Түрдән уз, әдәбият елы

Түрдән уз, әдәбият елы
Арча үзәк китапханәсенең уку залына “Яхшы китап — якын дус” дип исемләнгән кичәгә “Яшәү яме” клубы, “Каурый–каләм” иҗади түгәрәге әгъзалары, Арча педагогика көллияте студентлары һәм китапханәнең иң актив укучылары җыелды.
Әдәби кичә Әдәбият елы башланып китү уңаеннан уздырылды. Әдәбият сөючеләр һәммәсе китапханәнең якын дуслары. Узган 2014 елда китапханәгә 5918 укучы язылган. Алар төрле яшьтәге, төрле һөнәр ияләре. Иң өлкән укучы — Арчадан 94 яшьлек Шәмсенур Сибгатуллина. Ул хәзер китапханәгә үзе йөри алмаса да, килене Резидә аша укыйсы килгән китапларын соратып ала. Шәмсенур апаның китапка булган мәхәббәте бөтен гаиләне матур әдәбиятка хирысландырган. Килене Резидә белән хәтта ярышып укыйлар икән. Бүгенге кичәгә Шәмсенур апа китапханәдә эшләүчеләргә тынгысыз хезмәтләрендә уңышлар теләп, яхшы бәя һәм рәхмәт сүзләре тулы хат язып җибәргән. Моңарчы рус һәм чит тел әдәбияты классикларына өстенлек биргән әби татар классикларының әсәрләрен бирүләрен үтенгән.
Шәмсенур ападан кала өлкән укучы — биш бала тәрбияләп үстергән һәм гомерен балаларга белем, тәрбия бирүгә багышлаган, быел 84 яшен тутырачак Гөләфтәр Рәхмәтуллина. Гөләфтәр апа да балалары күңелендә китапка мәхәббәт тәрбияләп үстергән. Ул тамашачыларга яшьлегендә тәүге тапкыр тере язучыларны — Фатих Хөсни, Габдрахман Әпсәләмовларны күргән чакларын сөйләде. “Китап — авыртуларны, дөнья мәшәкатьләрен оныттыра торган шифа”, — ди ул. Әнә шундый мавыктыргыч китап сорап йөдәтеп бетергәч, китапханәчеләр аңа аптырап, “Әллә сиңа дигәнне үзебез язып карыйкмы соң?” — ди икән. Чөнки Гөләфтәр апаның китапханәдә инде укымаган татар китабы, журналы, хәтта газетасы калмаган. Вакытлы матбугатның да һәр санын иң элек укучы ханым “Миңа бөтен яңалыкны җиткереп торган өчен рәхмәт сезгә”, – дип китапханәчеләргә рәхмәтен җиткерде.
2014 елда “Елның иң актив укучысы” исеменә Шәүкәт Хисаметдинов лаек булган.
Китапханәчеләрнең эш дәрәҗәсен “Искиткеч”, — дип бәяләгән Шәүкәт абыйның теләк–тәкъдимнәре дә бар. “Яңа китаплар аз кайта. Аларның санын күбәйтергә дәүләт ярдәм итсен иде”, — диде ул. Аның: “Һәркемнең кесәсенә таман булып бетмәгән түләүле бүлекне бетереп, абонемент бүлегенә күчерсәгез иде”, — дигән тәкъдиме китапханәчеләр тарафыннан берсүзсез кабул ителде. Тиздән бу бүлектәге китаплар гомуми фондка куелачак.
Арчаның 1нче мәктәбенең 11 сыйныф укучысы Гөлия Сөнгатова узган ел 50дән артык китап, Гатауллиннар гаиләсе 128 китап һәм журнал укыган. “Китап уку башны савыктыра”, — ди алар.
Китапханәнең иң актив укучыларына, ел буе китапханәдә узган төрле кичәләргә йөргән актив коллективлар – Арчаның 1нче мәктәбе, Арча педагогика көллияте студентларына грамота һәм истәлек бүләкләре тапшырылды. Кичәдә катнашучыларга Расих Галимҗанов баянчы Рәдис Харисов белән бергәләп моңлы җырларын багышлады.
Китап укырга яратучылар гомерләре буе гыйлем, тормыш итүгә сабак алып яши. Күңелләренә байлык, зиһеннәренә акыл тупларга теләүче яшьләрнең саны аз түгел китапханәгә йөрүчеләр арасында. Өстәвенә, һәр ай саен яшьләр дә, өлкәннәр дә, “Яшәү яме” клубына җыелып, әдәбият дөньясы, иҗат турында гәп куертырга ярата. Бүгенге кичәдә шул клубка йөрүче иҗатчылар – Факия Шәрәфетдинова, Роза Шәйхетдинова, Халидә Фәйзрахманова үзләренең шигъри тәлгәшләрен тәкъдим итте.
Соңыннан китапханәнең уку залында эшләүче кызлар, күп укылучы авторларның китапларына күзәтү ясап, күргәзмәләр белән таныштырды.
Розалия ЗИННӘТОВА