Безгә тынычлык кирәк

Безгә тынычлык кирәк
Балачакта өйрәнгән шигырьләр хәтердә гомер буе онытылмыйча саклана, диләр. Үрнәк балалар бакчасына йөрүче Динә Закирова өчен дә Надежда Иванованың “Җиңү көне” (“День Победы”) шигыре, һичшиксез, шулай булыр. Чөнки Динәгә әле дүрт яшь тә тулып җитмәгән, ә ул инде берничә куплетлык шигырь белән республика күләмендәге шигырь бәйгесенең район этабында катнашты.
Аның шигыре бәйге кысаларында саналмаса да (чөнки бәйге мәктәп укучылары арасында бара), күп укучылар өчен үрнәк. Бирегә ул авыл китапханәчесе Раушания Шәймуллина һәм әбисе белән килгән. Динә катнашкан бәйге республика балалар китапханәсе һәм ТР хәрби комиссариаты белән берлектә Бөек Җиңүнең 70 еллыгы уңаеннан “Җирдә тынычлык хакына” исеме астында игълан ителгән иде. Район балалар китапханәсендә аның район күләмендә 1 этабына йомгак ясалды.
Бәйгедә катнашкан 67 баланың 43е — Бөек Ватан сугышына багышланган шигырьләрне яттан сөйләүчеләр (9–11 яшьлек укучылар арасында) һәм 24е — Бөек Ватан сугышы турындагы әсәрдән өзек укучылар (12–14 яшьлекләр). Алар — авыл китапханәләрендә, мәктәпләрдә әлеге бәйге кысаларында узган әдәби кичәләр, шигърият сәгатьләре һәм башка төрле чараларда иң яхшы сөйләүче исеменә лаек булганнар.
Сеҗедән 8 сыйныф укучысы Динә Әхмәдиева белән 5 сыйныфтан Булат Бәшәров та бәйгенең район этабына мәктәп укучылары арасында сайлап алу турын узып килгән. Аларны конкурска китапханәче Гөлфинә Әхмәдиева әзерләгән. “Ике атналап тырышып әзерләндек. Бүген моннан һәммәбез рухи байлык алып кайтабыз. Башкаларның чыгышын күреп үзебезнең җитешсезлекләрне аңладык, тәҗрибә тупладык”, — ди ул.
Район мәдәният идарәсе җитәкчесе Рамил Мөхетдинов әйтүенчә, бәйге яшь буынның сугыш турында белеп, имин тормышның кадерен аңлап, үзләреннән соңгы буынга да җиткереп яшәсен дигән нияттән оештырыла. Катнашучылар арасында талантлылар күп булганлыктан, жюрига иң яхшыларын сайлап алу өчен нык тырышырга туры килде.
“Шигърият” номинациясендә 1 урынга Хәсәншәех мәктәбеннән Надир Хәбибуллин, 2 урынга Эльза Минашаева (Арчаның 7нче мәктәбе) һәм Индира Гарифуллина (Хәсәншәех), 3 урынга Айгөл Фәттахова (Шушмабаш) һәм Инзилә Заһидуллина (Носы); “Проза” номинациясендә 1 урынга Арчаның 1нче мәктәбеннән Инсаф Гаптел-бәров, 2 урынга Талия Төхвәтуллина (шул ук мәктәп), Рәсим Йосыпов (Яңа Кишет), 3 урынга Адилә Әхмәтҗанова (Кәче) һәм Камил Шәрипов (Яңа Кырлай) лаек булды.
Җиңүчеләр ТР хәрби комиссариатының Арча һәм Әтнә районнары буенча бүлеге җитәкчесе Алмаз Борһанов һәм район мәдәният идарәсе җитәкчесе Рамил Мөхетдинов кулыннан Диплом һәм истәлекле бүләкләр алуга иреште. Һәр катнашучыга район мәдәният идарәсенең Рәхмәт хатлары тапшырылды. Соңыннан аларга багышлап Арчаның 4нче башлангыч мәктәбе укучылары сугыш һәм тынычлык темасына корылган чыгышын тәкъдим итте.
Бүгенге җиңүе Эльза Минашаева өчен чираттагы җиңүенең берсе. Аңарчы кыз, әле 3нче сыйныфта гына укыса да, республика күләмендәге шигырь сөйләү бәйгеләрендә һәм бию буенча катнашып, дипломант дәрәҗәсен яулаган инде. Ул бу уңышы өчен укытучыларына һәм әнисенә рәхмәтле.
Бүгенге җиңүе һәркем өчен киләчәктәгеләренә юл ачсын. Ә республика күләмендә узачак бәйгегә Надир Хәбибуллин белән Инсаф Гаптелбәров барачак.
Розалия ЗИННӘТОВА