Электричкалар кире кайта

Электричкалар кире кайта
Арча тимер юл вокзалына төшү белән иң беренче андагы тынлыкка игътибар иттем.
Урам якта да, вокзал эчендә дә анда–санда берничә кеше. Касса яны буш. Үзебезнең чорны искә төшердем. Кассага сөлге буе чират, ә платформа тулы халык булыр иде. Кайвакыт электричкага этешә–төртешә керә идек. Ә хәзер?
Тимер юлны күпер аша чыгарга торган бер ханым белән дә тәэсирләремне уртаклаштым.
— Хәзер кеше күбрәк машина белән йөри шул. Шуңа тимер юл вокзалы бушап калды, — диде.
Ай–һай, бар кеше дә микән? Мин үзем генә көн дә электричкада Казанга эшкә йөргән берничә кешене беләм. Үземнең кызларым да электричкада йөрүне кулайрак күрә. Кайчак, аеруча ял көннәрендә, Арча аша Нократ Аланы ягына китүчеләрендә утырырга да урын булмый, диләр.
Тик менә узган ел иң уңай вакытларда йөргән электричкаларны туктаттылар. Ни өчен? Бу сорауга җавап итеп, йөрүчеләр аз булып, чыгымнар үзләрен акламаганга, дип аңлаттылар.
Ә менә 4 февральдә булган киңәшмәдә Россия Федерациясе Президенты Владимир Путин моның акланырлык сәбәп түгеллеге турында белдерде, барлык электричкаларны да яңадан җибәрергә боерды.
Бездә бу юнәлештә эш ничек тора? Шушы сорауга җавап эзләп Арча тимер юл вокзалы җитәкчесе Людмила КИРИЛЛОВА белән очраштык.
— Узган ел көздән алып Яңа елга кадәр 3 пар электричка, ягъни Казан ягына — 3, Вятка Аланы ягына — 3, туктатылган иде. Чөнки йөрүчеләр аз, күбесе үз машиналары белән юлга чыга. Әмма беренче гыйнвардан ике пар электричка яңадан расписаниегә кертелде. Ә менә бер пары — 7.53 сәгатьтә Арча аша Вятка Аланы ягына китүче һәм 13.20 сәгатьтә шулай ук Арча аша Казан ягына хәрәкәт итүче — йөрмәячәк, — диде ул.
— Ни өчен?
— Чөнки ул вакытта электричка артыннан электричка китә.
— Арчадан Казанга һәм Казаннан Арчага (Арча аша киткәннәрен дә кертеп) барлыгы ничә электричка йөри?
— Арчадан Казан ягына — 12. Арчаның үзеннән 5 электричка, калганнары Арча аша үтүчеләр.
КИТҮ ВАКЫТЛАРЫ: 4.59, 5.27, 5.48, 6.00, 7.05, 8.15, 10.56, 12.45, 15.43, 17.55, 19.15, 21.50.
Казаннан Арча ягына — 13. 4се Арчаның үзенә кадәр.
ВАКЫТЛАРЫ: 4.52, 7.31, 8.20, 11.44, 12.15, 13.33, 15.36, 16.20, 16.33, 17.22, 18.17, 19.33, 20.30.
Гөлсинә ЗИННӘТОВА