Шөгыле бар — югалмас

Шөгыле бар — югалмас
Иске Кырлай авыл җирлегендә бүген хуҗалык итүнең күп формаларын күрергә мөмкин. Уңышлары төрле булган инвесторлар да, шәхси эшмәкәрләр, гаилә фермалары бар монда. Аларда хезмәт итәргә теләмәгәннәр читкә барып эшли — һәркемнең үз карамагында.
11 февральдә үткән хисап җыелышында җирлек башлыгы урынбасары Фәргать Низамиев яшәешнең төрле якларын чагылдырды. “Кырлай”, “Арча” агрофирмалары, ике фермер хуҗалыгы, дүрт гаилә фермасы авыл хуҗалыгы продукциясе җитештерә. Хәлим Гарипов, Равил Гайнетдинов, Рөстәм Мәрдәнов, Айдар Сабировның гаилә фермалары уңышлы эшләп китте.
Шәхси эшмәкәр Динар Төхвәтуллинның “Мөндеш сельхозтехникасы”н алып, яңадан терелтеп җибәрүе җирлек, бигрәк тә авыл өчен бәхет булды. Анда 80 кеше эшли, алар вакытында әйбәт хезмәт хакы ала, предприятие үз эшчеләре турында зур кайгыртучанлык күрсәтә.
Калайдан тәрәзә–ишек ясаучы, машиналар төзәтүче, брусчатка, агачтан тәрәзә рамнары ясаучы, такта яручы хуҗалыклар барлыкка килгән.
Шәхси эшмәкәрләр, җи-тәкчеләр Наилә Нигъмәтҗанова, Раиф Сибгатуллин, Зиннур Гарифуллин, Фәрит һәм Рәис Сәйфетдиновлар, Зөфәр Дәүләтбаев зиратларның коймаларын яңарту, төзекләндерүгә зур өлеш керткән. Фәнил Гарәфиевның игелекле эшләрен дә онытмыйлар.
Бу җирлектә уңышлы эшләүче “Кырлай” ширкәте бар. Аның җитәкчесе Илшат Шакирҗанов кайбер күрсәт-кечләр белән таныштырды. Узган ел игеннәрнең гектарыннан — 41,8, бәрәңгедән 430 центнер уңыш алдылар. 2014 елда бәрәңге 600 гектарда игелсә, быел 900 гектарда планлаштыралар. Сугарулы мәйданнарда шулай ук 20шәр гектарда кишер, чөгендер үстереләчәк. Былтыр Иске Кырлайда буа төзелде, Яңа Кырлайда яңа технологияләр буенча ике склад эшләнде.
Терлек азыгын да иң күп әзерләүче хуҗалык бу. Бер шартлы терлеккә 80,3 цент-нер туры килә.
Җитәкче терлекчелектә эшләүче Гөлсинә Зарипова, Зөбәрҗәт Әхмәтҗанова, Гөлүсә Сафиуллина, Мөнирә Хурамшина, Альфред Фәй-зуллин, Илназ Галимовны мактап үтте. Сөт җитештерү буенча Иске Кырлай фермасы алда бара.
Җирлеккә кергән сигез авылның алтысына асфальт юл килә. Проблемалар да бар. Әзәк авылы күпере начар хәлдә, Казиле авылы халкы асфальт юл көтә. Өтнә авылына клуб кирәк, төзекләндерәсе урамнар шактый. Яшьләрнең авылда калмавына борчылып сөйләделәр. 2013 елда Түбән Мәтәскә урта мәктәбен 19 укучы тәмамлаган, шуларның 12се югары уку, 7се һөнәри белем бирү йортларына кергән. Былтыр 15 укучы тәмамлап, 11е югары, 3се һөнәри уку йортларына кергән, 1се армиядә. Шул ук вакытта терлекчеләр, механизаторлар гына түгел, авыл хуҗалыгы белгечләре дә җитми.
Район башкарма комитеты җитәкчесе урынбасары Илнур Котдусов үзенең чыгышында Иске Кырлай авылы җирлегендә халыкның тулы канлы тормыш белән яшәвен билгеләп үтте, районда гамәлдә булган программалар турынды сөйләде, күтә-релгән проблемаларның һәркайсы район җитәкчелегенә җиткереләчәген әйтте.
Ильяс ФӘТТАХОВ