Алар хезмәте бик җаваплы

Алар хезмәте бик җаваплы
Редакциягә без бу юлы Арча шәһәре башкарма комитеты җитәкчесе Рафил ИСМӘГЫЙЛЕВНЕ, “Водоканал–Сервис”, “Жилкомбытсервис”, Яңа Кенәрдәге “Коммуналь хезмәтләр” һәм “Яңа Кенәр күп тармаклы производство предприятиесе торак–коммуналь хуҗалыгы” ширкәтләре җитәкчеләре Тәлгать МИНДУБАЕВНЫ, Альберт ХӘКИМОВНЫ, Илдар ХӘБИБУЛЛИННЫ, Рәис ЛАТЫЙПОВНЫ чакырдык.
Газета укучыларыбыздан алынган сорауларның күбесе су темасына кагылышлы булганга, әңгәмәне Тәлгать Миндубаев белән башлап җибәрдек.
— Тәлгать Җәүдәтович, Курса–Почмак авылында ярты авылга су кергән. Калган өлешенә дә кертеп булмасмы, дип сорыйлар. Штерә авылында 10 хуҗалыкка су керми калган.
— Безнең республикада 2011 елдан бирле “Чиста су” программасы эшли. Әлеге программа нигезендә безнең районда да күп эш башкарылды. Шуларның берничәсен генә әйтеп үтәм: Күпербаш авылының калган яртысына су кертелде. Зур Бирәзә авылында яңа башня куелды һәм авылның ике ягы су торбалары белән тоташтырылды. Яңа Кенәр авылына су башнясы куелды, скважина казылды һәм су челтәрләре салынды, Шекә авылында су башнясы куелды һәм су кертелде. Арчаның көньяк өлешендә су челтәрләре салынды һәм яңа скважина казылды. Быел скважина казу һәм башня кую күздә тотыла. Шулай ук Югары Курса авылында башня куелды һәм су челтәрләре салынды.
Сорауларга килсәк, әлеге программага керү өчен проект һәм смета булуы шарт. Башта җирлек башлыклары белән берлектә проект эшләтәсе һәм газлаштыру фонды оешмасына мөрәҗәгать итәсе була. Безнең районда бу программаларны туплау белән район башкарма комитетының торак–коммуналь хуҗалыгы, энергетика һәм элемтә бүлеге мөдире Рәхимов Илфат Әгъзәм улы шөгыльләнә.
— Арча станциясендә су җәен дә, кышын да югалып тора. Кич сәгать 10нан соң бетә, иртән дә юк. Бездән соң төзелә торган яшьләр бистәсе нишләр икән, дип язалар.
— Арча шәһәренең көньягында урнашкан Чәчәкле, М.Лотфуллин, М.Гафури урамнарында, чыннан да, су җитмәү бар, җәйге айларда аеруча сизелә. Бу проблеманы беләбез һәм аның буенча эш алып барабыз. Су җитмәүнең сәбәбе шунда — яңа урамнар төзелгәннән соң су башнясы астарак калып бара. Шуңа басымны тиешенчә көйләп торып булмый. Яңа төзеләсе урамнарны исәпкә алып, бу якларга проект эшләтелде һәм инде быел өске якка скважина казылып, башня куелачак. Бу эшләр төгәлләнгәч, су проблемасы булмас, дип ышанабыз.
— Су башнялары өчен кем җаваплы? Ни өчен алар кыш көне бозга катып утыра? Нишләп алар кыш көне янгын машинасы су ала торган итеп эшләнми, дип сорый Ашабаштан Г.Әхмәтова. Ул боз каткан башняны фотога да төшереп җибәргән.
— Авылларда урнашкан су челтәрләре ике зонага бүленде. Арча зонасына 47, ә Кенәр зонасына 20 авыл керә. Арча зонасында бу эшләрне “Водоканал–Сервис” ширкәте, ә Кенәр зонасында Яңа Кенәр торак–коммуналь хуҗалыгы башкара.
Су башняларындагы суны күзәтеп тору өчен безнең һәр авылда кешеләребез бар. Ашабаш башнясын аерым контрольгә алырбыз.
Башнялардан янгын машинасына җәй көне су алырга була әле, кыш көне бу мөмкин түгел. Су челтәрендә янгын гидрантлары булдыру турында уйларга кирәк.
— Шәһәрнең Зур урамы район үзәгендәге Мәдә-ният йортыннан башлана. Чиркәү артындагы өлештә (7 йорт) суүткәргеч тә, канализация дә юк. Шәһәр уртасында яшибез, югыйсә. Кайчан без сулы да, канализацияле дә булырбыз, дип сорый әлеге йортларда яшәүчеләр.
— Шәхси хуҗалыкларга су һәм канализация торбалары салу өчен “Водоканал–Сервис” ширкәте белән килешү төзергә кирәк.
— Шәһәрдә яшәүчеләр су белән тулысынча тәэмин ителгән, — дип сүзгә кушылды Арча шәһәре башкарма комитеты җитәкчесе Рафил Исмәгыйлев. — Бүгенге көнгә тәүлеккә 2700 кубометр су тотыла, 4 чыганак эшли. Ә җәйге айларда 12 чыганактан килгән 8 мең кубометр су да җитми. Шәһәрнең көньягы үсештә, киләчәктә өстәмә чыганаклардан су китерү юллары да эзләнелә.
Соңгы көннәрдәге көчле бураннардан соң “Жилкомбытсервис” ширкәте адресына сораулар явар дип уйлаган идек. Әмма халык алар эшеннән канәгать булса кирәк.
— Бу мәсьәләдә без начар эшлибез дип санамыйм, — диде Альбер Данисович. — Бөтен техника урамда, юлларда.
— Беренче чиратта кайсы урамнарны чистартасыз?
— Беренче чиратта үзәк урамнар, балалар бакчалары, мәктәпләр, шифаханә урнашкан урамнар чистартыла. Шул ук вакытта калган техника башка урамнарны чистарту белән мәшгуль. Без Арча шәһәре муниципаль берәмлегенә кергән биш авыл урамнарын да чистартабыз.
— Арча станциясендәге Азин, Сәйдәш, Җиңү урамнарында яшәүчеләр декабрь аенда чүп контейнерын алып киттеләр дә, кире куймадылар, дип зарлана.
— Без ул контейнерларны халык соравы буенча Кояшлы урамы чатына куйдык.
— Ашабаш, Венета, Штерә авылларыннан да чүп алып китүне оештырып булмыймы, дип сорыйлар.
— Була, билгеле. Без шактый авыллар белән килешү төзеп эшлибез. Әлеге авылларда яшәүчеләр барысы да “Жилкомбытсервис” ширкәте белән килешү төзесеннәр дигән теләктә калабыз.
— Күп фатирлы йортлар территорияләрен кардан чистартуга торак милекчеләре һәм “Идарәче компания” ширкәте җаваплы, — диде шәһәр башкарма комитеты җитәкчесе Рафил Исмәгыйлев.
— Рафил Рәисович, Хөсәен дигән кеше (фамилиясен күрсәтмәгән) шә-һәрнең көнбатыш өлешендәге парк язмышы өчен борчыла. Коймалары юкка чыккан, эчкә кереп йортлар салалар...
— Шәһәрдәге барлык паркларны барлап чыктык. Аларның һәркайсына җаваплы оешмалар, мәктәпләр беркетелде. Әлеге паркка көнбатыш территориаль җәмәгатьчелек үзидарәсе (ТҖҮ) җаваплы. Шулай ук әлеге паркка МЧС, социаль яклау идарәсе беркетелде. Быел парклар барысы да төзекләндереләчәк. Моннан соң көнбатыштагы парк территориясеннән бер генә йорт урыны да бирелмәячәк.
Район газетасында әле күптән түгел генә Ашытбаш авылындагы су башнясының бозга катып утыруы турында язган идек.
— Без анда барып автомат көйләгеч куйдык, — диде Яңа Кенәрдәге “Коммуналь хезмәтләр” ширкәте җитәкчесе Илдар Хәбибуллин. — Үзебезнең зонадагы башняларны карап, төзәтеп торабыз. Безнең ширкәт Яңа Кенәрдә урамнарны чистарта, Сөрде, Шурабашка да барабыз.
Узган ел Яңа Кенәрдәге торак–коммуналь хуҗалыгы икегә бүленгән.
— Безнең оешма көнкүреш калдыкларын чыгару белән шөгыльләнә, — ди Яңа Кенәр торак–коммуналь хуҗалыгы җитәкчесе Рәис Латыйпов.
Ильяс ФӘТТАХОВ