Барысы да балалар өчен

Барысы да балалар өчен
Арча станциясендәге яңа 9нчы балалар бакчасында “Ачык ишекләр көне” булды. Әти–әниләр бакчада балаларының ничек көн үткәргәннәрен карадылар.
Килгән саен мин бакчадагы матурлыкка, уңайлыкка сокланам, тәрбиячеләрнең ничек балалар белән эшләвен кызыксынып күзәтәм.
268 бала. Бакчада һәр тәрбияче аерым бер түгәрәк алып бара. Уртанчылар төркемендә Лилия Якупова рәсем ясау түгәрәген оештырган. Ул балаларны без караган дәрестә диңгез тереклегенә өйрәтте. Экран аша яңалыкны танып белү уңайлы һәм кызыклы иде. Алар яңа тема үткәндә берәр төрле ачыш та ясарга тиеш икән әле. Бу юлы балалар тозлы суда йомырканың батмавын үз күзләре белән күрделәр. Сабыйлар өчен зур ачыш булды ул. Тәлинкәләргә салынган буяуга кулны тидереп, кәгазьгә кул сурәте дә төшерделәр.
Уртанчылар төркемендә (8нче) Лилия Шәрәфетдинова җитәкчелегендә балалар, таякчык башына киертелгән губкаларны буяу-ларга манып, аю рәсемен буядылар. Балалар өчен бик мавыктыргыч шөгыль иде бу.
— Безгә монда кызык, — ди рәсемнән аерыла алмыйча нәни кызчык Наилә.
Татар теле тәрбиячесе Айгөл Котдусова мәтәпкә әзерлек төркемендә “Әбиемдә кунакта” дәресен күңелле итеп алып барды. Бар да милли киемнән. Татар теле бүлмәсендә музей почмагы оештырылган. “Әкият” түгәрәге эшләп килә.
— Без башта әкиятләрне өйрәнәбез, аннан сәхнәләштерәбез, — ди Айгөл Котдусова. — Әти–әниләр дә бик ярата сәхнәләштергән әкиятләрне. Костюмнарыбыз бик күп.
Логопед бүлмәсе үзе бер җанга рәхәт почмак.
— Һәр төркемнән авыррак сөйләшкән балаларны сайлап алам, — ди Илүзә Мөхәммәдиева. — Әти–әниләр ризалыгы белән 27 баланы үземә тупладым инде.
— Минем бу бүлмәгә керәсе килеп тора, — ди 6 яшьлек Ильяс.
Зурлар төркеме белән үткәрелгән инглиз теле дәресен (укытучысы Гөлназ Гыйләҗева) карагач, әле бакча дүртенче аен гына эшли, кай арада инглиз теленә өйрәнгәннәр, дип гаҗәпләнәсең. Хәтта инглиз телендә “Теремок” әкиятен сәхнәләштереп күрсәттеләр.
Арча сәнгать мәктәбеннән хореограф Чулпан Ганиева, бакчага килеп, балаларны биергә өйрәтә.
Ләйсән Вәлиева: “3 яшьлек улыбыз Эдик бакчага йөри башлагач, ашавы әйбәтләнде, тәртибе яхшырды, шигырьләр сөйли”, — дип бакчаның файдасы турында сөйләде.
Марат Гыйләҗев: “Узган ел сентябрьдә генә тулды әле безгә 2 яшь, — диде. — Улыбыз Рүзәл юньләп сөйләшә дә белми иде. Бакчаның файдасы тиде. Хәзер туктатып булмый. Шигырьләр сөйли, биергә ярата.”
— Һәр тәрбияче үз белемен күтәрү өстендә эшләргә тиеш, — дип сөйли бакча мөдире Надия Мифтахетдинова. — Атна саен барлык тәрбиячеләрне җыеп, теге яки бу тема буенча методик дәрес үткәрелә.
Тәрбияче Раилә Идиятова, Альбина Минһаҗева юл кагыйдәләре буенча методик дәрес алып барды. Соңыннан “Күңелле музыкантлар” халык уен кораллары оркестрына (җитәкчесе Гөлнара Гәрәева) йөргән балалар дәртле рус халык җырларын музыка уен коралларында күңелле итеп уйнадылар.
Барысы да балалар өчен. Монда бакчаның мәктәп белеменең беренче баскычы икәнлегенә инанасың.
Румия НАДРШИНА