Укытучылар ярыша

Укытучылар ярыша
“Укытучының дәрәҗәсе ил алдында ел саен үсә бара. Бүген бирегә чыгыш ясарга районның иң яхшы белем бирүчеләре җыелды”. Бу сүзләр “Ел укытучысы — 2015” бәйгесенең “Елның сыйныф җитәкчесе” һәм “Башлангыч сыйныфлар укытучысы” номинацияләре буенча район этабы бәйгесен ачып җибәргән мәгариф идарәсе җитәкчесе урынбасары Зөлфия Кәлимуллина чыгышыннан.
Арча балалар сәнгать мәктәбе бинасында 8 укытучы көч сынаша. Алар 1 турга үзләренең эшчәнлеген чагылдырган портфолио аша 32 кеше арасыннан сайлап алынган. Укытучылар эш алымнарының үзенчәлеген, балаларга тәрбия бирүче проектларын яклап чыгыш ясады. Син укытучы икәнсең, тормышның нинди генә мизгелләрендә дә каушап калмаска, һәр өлкәдән хәбәрдар, кыскасы, универсал булырга тиешсең. Мәсәлән, Арчаның 5нче гимназиясе укытучысы Ләйсән Сабирова кебек. Никадәр нәнигә тәүге тапкыр хәреф таныткан, белем иленә сукмак салуда ярдәм иткән Ләйсән Тәбрис кызы “Елның башлангыч сыйныфлар укытучысы” номинациясендә гран–прига лаек булды. “Мондый ук уңышка ирешермен дип уйламаган идем, — ди ул шатлыгын яшермичә. — Бәйгегә өч көн кала гына әзерләнә башладым, чөнки алдагы атнада гимназия район күләмендәге концертта катнашты, бөтен вакыт шуңа әзерләнеп үтте. Чыгышымның сценариен үзем төзедем, ә әзерләнүдә хезмәттәшләремнән торган иҗат төркеме ярдәм итте”.
Гран–прига ия булу ул 19 февральдә Сабага зона бәйгесенә барачаксың, дигән сүз. Анда җиңүчеләр республикада “Ел укытучысы — 2015” исеменә ия булу өчен көч сынашачак. Ләйсән Сабирова белән бергә Сабага Арчаның 1нче мәктәбеннән Ләйсән Надершина, Арча Укучылар сараеның “Нур” телестудиясе җитәкчесе Зөлфирә Зарипова, Яңа Кенәр укучылар иҗат йорты педагогы Раймә Латыйпова һәм Арчаның 1нче мәктәбенең педагог–психологы Гөлнур Сәмиева да бара.
Ләйсән Надершина гран–прига “Елның сыйныф җитәкчесе” номинациясендә җиңеп иреште. “Сыйныф җитәкчесе ул — балаларга карата мәхәббәткә корылган тумыштан бирелгән сәләт, — ди Ләйсән. —Балаларга белем биреп, мин үзем дә белмәгәннәремне өйрәнәм. Максатым — белемле булу өстенә рухи кыйммәтләрне дә аңлаучы балалар тәрбияләү”.
Бүген биредә чыгыш ясаучы һәр укытучы шушы бәйгедә катнаша алуы белән бәхетле. Хезмәтең бәяләнә икән, димәк, булдырасың. Бүген башлангыч сыйныф укытучылары арасында 1 урынны алган Лесхоз мәктәбеннән Раилә Гобәйдуллина, 2 урынга лаек булган Арчаның 2нче мәктәбеннән Ләйсән Алмаева, 3 урын иясе Яңа Кенәр мәктәбеннән Рания Сафина, сыйныф җитәкчеләре арасында 1 урын яулаган Носы мәктәбеннән Эльмира Абдуллина, 2 урындагы Арчаның 7нче мәктәбеннән Лилия Шәмсетдинова, 3 урынга лаек булган Шушмабаш мәктәбеннән Рузилә Һадиева моны ачык аңлады.
Укытучыларның тырышлыгыннан, аңарчы аларның дәресләрендә булып, эш алымын күзәткән жюри да канәгать. Жюри әгъзасы Миләүшә Шакирова бәйгене үткәрүдә көчләре кергән балалар сәнгать мәктәбе һәм Укучылар сарае хезмәткәрләренең эшен дә рәхмәт сүзләре белән бәяләп үтте.
Ә 19 февральгә дулкынлану тулы санаулы көннәр генә калып бара. Мөгаллимнәрнең аннан да уңышлар белән кайтуын көтеп калабыз.
Розалия ЗИННӘТОВА