Таулар артында калган яшьлек

Таулар артында калган яшьлек
Үткән шимбәдә район сәнгать мәктәбенә Әфганстанда хәрби хезмәт үткән ир–егетләр җыелды. Алар күкрәгендә тагын бер юбилей медале өстәлде.
Районнан Әфган сугышында 143 ир–егет катнашкан. 3се туган җиренә әйләнеп кайта алмаган. Тагын 31е арабызда юк инде...
— Без, 1962 елгылар, Көек һәм Төрнәле авылыннан берьюлы 4әү, Илнур Хәбибуллин, Әнис Миннеханов, Ризван Нуриязданов һәм мин, Әфганстанга кердек, — дип сөйли Көектән Вәбил Шәйдуллин. — Безгә кадәр Көектән десантчы Идрис Надршин иң беренчеләрдән булып сугышка алынды. Хәтта бәрелеш-ләрнең беренче көненә үк туры килде. Шуңа күрә күп сөйләшми ул. Бездән соң Көектән Ринат Төхвәтуллин, Төрнәледән Фәнис Тимашев Әфганстанда булды. Кызганыч, Ринат сугыштан исән–сау кайтса да, өйләнмичә, ялгыз өйдә әрәм булды. “КамАЗ” машинасында шофер булып хезмәт иттем. Кораллар йөрттек. Иң зур операция Панджшер тарлавыгында булды. Тау эчендәге засаданы алдык. 3 складны кулга төшердек. 1981 елның язгы–җәйге айлары иде ул. Якында гына мина шартлап, машинаны читкә алып ыргыткан. Госпитальдә генә аңыма килдем. 3 ай яттым. Машина яраксыз хәлгә килгән, ә үзем исән–сау калдым.
Симетбаштан Фаяз Әхмәдуллин:
— Әфганстанга 1984 елда кердем, — дип сөйли. — 1986 елда чыктым. Без өч егет, Мәмсәдән Радик Гайфиев, Арчадан Радик Рәхиев һәм мин, Әф- ганстанга кердек. Менә бүген күрәсез, өчебез дә исән–сау. “Урал” машинасында хезмәт иттем. Азык–төлек, кием–салым, корал йөрттем. Бәрелешләрнең каты барган вакытына эләктем. Контузия алып, яраланып кайттым.
Радик Рәхиев “КамАЗ” машинасында соляр, керосин ташыган. Алда барган машина шартлап, контузия алган. Ә Радик Гайфиев “КРАЗ” машинасында керосин ташыган.
— Башта Әфганстанга килеп төшкәч, сәер тоелды, таң алды, бар да автомат тотып йөри, аннан ияләндек, — дип сөйли ул. — Югалтулар күп булды. Машинада янып үлгән дус егет Володя (молдован) әле дә күз алдымда… Гамьсез малайлар булып киткән идек, тормышның, туган җирнең, әти–әнинең кадерен аңлап, олыгаеп кайттык.
…Кичәне алып баручылар Юлия Ибраһимова белән Данис Гайфуллин үткәннәргә алып кайтты:
Ул төнне безгә
казармага приказ килде,
Десантчыларга
тревога белдерделәр.
Әйттеләр безгә:
Әфганстанга очабыз…
Район башкарма комитеты җитәкчесе урынбасары Илнур Котдусов, “Сугышчан дуслык” җәмәгать оешмасы җитәкчесе, подполковник, Әфганстанда хезмәт иткән Сергей Баһаветдинов, ТР хәрби комиссариатының Арча һәм Әтнә районнары буенча бүлеге җитәкчесе, подполковник Алмаз Борһанов ил алдындагы хәрби бурычны үтәгән, Әфганстанда хезмәт иткән ир–егетләргә рәхмәт әйтте.
Әфганстан ул курку белмәс, күп нәрсәне аңлап җиткермәгән яшьлек тә. Кайберәүләрнең Әфганс-танга барасы, йөргән җирләрне карап кайтасы килә. Күпләр Мәскәүдән солдат киемнәрен кайтарткан. Бүгенге очрашу да яшьлек белән очрашу иде.
Соңыннан әфганчылар истәлегенә куелган һәй-кәлгә чәчәк салдылар һәм Боз сараенда хоккей карадылар.
Румия НАДРШИНА