“Ак карга” булуың яхшырак

“Ак карга” булуың яхшырак
“Казан арты” тарих-этнография музеенда җәмәгатьчелек тәрбиячеләренең чираттагы утырышы булды. Аны район башкарма комитетының балигъ булмаганнар белән эшләү комиссиясе сәркатибе Лилия Завялова алып барды.
— Бүгенге көндә Арча эчке эшләр бүлегендә 29 бала исәптә тора. Аларның барысын да бушка бассейнга, Боз сараена шугалакка бушлай йөртү оештырылды. Шулай ук әти–әниләре белән концертларга йөрү өчен бушка билетлар да бирелә. Җәмәгатьчелек тәрбиячеләренә аларның ияләренә барып ирешүләрен контрольдә тотарга кирәк. Болар бар да бала өчен зур тәрбияви чара. Аннан патриотизм хисе тәрбияләүгә дә басым ясарга кирәк. Ветераннар янына барсыннар, очрашып сөйләшсеннәр, ярдәм итсеннәр. Карларын гына көрәсәләр дә, алар шуның белән горурлана ала. Югыйсә, эш дәверендә шундый каты бәгырьле балалар белән очрашырга туры килә. Берсендә, мәсәлән, бала операция-дән генә кайткан әнисенә утырырга урын да тәкъдим итмәде. “Ул хастаханәдә күп утырды инде”, — дип кенә җавап бирде. Менә шундыйларның йөрәгенә үтеп кереп, андагы бозны эретергә, соңга калганчы бала күңелендә кешелеклелек хисләре тәрбия-ләргә кирәк, — диде Лилия Завялова.
Ул көнне җәмәгатьчелек тәрбиячеләре —Арча агросәнәгать көллиятенең Арча филиалы һөнәргә өйрәтү остасы Надежда Мөхәммәтҗанова һәм Арчаның икенче мәктәбе укытучысы Мөнирә Сабирова чыгыш ясады, тәҗрибәләре белән уртаклашты.
— Минем укучым М. тәртипсез егет түгел. Сыйныфташлары да аны ярата, якын итә. Ялганны сөйми, итагатьле. Киләчәктә дә аннан яхшы кеше чыгачак. Тик менә бер ягы бар — үзеннән өлкәнрәкләр белән аралаша. Алар арасында ак карга булып күренергә теләмичә, аракы кулланып караган һәм полиция хезмәткәре кулына эләккән, — ди Мөнирә Сабирова. — Бу очраклы хәл генә булгандыр һәм киләчәктә кабатланмас, дип ышанам.
— Алкогольле эчемлек кулланган, тәмәке тарткан килеш эләккән икән, нинди генә әйбәт егет булмасын, исәпкә куела, — ди Лилия Завялова. — Балигъ булмаган яшьтәгеләр өчен кабул ителә торган әйбер түгел бу. Киләчәккә зур сабак та.
Әйе, киләчәктә гомерең буе шуннан зыян күрәсең килмәсә, хәзер иптәшләрең арасында ак карга булып калуың уңайрак. Чөнки укырга кергәндә дә, эшкә урнашканда да кешенең полициядә исәптә торганлыгы артыннан кара тап булып озата бара.
— Сиңа шундый яхшы характеристика бирделәр. Карап торышка да тәртипле егеткә ошагансың. Имтиханнарыңны уңышлы тапшырып, үз урыныңны тап, илебезнең лаеклы гражданины бул, — диде укытучысы белән утырышка килгән М.га мөрәҗәгать итеп “Бердәм Россия” сәяси партиясенең җирле бүлекчәсе җи-тәкчесе урынбасары Валентина Гаранина һәм егеткә район яшьләре тормышына кагылышлы берничә сорау бирде.
М.ның җавапларыннан күренгәнчә, барырга урын булмаганлыктан, станция яшьләре вокзал тирәсендә җыела икән. Аныңча, мәктәп кичке 7дә ябыла, дискотекалар кызыксыз үтә, аларга барырга урын юк. Тик бу очракта “дәва”ны аракыдан эзләү юл түгел. Яшьләр тормышы өчен җаваплы оешмалар да бу хакта уйлансыннар иде. Бәлкем, ул вакытта балигъ булмаганнар арасында начар юлга басучылар саны да кимер.
Гөлсинә ЗӘКИЕВА