“Карлыгач”ка Су анасы белән Шүрәле килгән

“Карлыгач”ка Су анасы белән Шүрәле килгән
Балалар бакчасына берәр чараны карарга барган саен мин үземә шундый сорау бирәм: монда балалар күбрәк шатланамы, әллә сабыйларның дөньяларын онытып, сикерә-сикерә уйнаганнарын, күбәләктәй очынып биегәннәрен, җырлаганнарын күреп, тәрбиячеләр сөенәме? Икенчеләредер, мөгаен. Әле беркөнне генә “Карлыгач” балалар бакчасында үткәрелгән “Кышкы уеннар” чарасында тәрбиячеләрнең балалар белән бергә уйнауларын күзәтеп торганнан соң шундый фикергә килдем.
Үз хезмәтен, балаларны чын күңелдән яраткан кешеләр генә шулай бөтен күңеле белән бирелеп, үзе дә балага әйләнеп бетеп уйный, көлә ала.
“Карлыгач”тагы бу чара урамдагы уен мәйданчыгында барды.
— Без сезне әкият дөньясына сәяхәткә чакырабыз. Һәр тукталыш саен сезне Габдулла Тукай әкиятләре геройлары каршы алыр, — дип каршылады балаларны Кыш бабай белән Кар кызы.
Башта алар янына ике Камырбатыр килеп чыкты. Алар кайсы баланың төз атуын һәм кайсы командада (кызыллар, яшелләр командалары) җитезрәкләр җыелуын тикшерделәр. Шуннан соң гына Су анасы белән очрашуга җибәрделәр. Ай-яй, оста булып чыкты бу әкият геройлары! Берсенең дә балаларны үз яннарыннан җибәрәсе килми. Әнә, Су анасына кадәр үзләрен уен белән алдау өчен түбәтәйгә кадәр әзерләп куйган. Түбәтәй уены уйнап, мәш килделәр. Паровоз килеп җитеп, сәяхәтне дәвам итәргә чакырмаса, Су анасы яныннан китмәсләр иде.
Ә алдагы тукталышта алар Шүрәле белән Убырлы карчык өенә килеп чыктылар. Убырлы карчыкның кыя-фәтенә дә, Шүрәленең озын бармакларына да исләре китмәде аларның. Алай гынамы, Убырлы карчыкның себеркесенә атланып очтылар да әле.
Аннан бергәләп Кәҗә белән Сарык янына юнәлделәр, аларның капчыкларындагы бүре башын тотып карадылар, аннан шуны бер–берсенә тапшыра–тапшыра йөгерешеп уйнадылар. Кайсы команда беренче булып бүре башын алып килеп өлгерә. Кара, нинди кыю балалар бу бакчада!
Шулай озак сәяхәт иткәннән соң чәй йортында “Күчтәнәч” тапшыруыннан “килгән” Дәү әни пешергән коймаклар белән чәй эчтеләр.
— Без уен белән сәламәт яшәү рәвеше алып барабыз, шулай балаларны физик яктан ныгытырга тырышабыз, халыкның гореф-гадәтләрен барлыйбыз, үзара дустанә мөнәсәбәтләр булдыру өстендә эшлибез, әкиятләр аша туган ягыбызга, әдәбиятка мәхәббәт тәрбиялибез, — ди “Карлыгач” балалар бакчасының татар теле тәрбиячесе Гөлназ Йосыпова.
— Балалар бакчасы хезмәткәрләре үзләре дә сәламәт яшәү рәвеше алып бара, — дип сүзгә кушыла җитәкчесе Фәния Шакирова. — Волейбол уйныйлар, чаңгыда йөриләр, бассейнда йөзәләр, фитнес белән шөгыльләнәләр, хәзер менә Боз сараенда тимераякта шуалар. Төрле спорт ярышларында даими катнашып, призлы урыннарны да яулыйлар.
Гөлсинә ЗӘКИЕВА