Кибете бар, әмма алар эшләми

Кибете бар, әмма алар эшләми
Безнең районда кулланучылар кооперациясе сакланып калган булса, бәлки кайбер авылларда кибетләр дә ябылмаган булыр иде. Район икътисад бүлеге мәгълүматларына караганда, бездә 128 авыл бар, шуның 38ендә кибет юк. Кибетнең ябылуы ул авылның бетүенә бара, дигән сүз.
Татарстан Президенты Рөстәм Миңнеханов республика кулланучылар кооперациясе хезмәткәрләре катнашында узган киңәшмәдә:
— Кулланучылар кооперациясе, беренче чиратта, авылларда гомер итүче аз керемле халык белән эшли. Шуңа күрә алар табыш китерми торган кибет һәм предприятиеләрне япмыйлар. Бу исә авылның саклануы, гөрләп яшә-венә дә зур өлеш кертә. Хәзерге вакытта 16 районда кулланучылар кооперациясенең үзәкләштерелгән системасы юк, ә тиешле активлар шәхси кулларга күчте. Әлеге өлкәдә тиз арада тәртип урнаштырырга кирәк. Кулланучылар кооперативлары һәрбер районда торгызылырга тиеш.
Кибетсез авылларда халык товарны кайдан ала? Район икътисад бүлеге җитәкчесе Зөл-фәт Шәрәфетдинов белән элемтәгә керәбез.
— Районга ике автолавка кайтты, — дип сөйләде ул. — Аның берсе “Тайд–Фойл” ширкәтенә бирелде, икенчесе “Арча сәүдә идарәсе” җаваплылыгы чикләнгән ширкәткә тапшырылды. Алар кибетсез авылларны график нигезендә азык–төлек, алкоголь продукциясе белән тәэмин итә.
Автолавкаларның ничек хезмәт күрсәтүен үз күзләрем белән күреп, карап кайту максаты белән Венета ягына бардым. Анда тагын Ермоловка, Красная Горка, Михайловка авыллары бар. Күз ачкысыз буранлы көн иде ул. Венета авылында автолавка күренмәде. Моңаеп Венета кибете басып тора. Ишек өстендәге язуы да шул килеш: ООО “Арское управление торговли” филиал Чулпан. Урамда очраган пенсионерлар Надежда Гуськова белән Надежда Иванова:
— Автолавка килде, — диделәр. — Михайловка авылына китте. — Кибет күптән ябылды. Хәзер ияләндек инде. Дүшәмбе, пәнҗешәмбе көннәрендә “Тайд–Фойл” автолавкасы килә. Азык–төлектән бар да бар. Сыйфаты да әйбәт. Җомга көнне товар белән тагын бер машина килә.
Михайловка авылына юл тоттык. Буранда ялт иткән киң юлны күреп, исләр китте.
Чыннан да, Михайловка авылында иде автолавка. Буран автолавканы кубарып атардай котыра. Азык–төлек сатып алган Татьяна Карпова белән Марина Слюневаның хәлләрен сорашам.
— Авылда кибет бар иде безнең, — диләр. — Ябылды. Менә хәзер автолавкага йөрибез. Кирәк әйберне алып киләләр, рәхмәт, бәяләр кыйммәт түгел, без риза.
— Халыкка кирәкле барлык азык–төлекне алып киләбез, — дип сөйли кибетче Алсу Мөхәммәтгалиева. — Ашамлыклар капларга үлчәп салып куелган, бәяләре язылган. Бәяләр Арчада “Тайд–Фойл” кибетләрендәге кебек. Без 12 авылга йөрибез.
Шофер Илнур Муллаәхмәтовка: “Буран котырганнан котыра, бу авылда калуыгыз ихтимал, тизрәк китү ягын карагыз”, — дим.
— Азрак торабыз әле, аннан Ермоловкага барабыз, — диде шофер.
...Автолавка никадәр әйбәт булса да, аны кибет белән чагыштырып булмый.
Румия НАДРШИНА