Муниципаль районнар Арча муниципаль районы

Айныйбызмы, әллә...

2015 елның 6 феврале, җомга

Айныйбызмы, әллә... (кызганыч, өтер куярга туры килә)
2013 елга караганда узган ел аракыны 11 процентка азрак эчкәнбез бит. Аллага шөкер, ниһаять, айный башладык, дип куанырга ашыкмагыз, җәмәгать. Йөрәкне өшетерлек башка саннар шатланырга иртәрәк, ди, әле. Былтыр ялган аракы эчеп 11 райондашыбыз якты дөнья белән хушлашкан.
Бу саннар район хакимиятендә ялган аракы әйләнешен туктатуга юнәлдерелгән киңәшмәдә китерелде. Аны район җитәкчесе Илшат Нуриев алып барды.
Дәүләт алкоголь инспекциясенең Арча территориаль органы җитәкчесе Булат Кадыйров һәм район эчке эшләр бүлеге җитәкчесе Айдар Баһавиев районда ялган аракы сатучыларга каршы көрәш чаралары турында сөйләделәр. Без бу турыда газетабызда 17 декабрь һәм 30 гыйнвар саннарында язган идек. Кабатлап тормыйбыз. Ә менә киңәшмәдә халыкны агулауга чик кую өчен тагын нинди чаралар тәкъдим ителүен күрсәтәсебез килә. Беренчедән, район җитәкчесе мондый киңәшмәләргә барлык авыл җирлекләре башлыкларын да чакырырга кушты.
— Авылда кемнең нәрсә белән шөгыльләнгәне уч төбендәге кебек күренеп тора. Җирлек башлыклары законсыз спиртлы эчемлекләр сатучылар турында эчке эшләр бүлегенә хәбәр итәргә тиеш. Ә полиция хезмәткәрләре моңа чик кую өчен булган бөтен мөмкинлекләрне дә файдаланырга бурычлы, — диде ул. Киңәшмәдә шулай ук эшмәкәрләргә косметик лосьоннарны күпләп сатуны чикләргә тәкъдим ителде.
Район үзәк хастаханәсе баш табибы Тәлгать Баһаветдинов сәрхүшләрне республика учреждениеләренә алып барып дәвалау нәтиҗәлерәк булуын сөйләде. Әмма моның өчен дә пациентның үз ризалыгы кирәк. Хәзерге вакытта хастаханәдә 266 кеше наркологта исәптә тора. Нәкъ менә шулар теләсә нинди арзанлы спиртлы эчемлек кулланырга әзер. Ә сораучы булганда тәкъдим итүче һәрвакыт табыла. Юкса, хәрәм шөгыльнең бәрәкәт бирмәве мәгълүм. Киресенчә, ялган аракы сатучы күпме кешенең гомере фаҗига белән бетүе билгеле.
Утырышта аракы сату күзгә күренеп кимегән Яңа Кенәр, Яңасала, Яңа Кишет авыл җирлеге башлыклары да аңлатма бирде. Сәбәпләр күп төрле: кешеләрнең читкә китеп эшләве, кибетләрдә ассортиментның ярлылыгы, халыкның, дөрестән дә, азрак эчә башлавы һ.б.
— Бер ел өчендә 28–38 процентка кимүнең сәбәбе халыкның кинәт айнуы була алмый. Алай булса, без бик куаныр гына идек. Әмма оператив мәгълүматлар районга читтән ялган алкоголь продукциясе күпләп кертелүен күрсәтә. Моңа каршы без бөтен җәмәгатьчелек белән бергәләп көрәшкәндә генә уңышка ирешәчәкбез. Аракының ниндиен эчү дә юньлегә илтми, ә күрә торып кешеләрне агулауга без һич тә юл куймаячакбыз, — диде Илшат Габделфәртович.
Исрафил НАСЫЙБУЛЛИН

БАРЛЫК ЯҢАЛЫКЛАРНЫ УКУ

СОҢГЫ ЯҢАЛЫКЛАР

май, 2026 ел

Консультация-метеорологик күренешнең интенсивлыгы турында кисәтү 18 сәгатьтән. 8 майда 18 сәгатькә кадәр. 2026 ел, 9 май

9 майда Татарстан Республикасы территориясендә һәм Казанда урыны белән секундына 15-18 метр тизлектәге көчле җил көтелә. Россия гадәттән тыш хәлләр министрлыгының Татарстан Республикасы буенча Баш идарәсе хәбәр итә: Җил көчәйгәндә: 1. Биналардан чыгуны чикләргә, биналарда булырга киңәш итәбез. Балаларны караучысыз калдырмау мөһим. 2. Әгәр көчле җил Сезне урамда очратса, җир асты кичүләрендә яки биналарның подъездларында ышыкланырга киңәш итәбез. Көчле җилдән йорт диварлары янына качарга кирәкми, чөнки түбәләрдән шифер һәм башка түбә материаллары төшүе ихтимал. Бу бит җәмәгать транспорты тукталышларына, төзелеп бетмәгән биналарга кагыла. 3. Урамда реклама щитларыннан, вывескалардан, юл билгеләреннән, электр линияләреннән ераграк торырга кирәк 4. Зур агачлар янында булырга ярамый, шулай ук алар янында автотранспорт куярга ярамый – җил өзеп алган ботаклар зур куркыныч тудырырга мөмкин. 5. Көчле җил вакытында электр тапшыру линиясе астында тору һәм өзелгән электр үткәргечләренә якын килү куркыныч.

Йога безне үзгәртергә тырыша, яхшы якка!

Арчаның Казансу паркында йога белән шөгыльләнүче ике яшь кызга игътибар итми калмый мөмкин түгел иде. Чөнки хәрәкәтләре, онытылып тынычлыкта калулары кызыклы һәм бик матур күренеш Румия Надршина Яннарына бардым. Сөйләшеп киттек. Бик ачыклар булып чыктылар. Диләрә Гыйльманова Казан медицина университетын тәмамлаган, бүген психиатрга ординатурада укый. Арчаның 1нче мәктәбен тәмамлаган. Камилә Минһаҗева шулай ук Арча кызы. Казан культура институтын тәмамлаган, бүген бала белән декретта. – Мин йога белән 8 ел шөгыльләнәм инде, – ди Диләрә. – Менә туганым Камиләне дә йогага тарттым. Икебез бик рәхәтләнеп паркта табигатьтә йога белән шөгыльләнәбез.

Онытмыйлар...

Сергей Рысаев, Рамил Әскәров, Айнур Хәйретдинов истәлегенә волейбол турниры. Афәрин, айваннар, үзенекеләрне онытмыйлар, искә алалар. “Авылдашлар” төркеменә “Сергей Рысаев, Рамил Әскәров, Айнур Хәйретдинов истәлегенә волейбол турниры үткәрәбез. Рәхим итегез!”, – дип язып элделәр. Турнир Айван мәдәният йорты залында үтте. Ярышта Айван авылыннан өч команда – ветераннар, “Яшьләр-1”, “Яшьләр-2” һәм “Арча“ спорт мәктәбе, район үзәк хастаханәсе, Казан командалары катнашты. Казаннан элек Айван мәктәбендә эшләгән Сергей Рысаевның хезмәттәше, Айнур Хәйретдинов һәм Рамил Әскәровның укытучысы Фәнис Абдуллин бер төркем волейболчылар белән кайтты. Судья да Казаннан кайтты – Халит Халиков. Район мәгариф идарәсе җитәкчесе Нияз Муллахмәтов, район яшьләр эшләре, спорт һәм туризм бүлеге җитәкчесе Фәнил Һидиятуллин заманында мәктәптә волейбол секциясе алып барган педагог Сергей Рысаевны, аның укучылары – волейболчылар Рамил Әскәров, Айнур Хәйретдиновны хөрмәт белән искә алдылар, ярышта катнашучыларга уңышлар теләделәр.

Афәрин, тырышып уйнадылар!

Район мәгариф хезмәткәрләренең профсоюз оешмасы “Сәламәтлек” спартакиадасы кысаларында спорт ярышларын оештырып тора. Башта ярышлар зоналарда булды, аннан җиңүчеләр Арчада ярыштылар. Афәрин, тырышып уйнадылар. Нәтиҗәләр: 1. Арчаның 6нчы хатын-кызлар командасы; 2. Арчаның 11нче балалар бакчасы; 3. Арчаның 9нчы балалар бакчасы.

ЯҢАЛЫКЛАРГА ЯЗЫЛУ