“Ак Барс” командасы җиңде

“Ак Барс” командасы җиңде
7 февральдә Курса–Почмак мәктәбе спортзалында “Ак Барс” агрокомплексы” ширкәте җитәкчесе Шәйдулла Сәлахов призына яшүсмерләр арасында үткән көрәш бәйгесендә шушы хуҗалык командасы 1нче, Яңа Кенәр — 2, Ашытбаш командасы — 3нче урынны алды.
Бәйгедә барысы 14 командадан 89 көрәшче катнашты. Алар 10 үлчәү авырлыгында бил алышты.
Ярышларны ачу тантанасы бик матур итеп Мөрәле авылы имамы Расыйп хәзрәт Нәбиуллинның хәер–фатыйхасы белән башланып китте. Көрәшчеләрне котларга район җитәкчесе Илшат Нуриев та килде. Кунаклар арасында шушы җирлектә туып–үскән абруйлы җитәкчеләр, көрәш батырлары да күп иде. Алар, яшьләргә көч биреп, үзләренең дә мәйдан тоткан чакларын искә төшереп, күпсанлы җанатарлар белән бергәләп көне буе рәхәтләнеп көрәш карадылар. Шунысын да әйтергә кирәк, спортчылар, тамашачылар өчен дә мәктәп ашханәсендә туклану оештырылган, мәктәп ишегалдында кайнар чәе белән шашлыгы да пешеп торды. Гомумән, һәр спорт чарасын шулай бәйрәмгә әверелдерә беләләр монда. Яшүсмерләр көрәшен карау аеруча мавыктыргыч. Компромисслар юк анда. Аяк–кул авыртканга да карамый, гарьлектән күз яшьләрен чыгарып, тешне кысып көрәшә малайлар. Шулай тормышта да авырлыкларны җиңәргә өйрәнә алар.Ә тренерларының үз шәкертләре өчен ничек дулкынланганын күрсәгез! Үз аталары да уллары өчен алай ук борчылмыйдыр кебек! Шуңа күрә яшүсмер малайларның остазларын ихластан хөрмәт итүе гаҗәп түгел. Үз үлчәү авырлыкларында Яңа Кенәрдән Азат Хәкимов (40 кг.га кадәр), Иске Чүриледән Рүзәл Исмәгыйлев (45), Ашытбаштан Ленар Әхмәтгалиев (50), Арча педагогика көллиятеннән (АПК) Илнур Моратов (55), “Ак Барс” агрокомплексы”ннан Алмаз Локманов (60), АПК Радик Хәйруллин (65), АПК Илшат Фәйзуллин (70), Наласадан Азат Сираҗиев (75), Наласадан Фаяз Зарипов (80), Наласадан Рәнис Шәмсетдинов (85) батыр калдылар. Призлы урыннарга бүләкләр дә саллы иде: 1нче урынга 3000 сум, 2 нче урынга 2000 сум, 3нчегә 1000 сум бирелде. Шәйдулла Имамович, көрәш тәкәсез булмый дип, җиңел һәм авыр үлчәүдә абсолют батырларга тәкә дә әзерләгән иде. Аның берсе 40–55 килограмм үлчәү авырлыгындагы чемпионнар арасында җиңгән Илнур Моратовка, икенчесе авыр үлчәүдәге көрәшчеләр арасында финалда Россия чемпионы Фаяз Зариповны 1 бал аермасы белән откан Рәнис Шәмсетдиновка бирелде.
Исрафил НАСЫЙБУЛЛИН