Шәхси кабинетың бармы

Шәхси кабинетың бармы
Әңгәмәдәшебез — Арча һәм Әтнә районнары буенча Пенсия фонды идарәсе җитәкчесе урынбасары Гөлназ Ибәтуллина.
— Гөлназ Гыйлембаевна, хәзер “Иминиятләнгән затның шәхси кабинеты” турында еш сөйлиләр. Шул турыда киңрәк аңлатып үтсәгез иде.
— “Иминиятләнгән затның шәхси кабинеты” ПФРның рәсми сайтында www.pfrf.ru урнашкан. Бердәм идентификация һәм аутентификация системасында (ЕСИА) яки дәүләт хезмәтләрендә теркәлгән һәркем шәхси кабинетка керә ала.
— Шәхси кабинетны булдыру ни өчен кирәк?
— Электрон шәхси кабинетны булдырсаң, сервис аша пенсия системасы буенча кызыксындырган сорауларга җавап алу мөмкинлеге ачыла. Монда үзеңнең пенсия күләмеңне, өстәмәләрне, стажны белеп була. Һәм 2015 елның 1 гыйнварыннан эшли башлаган программа нигезендә пенсияне яңача исәпләү формуласы буенча пенсияңне санап та карый аласың.
— Сервис аша кайда эшләгән елларыңны да күреп буламы?
— Әлбәттә. Эшләгән елларыңны, кайда эшләгәнне һәм күпме взнос кергәнен дә карап була.
— Пенсиянең тупланма өлешенә өстәп түли торган дәүләт программасы мәгълүматларын белергә мөмкинме?
— Мөмкин. Һәм тагын бер яңалык: 2015 елдан пенсия калькуляторы шәхси булачак. Пенсияне яңача исәпләү программасы нигезендә калькулятор пенсия балларын һәм стажны исәпләячәк. Аның төп бурычы — пенсия күләменә хезмәт хакы, стажның, армиядә хезмәт иткән елларның, бала белән декрет ялында утыру чорының турыдан–туры йогынтысын күрсәтү.
— Шәхси кабинетның тагын нинди уңайлыклары бар?
— Пенсия фондына теге яки бу сорау белән мөрәҗәгать итәргә, чиратка язылырга, документлар соратырга мөмкин.
— Районда шәхси кабинетны булдыручылар бармы?
— Бар. 453 кеше. Бу сан тагын да артыр дип уйлыйбыз.
Румия НАДРШИНА