы балачак” халыкара телевизион конкурсы лауреаты. “Без — Бердәм Россиянең балалары” дигән Iнче балалар һәм яшүсмерләр иҗаты фестиваленең беренче дәрәҗәдәге лауреаты.
IХ республикакүләм “Дулкыннар” конкурсында “Вокал” номинациясе лауреаты. Бу конкурста Зәринә турында “Әлфия апа моңы бар”, дигән бәяне биргәннәр.
Моңлы халык җырларын башкаручы Зәринәне без, Алла боерса, зур сәхнәләрдә күреп, безнең Арча кызы, дип горурланырбыз әле.
Румия НАДРШИНА