Трактор да жәл түгел

Трактор да жәл түгел^
Урта Курса авыл җирлегенә кергән авылларда яшәүчеләр җыены алдыннан күңелле вакыйга булып алды — “Курса МТСы” ширкәте җитәкчесе Рәүф Гыйлаҗетдинов Фәрит Гайнетдиновка “МТЗ–80” тракторын бүләк итте.
Хуҗалык җитәкчесе тракторның документларын җыелыш барышында тапшырды.
— Фәрит Гайнетдиновны без пенсиягә озатмыйбыз, ә чыгарып кына торабыз, — диде Рәүф Гыйлаҗетдинов, шаяртып. — Бик кирәк әле ул безгә.
Пенсия яшенә җиткән-нәрнең хуҗалыкта кимендә 25 ел эшләгәннәренә 120шәр килограммлы бозаулар бүләк иттеләр. Эш яшендә булганнардан 87 кеше бүләк алды.
Эше барның ашы бар, диләр. Болганып торган дөньяга артык исе китми генә яши хуҗалык. Узган ел 6 млн. сумга якын орлык, 3 млн. сумлык рапс саттылар. Бер сыердан уртача 6344 килограмм сөт савылды. 450 башка исәпләнгән таналар фермасы эшләнде.
Урта Курса авыл җирлеге башлыгы Рәмзия Вафина үзенең чыгышында халыкның яшәешен яхшырту юнәлешендәге матур эшләрне санап үтте. 2014 елда Урта Курсада мәһабәт мәчет сафка басты, мәктәп, балалар бакчасы ныклап төзекләндерелде, өч авыл асфальт юл белән тоташты. Югары Курсага су кертелде.
Сеҗе авыл җирлегендә хисап җыелышлары һәр елны зур оешканлык белән үтә. Авыл җирлеге башлыгы Гөлфия Гыйбадуллина, “Ак барс” агрокомплексы” ширкәте җи-тәкчесе Шәйдулла Сәлахов, башкарылган эшләргә анализ ясап, булган җитешсезлекләрне күрсәтеп, алда торган бурычларны билгеләделәр.
Хисап җыелышларының күбесендә пай җирләренә түләү мәсьәләсе күтәрелми калмый. Ничә еллар инде халыкны рәнҗетеп яшәүче җитәкчеләр бар. Ә биредә авыл җирлеге башлыгы рәхәтләнеп сөйли: 1248 кешенең пай җирләрен рәсмиләштердек, аларга узган ел 383 тонна печән, 248 тонна салам, 195 тонна ашлык бирелде. Пай җирләренең салымын — 350 мең сумны, килешүдә каралганча, ширкәт түләгән. Һәр елны шулай, бернинди проблема юк. Халыкка терлек азыгын җитәрлек биргәнгә шәхси хуҗалыклар терлекләр күп асрый. Узган ел 13714 центнер сөт сатылган, бер сыер уртача 43530 сум керем китергән.
Ширкәтнең уңышлары республикада да билгеле. “Ак Барс” холдинг компания-сенең авыл хуҗалыгы департаменты җитәкчесе Камил Галиев тә үзенең чыгышында шул турыда әйтте.
Пенсия фондының Арча һәм Әтнә районнары буенча идарәсе җитәкчесе Рузия Нурмөхәммәтова пенсия системасындагы яңалыклар белән таныштырды.
Шушмабашта үткән хисап җыелышында “Северный” ширкәте баш белгечләре, үз тармакларындагы эшне белеп, анализлап чыгыш ясадылар. Ширкәт җитәкчесе Рөстәм Хәйруллин хезмәт коллективлары, терлекчеләр, механизаторларның һәркайсына бәя бирде, мактыйсын мактады, эшләп җиткерелмәгән урыннарны йомшак, әмма аңлаешлы итеп әйтеп үтте.
— Башкалары да Носы бригадасы кебек эшләсә, күрсәткечләребез күпкә югары булыр иде, — диде ул.
Авыл җирлеге башлыгы Вәзир Сәгыйтов дәүләт программалары буенча башкарылган эшләргә тукталды. Сәрдәбашка асфальт юл килде, Шушмабаш урта мәктәбе ныклап төзекләндерелде.
Әлеге җыелышларда катнашкан район авыл хуҗалыгы һәм азык–төлек идарәсе җитәкчесе Айдар Габбасов өч хуҗалыкның да эшчәнлеген уңай яктан бәяләде, уңышлар теләде.
Наласа авыл җирлегендә үткән җыелышта район башкарма комитеты җитәкчесенең беренче урынбасары Илшат Галимуллин катнашты. Бу җирлеккә кергән авылларда яшәүчеләр дә дәүләт программаларының тормышка ашырылуын күреп торалар. Наласада яңа медпункт төзелде, мәдәният йорты ныклап төзекләндерелә. Быел Наласага асфальт юл киләчәк.
Ильяс ФӘТТАХОВ