Эшмәкәрләр өчен яңалыклар

Эшмәкәрләр өчен яңалыклар
Эшмәкәрләрнең семинар–киңәшмәсен “Алгарыш” эшмәкәрләр берлеге җитәкчесе Назыйм Сибагатов алып барды. Казаннан республиканың районара инспекциясенең салым түләүчеләр белән эшләүче бүлек җитәкчесе Мөнир Шәйдуллин, Татарстанның эшмәкәрләргә ярдәм итү үзәге җитәкчесе урынбасары Лариса Парфенова кайтты. Анда район икътисад бүлеге җитәкчесе Зөлфәт Шәрәфетдинов катнашты.
— Салым түләү өлкәсендә күп үзгәрешләр булды, — дип сөйләде Мөнир Шәйдуллин. — 2015 елның 1 гыйнварыннан эшмәкәрләр НДС декларация-сен электрон рәвештә генә бирәчәк. Аны тапшыру срогы да үзгәрде. Узган ел һәр кварталныкын айның 20сенә кадәр тапшырсагыз, быел ул 25енә кадәр озайтылды. Товарны сатып алу һәм сату кенәгәләре дә электрон рәвештә алып барылачак. Бу товарны җитештерүдән алып сатуга чыгарганчы — барысы да ачык күренсен өчен эшләнә.
2015 елның 1 гыйнварыннан милек салымында да үзгәрешләр бар. Мәсәлән, йортлар базар бәясенә якын торган кадастр бәясеннән чыгып исәпләнәчәк. Узган ел ул базар бәясеннән ерак торган инвентаризация бәһасеннән чыгып эшләнде. Салым йортның 50 кв. метрына, фатирның 20 кв. метрына, бүлмәнең 10 кв. метрына салынмый.
— Кадастр бәясен “Рос- реестр” билгели. Риза булмаучылар булса, 2015 ел дәвамында “Росреестр”га хат яза аласыз, — дип аңлатты Мөнир Шәйдуллин. — 2015 ел өчен салымны 2016 елда түләү каралган. Шунлыктан хәл итәсе мәсьәләләрне быел ачыклап куярга кирәк.
Салымнарны түләү срогы да үзгәргән. Быел соңгы чик — 1 октябрьгә кадәр, узган ел ул 1 ноябрьгә кадәр иде.
Пенсионерларга милек салымына ташламалар саклана. Әмма быелдан пенсионерларга һәм ташламалар каралган башка категориядәге кешеләргә һәр төрдәге милек объектларының берсенә генә ташлама каралган. Хәтта бер пенсионер исемендә 76 йорт теркәлүе ачыкланган. Мөгаен, мондый алдашулар килеп чыкмасын өчен кертелгән үзгәреш бу.
— Салымны вакытында түләү әһәмиятле, — дип сөйләде Мөнир Шәйдуллин. — Хәтта 1 тиен әҗәт тә сезнең эшкә аяк чалачак.
Арча һәм Әтнә районнары буенча Пенсия фонды идарәсенең бүлек җитәкчесе Марат Рәхмәтуллин:
— Районда 92 эшмәкәрнең Пенсия фондына бирәчәге бар, — дип сөйләде. — Кайбер эшмәкәрләрне табып та булмый. Бирәчәге булганнарга штрафларның күләме артты.
МЧСның дәүләт янгын күзәтчелеге җитәкчесе урынбасары Раил Галимуллин эшмәкәрләр өчен шатлыклы хәбәр җиткерде:
— Планлы тикшерүләр быел булмаячак.
Эшмәкәрләр өчен “Күзәтчелек каникулы”на сөенергәме, әллә көенергәме? Пермьдәге “Хромая лошадь” кафесында булган вакыйга сабак булды, югыйсә.
Район мәшгульлек үзәге җитәкчесе Гөлфия Низамова, яңалык булмаса да, эшмә-кәрләрне кызыксындырырлык хәбәр әйтте.
— Инвалидларны эшкә алсагыз, аларның тормыш шартларын яхшырту максатыннан 72 мең сум акча каралган, — дип сөйләде ул. — Бу акчага компьютер һәм инвалидка эшләү өчен башка кирәк–яракларны алырга була.
Республиканың эшмәкәрләргә ярдәм итү үзәге җитәкчесе урынбасары Лариса Парфенова:
— Проблемаларыгыз булса, безгә мөрәҗәгать итегез, — дип тәмамлады чыгышын.
Румия НАДРШИНА